Zɔ̂ŋ Maa-ŋuŋ 5 - Ŋ̀âla Kɔlɔ Maa Waai

Laa-laa ƃa ǹɔii ŋɔyee-tɛɛ-maa

¹ Ǹúui kélee a lâa la a gɛɛ Zîsɛ káa a Kôrai, maa-nuui káa a Ɣâla ǹóŋ. Ǹúui kélee a nàŋ-nuui wɛ̂lii, è ǹônii wɛ́li ni máŋ.

² Nyíŋi su ƃe kwa gɔ́lɔŋ naa a gɛɛ kú Ɣâla ǹônii wɛ́li ni, tãi kwa Ɣâla wɛ̀li la kú ŋɔtɔ̂ŋ-ŋai mɛi káai.

³ Ɣâla ŋɔwɛli-kɛ-maai ká ŋí a gɛɛ kú ŋɔtɔ̂ŋ-ŋai mɛi káa. Ŋɔtɔ̂ŋ-ŋai dífe wuyɛ ni.

⁴ Kpɛ́ni fêi, ǹúui kélee gáa a Ɣâla ǹóŋ, ǹyée tɛɛ̂i ǹɔii ma. Ǹyaŋ kúlaa-lai ƃa ǹyee-tɛɛ-maai nyíi ǹɔii yée mɛi ɣálêi.

⁵ Gbɛ̂ɛ ƃe ǹyée tɛɛ̂i ǹɔii ma é kúla ǹúui pôlu ǹaâi la a gɛɛ Zîsɛ káa a Ɣâla Ǹóŋ?

Mɔlêŋ ŋɔsêre-faai é pîlaŋ Zîsɛ Kôrai ma

⁶ Zîsɛ Kôrai è pà yá da ŋãa sarâi. Yá tɔnɔ nɔ́ fêi, kɛ́lɛ, è pà yá da ŋãa sarâi.

⁷ Mɔ̂leŋ ƃa zere-faa kɛ̀, kpɛ́ni fêi, Mɔ̂leŋ ƃa dɔ̃yâi.

⁸ Sere-faa kɛ-ƃela saaƃa ƃe naa. Dia ƃa Mɔ̂leŋ, ǹyái, da ŋãai. Ǹyaŋ zere-faa kɛ-ƃela saaƃai ŋí díwoo káa zu tɔnɔ.

⁹ À kɛ̀ kwa núu-kpune ŋɔsêre-faa-kɛɛ sìɣe, Ɣâla ŋɔsêre-faa-kɛɛi kɛ́tɛ̂i é tɛ́ɛ núu-kpune ŋɔi ma. Kpɛ́ni fêi, Ɣâla ŋɔsêre-faa-wooi ká ŋí a gɛɛ a Ǹóŋ maa-sere-faa kɛ́.

¹⁰ Ǹúui a lâa a Ɣâla Ǹóŋ, sere-faa káa gbonôi. Ǹúui va lâa a Ɣâlai, a gɛ́ a lɛ́ɛ-nuu, kpɛ́ni fêi, vé niî laa ní a Ɣâla ŋɔsêre-faai è gɛ̀ Ǹóŋ mɛni mai.

¹¹ Zere-faai ƃâ Ɣâla a wɔlɔ-wɔlɔ fulu-laa tɛ́ɛ kúpɔ. Vúlu-laai ŋí káa Ǹóŋ kponôi.

¹² Ǹúui Nòŋ-nuui káa ǹyêei, fúlu-laa káa ǹyêei. Ǹúui Nòŋ-nuui fé ǹyêei, fúlu-laa fé ǹyêei.

Ŋ̀wɔ́lɔ-wɔlɔ fulu-laai maa-tarei

¹³ Ŋa m̀ɛnii ŋí pɔ̃yɛ kápɔ naa káai kálaâi a Ɣâla Ǹóŋ láai, a gɛɛ ká gɔ́lɔŋ ŋwɔlɔ-wɔlɔ fúlu-laai káa káyêei.

¹⁴ Nii-kpelêi kúyêei m̀ɛni mai ǹyaa ƃa kwa sɛŋ kélee da fɛ̀li mà yɛ̂ɛ berei ǹîa-mɛnii káa lai, a kúwoo mɛni.

¹⁵ À kɛ̀ kwa gɔ̀lɔŋ a gɛɛ a kúwoo mɛni sɛŋ kélee mɛni ma kwa vɛli mai, gɛ̀ ní kú gɔ̀lɔŋ zɛŋ kélee kwa vɛ̀li mai, gáa kúyêei.

¹⁶ À kɛ̀ núu da à marâŋ nuu kàa sɔnyɔ̂ŋ kɛ̂i nyíi vé a núu paa sɔnyɔ̂ŋ, ka Ɣâla fɛ̀li, ǹyaŋ Ɣâla a pâi fúlu-laa tɛɛ̂i diai pɔ́ dísɔnyɔ̂ŋ fé a núu paa sɔnyɔ̂ŋ. Sɔnyɔ̂ŋ da káa naa nyíi gáa a núu paa sɔnyɔ̂ŋ, fé m̀ó ni a gɛɛ núu é Ɣâla fɛli nyíti mɛni ma.

¹⁷ Mɛni nyɔ́mɔɔ kélee káa a sɔnyɔ̂ŋ, kɛ́lɛ, sɔnyɔ̂ŋ da káa naa nyíi vé a núu paa sɔnyɔ̂ŋ.

¹⁸ Ku gɔ̀lɔŋ ǹúui kélee gáa a Ɣâla ǹóŋ va sɔnyɔ̂ŋ kɛ̀, kɛ́lɛ, Ɣâla Ǹóŋ a m̀ɛi kâa, ŋ̀wana-lɔ̂ɔ-nuui fa lɛ̂ɣɛ mà.

¹⁹ Kú gɔ̀lɔŋ kúkaa a Ɣâla pɔ́ɔ, ǹɔii kélee káa ŋ̀wana-lɔ̂ɔ-nuui ŋɔwala-walai yée mu.

²⁰ Kú gɔ̀lɔŋ Ɣâla Ǹóŋ a pá a mɛni-ŋa-kaa tɛ́ɛ kúpɔ a gɛ́ɛ kú ǹúui kɔ́lɔŋ gáa a dɔ̃yâ-nuui. Ǹyaŋ kúkaa dɔ̃yâ-nuui kponôi, ǹyaa ƃa Ǹóŋ Zîsɛ Kôrai. Ǹyaa ƃa Dɔ̃yâ-Ɣalai da wɔlɔ-wɔlɔ fulu-laai.

²¹ Nîa-pɛlɛɛ, ka kákpîŋ mɛi káa ɣâla-pɔkɔɔŋ ŋa mɛni ma.