Kɔleŋtiɛŋ Maa-ŋuŋ 8 - Ŋ̀âla Kɔlɔ Maa Waai

M̀ii-sãai da dɛ̀ɛ ɣâla-pɔkɔɔŋ-ŋa pɔi

¹ M̀ii-sãai da dɛ̀ɛ ɣâla-pɔkɔɔŋ-ŋa pɔi, ŋa pá nâa lônoi é pîlaŋ dîa. Kú gɔ́lɔŋ a gɛ́ɛ “táre káa kúkelee kúyêei.” “Táre” a núu kɛ̀ a yoŋka-nuu, kɛ́lɛ, wɛli-kɛ-maa a núu kponôi kpanaŋ.

² À kɛ̀ gáa núu da kíli ŋá a gɛ́ɛ è sɛŋ da kɔlɔŋ, ve niî gɔ́lɔnîi yɛ̂ɛ berei gáa a berei fɛ̂ɛ é sɛŋ gɔ́lɔŋ lai.

³ Kɛ́lɛ, à kɛ̀ núu a Ɣâla wɛ̀li, gɛ̀ ní Ɣâla è gɔ́lɔŋ.

⁴ Mɛni ma a kɛ̀ a mii-sɛŋ da dɛ̀ɛ ɣâla-pɔkɔɔŋ-ŋa pɔi da miɛɛ, kú gɔ́lɔŋ a gɛ́ɛ “ɣâla-pɔkɔɔŋ fé ɣele ma. Ɣâla tɔnɔ nɔ́ ƃe naa.”

⁵ Kpɛ́ni fêi, tãi da, zãâi ɣâla láa káa diai, díkaa ŋ̀elei su kpaa ǹɔii mâ tɔ̃yâ mai “ɣâla” támaa káa naa da “nuu-namu” támaa.

⁶ É máŋ kɛ́ tí, a kɛ̀ a kúa, Ɣâla tɔnɔ nɔ́ ƃe gáa naa. Ǹyaa ƃa Nàŋ-nuui nyíi sɛŋ kélee è kùla ǹyêei da nyíi kúkaa ɣele ma mɛni mai. Nuu-namu tɔnɔ nɔ́ ƃe gáa naa. Ǹyaa ƃa Zîsɛ Kôrai, nyíi sɛŋ kélee káa ɣele ma zarâi da nyíi kúkaa ɣele ma zarâi.

⁷ Kɛ́lɛ, dárei ŋí fé núu kélee yêei. Kɛ́lɛ, ǹúui da-ni, nyíi-ŋai wɔ́lɔ kɛ̀ ɣâla-pɔkɔɔŋ fɛlîi, da m̀ii-sɛŋ mîi nyíi gáa díkili ŋá a gɛ́ɛ gáa a ŋ̀âla-pɔkɔɔŋ-ŋai díɣâla-mii-sɛŋ. Díkili-ŋa-siai fii kpɛɛ̂i.

⁸ Mii-sɛŋ fé pâi kúkɛ̂i a gɛ́ɛ Ɣâla é ǹyée see kúmu. Ve a mɛni nyɔ́mɔɔ a kɛ̀ kúfa mii-sɛŋ sii da mii. Kɛ́lɛ, a kɛ̀ kwà maa-mii-sɛŋ tí mii, nyíti fé pâi káƃaloi.

⁹ M̀ɛnii ka pɔ̂ri gɛ̂i nya ƃa ka kámɛi káa. A wàla kɛ́ tí, gɛ̀ ní káŋuŋ-ma-ƃoi a pâi kɛ̂i a vii kpɛɛ-ƃelai perêi kpáaŋ-sɛŋ.

¹⁰ Kpɛ́ni fêi, à kɛ̀ núu da a íkàa ílaa mîi teƃele ma ɣâla-pɔkɔɔŋ ŋɔpɛ́rɛi mu, yái íkaa a táre-nuui, a kɛ̀ maa-nuui tí ŋɔkili-ŋa-siai fii kpɛɛ̂i, gɛ̀ ní ǹíi fé pâi kpelêi a gɛ́ɛ é m̀ii-sɛŋ míi nyíi da gula a sâla ŋ̀âla-pɔkɔɔŋ-ŋai diai?

¹¹ A kɛ̀ tí, gɛ̀ ní vii kpɛɛ-nuui ŋí, nyíi gáa a kúƃarâŋ-nuu nyíi Kôrai è sàa mɛni mai, zu a kâra ítarêi sarâi.

¹² Mɛni ma kà sɔnyɔ̂ŋ kɛ̀ a káƃarâa nyíi-ŋai díkili-ŋa-siai fii kpɛɛ̂i, ka díkili-ŋa-siai kara, gɛ̀ ní ka sɔnyɔ̂ŋ kɛ́ a Kôrai.

¹³ Mɛni ma à kɛ̀ mii-sɛŋ à gɛ̀ ḿarâŋ-nuui e tóo, gɛ̀ ní fé pâi sua miî, tãi da fa la ḿarâŋ-nuui kɛ́ la é tóo.