Kɔleŋtiɛŋ Veerɛi 6 - Ŋ̀âla Kɔlɔ Maa Waai

¹ Berei kwa Ɣâla-ni kwa tíi kɛ̂i la gîe mai, kwa kákpera fei a gɛ́ɛ káfe ŋɔƃɛlɛ-sêei sɔlɔ ƃo nɔ́ kpɛni-kpɛni.

² Kpɛ́ni fêi, a mò ǹyɛɛ, “Ŋá káwoo mɛ̀ni a kákpɔŋ-maa-tãi, ŋá kpɔ́ŋ kâa a káƃalo-laa ɣelei.” Ka gáa, kákpɔŋ-mâa-tãi ká ŋí nâa. Ka gáa ŋɔ́nɔ, káƃalo-laa-ɣelei ká ŋí nâa.

³ Kúfa tûa-sii-ŋa kɛ̀ nyíi-ŋai da pɔ̂ri kɛ̂i a sâpo a gɛ́ɛ kásɔnyɔ̂ŋ kɛ́, a gɛ́ɛ káfe mɛni nyɔ́mɔɔ kélee da kàa kútii su.

⁴ Kɛ́lɛ, mɛni kélee su kwaa kúkpîŋ lɛ́ a Ɣâla yée-mu-ƃela a fɔlɔ-fɔlɔ mɛni-soli su, mɛni-kpɔ̂lu su, da lii-sɛ̂lɛŋ,

⁵ lókwa su, kpini-pɛ̂rɛ-siɣɛɛ, sóoŋ-maa su, tíi kpânaŋ kɛ́ɛ su, nyíi-kpêliŋ siɣɛɛ su, da puru;

⁶ a maa-waa-laa, a táre, a lii-kpele, a sɔŋ lɛ́lɛ, a M̀ɔlêŋ Maa Waai, a tɔ̃yâ wɛli-kɛ-maa,

⁷ a dɔ̃yâ-wooi, a Ɣâla ŋɔwála-wala-laai; a tɔ̃yâ laa-la ŋɔtii-kɛ-sãa, laa mii yee da kɔɔ yee mɛi mɛni ma;

⁸ a ƃaa kɛ́-maa da ƃaa-kula-maa, a mɛni lɛ́lɛɛ ƃóɔɔ é pîlaŋ kûa da mɛni nyɔ́mɔɔ ƃóɔɔ é pîlaŋ kûa; yɛ̂ɛ nuu-pɛlɛ-ƃela, berei máŋ kúkaa la a tɔ̃yâ-ƃelai;

⁹ yɛ̂ɛ ǹûai dífe díkɔlɔŋ, berei máŋ dí kúkɔlɔŋ la a ǹɛ́lɛɛi; yɛ̂ɛ saa-ƃela ǹyaŋ ka gáa kúkaa a nuu-fulu; yɛ̂ɛ da tɔ̂ŋ pu kûa, berei máŋ dífe kúpaa ni lai;

¹⁰ yɛ̂ɛ maloŋ-too-maa, berei máŋ kúkaa lii-nɛ̃ɛ kulâi la a tãi kélee; yɛ̂ɛ kôlo-ƃela, berei máŋ kwa núu támaa tɔɔ̂i lai; yɛ̂ɛ nûa ƃe sɛŋ fé díyêei, berei máŋ sɛŋ kélee káa la a kúpɔɔi.

¹¹ Kwa mɛni kélee ƃó kâa a tɔ̃yâ. Kɔleŋ-ƃela, kúlii láa ƃóɔɔi káperei.

¹² Kúfe kákpera ni, kɛ́lɛ, ká kákpîŋ kpèra kákpîŋ kili-ŋa-siai su.

¹³ Káwɔ̂i ƃa ka kálii lá ƃó káa máŋ ŋa lônoi kápɔ yɛ̂ɛ nîa-pɛlɛɛ.

Kúkaa a vúlu-laa Ɣalai Ŋɔɣâla-pɛrɛ kɛ́tɛi

¹⁴ Diai laa-la fé díyêei káfe díkɛ a káƃarâa. Kpɛ́ni fêi, lé ƃé kɛ̀-zu-tɔnɔɔ a gɛ̀ a tɔ̃yâ laa-la da ŋ̀wana-lɔ̂ɔ? Kpaa máŋ, lé ƃé kɛ̀-zu-tɔnɔɔ a gɛ̀ a kwaa-ponoɔ da kpíni?

¹⁵ Lé kɛ̀-zu-tɔnɔɔ ƃe Kôrai da Dɛ̂ƃele da pɔ̂ri kɛ̀i zui? Lé kɛ̀-zu-tɔnɔɔ ƃe laa-la-nuu da ǹúui laa-la fe ǹyéei da pɔ̂ri kɛ̀i zui?

¹⁶ Lé mɛni kpɛ́tɛɛ ƃe Ŋ̀âla-pɛrɛ kɛ́tɛi da ɣâla-pɔkɔɔŋ-ŋa da pɔ̂ri gɛ̂i? Kpɛ́ni fêi, kúa ƃa vulu-laa-Ɣalai ŋɔpɛ́rɛ kɛ́tɛi, yɛ̂ɛ berei Ɣâla è mò lai, “Ŋa pâi kɛ̂i díkponôi ŋá sía dísama, ŋa pâi kɛ̂i a Díɣâla, dí ƃo a ŋánûa.

¹⁷ Kúnuu-namui a mò, ǹyɛɛ, mɛni ma kúkula díkɔlɛ ka kákpîŋ kɛ̂i kôyaa dia. Káfe lɛ̀ɣɛ sɛŋ nyíi kélee mâ m̀aa fé waa nii. Gɛ̀ ní ŋa pâi ńyee sêe kámu,

¹⁸ ŋa pâi kɛ̂i a kánâŋ, káaŋ ka pâi kɛ̂i a ńônii-sinaa da ńônii-nɛyaa, ŋwála-wala-kélee Nuu-namui ƃa nyíŋi ƃò.”