Kɔleŋtiɛŋ Maa-ŋuŋ 9 - Ŋ̀âla Kɔlɔ Maa Waai

Zãâi maa nɛ̃ɛ̂i sia-nûu é zɔlɔ ƃoi

¹ Ŋuŋ ma fé ƃó ni? Sia-nûu fa ńyãa? Fe niî Kúnuu-namui Zîsɛ káa ni? Káfe a ŋátii m̀aa sêre-faa Kúnuu-namui sârai?

² A kɛ̀ fe a sia-nuu nuu da-ni ŋɛi, tɔ̃yâ ma, ŋ́gaa a sia-nuu káŋɛi; kpɛ́ni fêi, káa ƃa ŋásia-nuu-laai maa-ŋɛi-kɛ-maa Kúnuu-namui kponôi.

³ Nyíŋi ƃa ŋámaa kɔ̃ɔ-wooi diai dîa da pɔ̂ri ḿaa kpɛɛ̂i.

⁴ Ve a sɛŋ a gɛ́ɛ ku mii-sɛŋ sɔlɔ ƃó da kpele-sɛŋ?

⁵ Vé a sɛŋ a gɛ́ɛ ku nɛnî kula kwa dîa-ni ku kɛ́ siâi yɛ̂ɛ zia-ƃelai kpeli-ŋai da Kúnuu-namui ǹîa-ni é pɛ́lɛ Sífa ma?

⁶ Kpaa máŋ kwa Banaba nɔ́ ƃe ve a sɛŋ a gɛ́ɛ kú tíi kɛ́ kúfulu-laai mɛni mai?

⁷ Gbɛ̂ɛ ƃa kɔkuluƃa-tii kɛ̀ a gbîŋ-sɛŋ kɔlɛɛ? Gbɛ̂ɛ ƃa ƃa-kpɔmɔ-kpalaŋ kɛ̀ va gbɔmɔ-ƃai da mii? Gbɛ̂ɛ ƃa niŋa mɛi káa va ŋíni-ya da sɔlɔ ƃô?

⁸ Ŋa nyíŋi ƃôi núu-kpune ŋɔwála-walai su? Dɔ̂ŋ fé m̀ɛni tɔnɔi tí ƃó ní?

⁹ Kpɛ́ni fêi, bɔ̃yɛɛ̂i Mose ŋɔtɔ̂ŋ su, “Ífe ǹiŋai lá ɣiri tãi gáa m̀ii-sãâi tânii lai.” Ǹiŋai ƃe Ɣâla kpáaŋɔɔ̂i mɛni mai?

¹⁰ Ve lônoi a zu ponoɔ kúmaa-mɛni ma? Dí bɔ̃̀yɛ kúmɛni ma, kpɛ́ni fêi, gwaa-sí-nuui a gwaai sí a kili-kɛ-zu, m̀ii-sãai táŋ-nuui kɛ́ daŋ a kili-kɛ-zu a gɛ́ɛ a pâi da sɔlɔ ƃôi.

¹¹ À kɛ̀ kwa mɛni lɛ́lɛɛ sí kásama kámɔlêŋ mɛni ma, gɛ̀ ní gáa a mɛni kɛ́tɛ a kɛ̀ kwa káfulu-laai su mɛni lɛ́lɛɛ da sîɣe?

¹² A kɛ̀ gáa a sɛŋ a gɛ́ɛ núu da kpɛni-ŋa dí mɛni-ŋai ŋí dámaa sɔlɔ ƃó káyêei, gɛ̀ ní kúa máŋ ve a sɛŋ a gɛ́ɛ ku dámaa sɔlɔ ƃó e tɛɛ díwɔ̂i ma? É máŋ kɛ́ tí, kúfe niî zãâi sɔlɔ ƃo ní nyíi-ŋai gáa a sɛŋ fɛ̂ɛ kú dísɔlɔ ƃôi, kɛ́lɛ, kwa kúlii kpèle mɛni kélee su kúfa Kôrai ŋɔtuŋ lɛ́lɛɛi perêi kpaaŋ.

¹³ Káfe gɔ́lɔŋ a gɛ́ɛ diai da tíi kɛ̀ Ŋ̀âla-pɛrɛ kɛ́tɛi mui da dímii-sɛŋ sɔlɔ ƃô Ŋ̀âla-pɛrɛ kɛ́tɛi mu, diai da tíi kɛ̀ teƃele mai, díkɛ zâla-sãai da sɔlɔ ƃo?

¹⁴ Bere tɔnɔi ti nɔ́ ƃe Kúnuu-namui e mò la a gɛ́ɛ diai kélee da Duŋ Lɛ́lɛɛi ƃôi, dí dífulu-laai kɛ́ Duŋ Lɛ́lɛɛi sârai.

¹⁵ Kɛ́lɛ, fe niî zãâi ŋí da sɔlɔ ƃó ni nyíi-ŋai gáa a sɛŋ fɛ̂ɛ ŋa da sɔlɔ ƃôi, kpaa máŋ fe kɔlɔ pɔ̃yɛ̂i a gɛ́ɛ ŋa sɛŋ da sɔlɔ ƃo yɛ̂ɛ zãâi ŋí. Kpɛ́ni fêi, maa nɛɛ̂i ŋá sáa e tɛɛ la núu kɛ́ɛ ma e ŋáyoŋka téɛɛi maa-sapoi kula ńyêei.

¹⁶ Kpɛ́ni fêi, à kɛ̀ ŋà Duŋ Lɛ́lɛɛi ƃò, gɛ̀ ní sâpo kélee fe naa yoŋka tée mɛni ma. Kpɛ́ni fêi, gáa a sɛŋ fɛ̂ɛ nɔ́ ŋá gɛ́. Kpalo ƃélaâi mâ à kɛ̀ ŋà wàla Duŋ Lɛ́lɛɛi ƃo!

¹⁷ À kɛ̀ ŋà nyíŋi kɛ̀ a ŋ́gbɔɔi-woo ŋa pâi fela-fei sɔlɔ ƃôi; kɛ́lɛ, à kɛ̀ ŋà wàla gɛ a ŋ́gbɔɔi-woo, gɛ̀ ní dí ńɛ̀ a gɛ́ɛ ŋá gɛ́.

¹⁸ Gɛ̀ ní fela-fei ƃa ŋaŋ a le? Ǹyaa nɔ́ ƃa a gɛ́ɛ ŋátuŋ lɛ́lɛɛi ƃóɔ su, ŋá Duŋ Lɛ́lɛɛi ƃó fela-fei fè kɛ̀ ma, fe zãâi kélee sɔlɔ ƃô Duŋ Lɛ́lɛɛi ƃo mɛni ma, nyíi-ŋai gáa a sɛŋ fɛ̂ɛ ŋa dísɔlɔ ƃoi.

¹⁹ Kpɛ́ni fêi, berei máŋ ŋ́uŋ-ma ƃóɔi la ǹúui kélee yêei, ŋa ŋ́gbîŋ kɛ́ a luɛ núu kélee mɛni ma a gɛ́ɛ ŋa núu támaa líi pene.

²⁰ À kɛ̀ a Zûu-ŋai pɔ́naa-pere, ŋá ŋ́gbîŋ kɛ̀ yɛ̂ɛ Zûu-nuu a gɛ́ɛ ŋa Zûu-nuu líi pene. A kɛ̀ a diai díkaa dɔ̂ŋ mui, ŋá ŋ́gbîŋ kɛ̀ yɛ̂ɛ dɔ̂ŋ mu-nuu, berei máŋ ńyãa kpîŋ ḿve la a dɔ̂ŋ mu-nuui a gɛ́ɛ ŋa dɔ̂ŋ-mu-ƃelai líi pene.

²¹ A kɛ̀ a diai dífe dɔ̂ŋ mui, ŋá ŋ́gbîŋ kɛ̀ yɛ̂ɛ ǹúui ve dɔ̂ŋ mui zu-kulai fa, ḿve kɛ́ ní Ɣâla ŋɔtɔ̂ŋ mu. Kɛ́lɛ ŋá kɛ̀ Kôrai ŋɔtɔ̂ŋ mu a gɛ́ɛ diai dífe dɔ̂ŋ mui, ŋa dílii pene.

²² A kɛ̀ a vii kpɛɛ-ƃelai, ŋá ŋ́gbîŋ kɛ̀ a fii kpɛɛ-nuu a gɛ́ɛ ŋa vii kpɛɛ-ƃelai líi pene. Ŋa ŋ́gbîŋ kɛ́ a sɛŋ kélee núu kélee mɛni ma a gɛ́ɛ ŋá kɔ́ pere-sii kélee su ŋá ǹúui da-ni ƃálo.

²³ Ŋá nyíŋi kélee kɛ̀ Duŋ Lɛ́lɛɛi mɛni ma a gɛ́ɛ ŋa ŋɔƃɛlɛ-sêei da sɔlɔ ƃo.

²⁴ Káfe gɔ́lɔŋ a gɛ́ɛ diai kélee da gbakpa-fulɔi kɛ̀i da gɛ̀ díkelee, kɛ́lɛ, núu tɔnɔ nɔ́ ƃa m̀aa-pui sɔlɔ ƃô? Ka kîrɛ siɣe a berei tí a gɛ́ɛ ka zɔlɔ ƃo.

²⁵ Ǹúui kélee a kɔ̂ a gbanaŋɔɔ gbakpa-fulɔi sui, a gbîŋ mɛi kâa pere sîi kélee su. Da gɛ̀ a gɛ́ɛ dí m̀aa pui sɔlɔ ƃó nyíi pâi karâi, kɛ́lɛ, kúwɔ̂i fé pâi karâi.

²⁶ M̀ɛni ma, ŋa kirɛ sìɣe a bere síi tí, fa kirɛ siɣe ńdɛ̂i. Bere ƃé ŋa namu kɔ̂ la, fa namu kɔ̂ yɛ̂ɛ núu a pɔara marâŋ ma é fãa tua.

²⁷ Ŋa ŋ́gbono lòkwa ŋá gɛ́ a ŋáluɛ a gɛ́ɛ tãi ŋa Ɣâla-woo ƃò la nûa dîai, Ɣâla fé ńyee kùla ḿû.