Kɔleŋtiɛŋ Maa-ŋuŋ 7 - Ŋ̀âla Kɔlɔ Maa Waai

M̀ɛni-ŋai bîlaŋɔɔi tûa-laa mai

¹ M̀ɛni-ŋai ka bɔ̃̀yɛ ḿbɔ naai, ŋa pá nâa lônoi e pîlaŋ dîa. Ǹɛ́lɛɛ̂i a gɛ́ɛ surɔ̂ŋ fe lɛɣɛ nɛnî ma.

² Kɛ́lɛ, kpɛ́ni fêi, su-kɔɔŋ a pâ núu pɔ wulu-wulu kɛ́ mɛni mai, m̀aa nɛɛ̂i surɔ̂ŋ tɛi-tɛi kélee e gbîŋ-nɛni kula, nɛnî tɛi-tɛi kélee e gbîŋ-surɔŋ kula.

³ Fɛ̂ɛ nɔ́ ǹyaŋ zurɔ̂ŋ e ŋɔnɛnîi líi láa, nɛnîi ǹyaŋ e ŋɔsurɔ̂ŋ líi láa.

⁴ Kpɛ́ni fêi, nɛnîi ŋɔwála-wâlai fe gbîŋ-kponoi mɛi, kɛ́lɛ, ŋɔsurɔ̂ŋ ŋɔwála-walai káa mɛi. Bere nɔ́ ƃe ŋɔsurɔ̂ŋ ǹyaŋ ŋɔwála-wâlai fe la gbîŋ kponoi mɛi, kɛ́lɛ, ŋɔnɛnîi ƃe ŋɔwála-walai káa mɛi.

⁵ Ka kánɛni-ŋai ká kɛ́ tîi kákîe-ni dîa kápɛrɛ-ŋai mu. Fɛ̂ɛ nɔ́ tãi da, à kɛ̀ a kákpɛtɛ-woo a gɛ́ɛ tãi kpua é lɔ́ káloai, ka kɛ́ Ɣâla-fɛliɛ su a maa-tãi ti. Kɛ́lɛ, tãi kpuai tí à tɛ̀ɛ, ka pá ŋɔnɔ pôlu kákîe ma. A wàla kɛ́ tí gɛ̀ ní lii-kpele fé pâi kɛ̂i káyêei, gɛ̀ ní Sêtɔŋ a pâi su-kɔ́ɔ̂ŋ tɛɛ̂i ká pɔ́ ká wulu-wulu kɛ́.

⁶ Ŋa nyíŋi ƃôi nɔ́ ŋákili-ŋa-siai su, kɛ́lɛ, vé a tɔ̂ŋ ŋá dɛ̀ɛ kápɔ.

⁷ Kài kɛ̀ yɛ̂ɛ ńyãa. Kɛ́lɛ, núu kélee a sama-sɛŋ sii tɛi-tɛi sɔlɔ ƃô Ɣâla yêei, núu da ŋɔ̂i káa a da kpɛni m̀arâŋ-nuu ŋɔ̂i kɛ́ ƃo a da kpɛni.

⁸ À kɛ̀ a goyaŋ-nɛyaai da bɔɔ-nɛyaai ŋa mò a gɛ́ɛ ǹɛ́lɛɛ̂i dí lɛ́ɛ nɔ́ yɛ̂ɛ berei ŋ́gaa lai.

⁹ Kɛ́lɛ, à kɛ̀ lii-kpele fé díyêei, fɛ̂ɛ nɔ́ dí surɔ̂ŋ kula da nɛnî. Kpɛ́ni fêi, ǹɛ́lɛɛ̂i a gɛ́ɛ surɔ̂ŋ é nɛnî kula, kpaa máŋ nɛnî é surɔ̂ŋ kula, é tɛ́ɛ la nɛnî kélee wɛli kɛ́ɛ la maa surɔ̂ŋ ma, kpaa máŋ surɔ̂ŋ kélee wɛli kɛ́ɛ la maa nɛnî ma.

¹⁰ Diai dífe a goyaŋ, ŋa m̀ôi dîa, ńyãa fei, kɛ́lɛ, Kúnuu-namui ƃe m̀ôi a gɛ́ɛ nɛnî fé ŋɔsurɔ̂ŋ lɛ̂ɛ.

¹¹ Kɛ́lɛ à kɛ̀ nɛnî à ŋɔsurɔ̂ŋ lɛ̀ɛ, ǹɛ́lɛɛ̂i nɔ́ é lɛ́ɛ a gɔyaŋ. A wàla kɛ́ tí é pá pôlu da ŋɔsurɔ̂ŋ dí díloai kpɛtɛ. Ŋa m̀ôi ŋɔ́nɔ a gɛ́ɛ surɔ̂ŋ fé ŋɔnɛnîi lɛ̂ɛ.

¹² Ŋa m̀ôi ǹúu kpeli-ŋai dîa, Kúnuu-namui fei, a gɛ́ɛ à kɛ̀ nɛnî káa kúƃarâai da yêei nyíi vé a laa-la-nuui, ǹyaŋ a ŋ̀wɛ̂lii da ǹyaa dí tûa, vé ǹɛɛ.

¹³ A kɛ̀ surɔ̂ŋ à kɛ̀ nɛnî yêei nyíi vé a laa-la-nuui, ǹyaŋ a ŋ̀wɛ̂lii da nɛnîi dí tua, nɛnîi fé ǹɛɛ.

¹⁴ Kpɛ́ni fêi, zurɔ̂ŋ nyíi laa-la fé ǹyêei a maa-waa-laa sɔlɔ ƃô nɛnîi sarâi. Ǹɛnîi ǹyaŋ laa-la fé ǹyêei a maa-waa-laa sɔlɔ ƃô ŋɔsurɔ̂ŋ sarâi. À wàla kɛ́ ti, kánîa-pɛlɛɛi maa fé pâi waâi, kɛ́lɛ, yɛ̂ɛ berei gáa lai, dímaa waâi.

¹⁵ Kɛ́lɛ, à kɛ̀ ǹúui nyíi laa-la fé ǹyêei é gbɛtɛ gíli ŋá a gɛ́ɛ dí táa, tɔɔ dí táa. Bere sii ti su, kúƃarâŋ-nuui tí, é máŋ kɛ́ a nɛnî kpaa surɔ̂ŋ, zɔŋ fé zu. Kpɛ́ni fêi, Ɣâla a kútoli lii-sêe ma.

¹⁶ Nɛnî, í gɔ́lɔŋ léŋ a gɛ́ɛ ya pâi ísurɔ̂ŋ ƃálôi? Surɔ̂ŋ, í gɔ́lɔŋ léŋ a gɛ́ɛ ya pâi ínɛnîi ƃálôi?

Ka tûa yɛ̂ɛ berei Ɣâla è ká tòli lai

¹⁷ Kɛ́lɛ, tɔɔ nɔ́ núu kélee e vulu-laai kɛ́ Kúnuu-namui e dɛ̀ɛ bɔi, vulu-laai nyíi Ɣâla e dòli mai. Ŋátɔ̂ŋ ká ŋí Kôrai-toli-kpɔŋ kélee su.

¹⁸ Diai kélee Ɣâla è dítòlii, da-ni dí kɛ̀ a díseɛɛ kpono mɛi? À kɛ̀ tí, gɛ̀ ní, tɔɔ maa-nuui tí fé ǹyée kúla ŋɔsee-kpono mɛi laai mû. Diai kélee Ɣâla è dítòlii, da-ni dífe kɛ́ ní a díseɛɛ kpono mɛi? À kɛ̀ tíi, gɛ̀ ní maa-nuui tí fé ǹyée see ní see-kpono mɛi mɛni mu.

¹⁹ Kpɛ́ni fêi, núu kɛ́ɛ a zeɛɛ kpono mɛi, kpaa máŋ, núu kɛ́ɛ vé see ní kpono mɛi fé a mɛni da, kɛ́lɛ, fɛ̂ɛ é Ɣâla ŋɔtɔ̂ŋ-ŋai mɛi káa.

²⁰ Fɛ̂ɛ núu kélee é lɛ́ɛ nɔ́ a berei è kɛ̀ la Ɣâla é dólii.

²¹ Í kɛ̀ a luɛ dílɛɛ pâi ítolîi? Ílii fe sɛ̀lɛŋ. Kɛ́lɛ, à kɛ̀ pere káa íyeêi a gɛ́ɛ íŋuŋ ma-ƃoi sɔlɔ ƃó, gɛ̀ ní, kɔ a maa-perei ti.

²² Kpɛ́ni fêi, ǹúui dí dòli Kúnuu-namui kponôi yɛ̂ɛ luɛi, gáa a Kúnuu-namui ŋɔŋuŋ-ma-ƃo. Bere nɔ́ ƃe è kɛ̀ la a ǹúui kɛ̀ a ŋuŋ ma ƃóɔ tãi dí dòli lai, gáa a Kôrai ŋɔluɛ.

²³ Dí káyà a kásɔ̃ɔ. Káfè kɛ̀ a núu-kpune ŋɔluɛ-ŋa.

²⁴ Mɛni ma ŋánûa, berei nɔ́ núu kélee è kɛ̀ la díkɛ dòlii, tɔɔ nɔ́ da Ɣâla dí lɛ́ɛ tí.

M̀are-kɛ̂ɛi bîlaŋɔɔi gɔyaŋ-ŋai da bɔɔ-nɛyaai diai

²⁵ Káai a gɔyaŋ-ŋai, mɛni da fe ńa ŋá m̀ó káa é kúla Kúnuu-namui lá, kɛ́lɛ, ŋa ŋ́gbîŋ tarei lɛ̂i káa yɛ̂ɛ ǹúui zã́âi Kúnuu-namui ŋɔmaloŋ-kaai sui.

²⁶ Ŋa gɔ́lɔŋ berei tãi ŋí su mɛni kpɔ̂lu-ŋai díkaa lai. M̀aa nɛ̃ɛ̂i núu kélee é lɛ́ɛ nɔ́ yɛ̂ɛ berei gáa lai.

²⁷ Nɛnî káa íyeêi? À kɛ̀ tí, gɛ̀ ní káfè kùla kákîe ma. Nɛnî fé íyeêi? À kɛ̀ tí, gɛ̀ ní ífe nɛnî kùla.

²⁸ Kɛ́lɛ, à kɛ̀ yà nɛnî kùla, ífe sɔnyɔ̂ŋ kɛ́ ni. À kɛ̀ ǹyaŋ nɛnî à surɔ̂ŋ kùla, ve sɔnyɔ̂ŋ kɛ́ ni. É máŋ kɛ́ tí, diai díkîe-ni kulâi, da pâi kɛ̂i ŋ̀éniɛi ŋí su mɛni-kpɔ̂lui su, ǹyaŋ ḿve ŋ̀wɛ̂lii ka kɛ́ zu.

²⁹ Zu kulâi ƃa, ŋánûa, tãi dí nɛ̀i, zu a nâa kpua. É síɣe tãi ŋí ma é lí tuɛ-pere, diai nɛnî káa díyêei, tɔɔ dí díɣeniɛi kɛ́ yɛ̂ɛ nya ƃe nɛnî fé díyêei.

³⁰ Diai wɔlɔ̂i, tɔɔ dí kɛ́ yɛ̂ɛ diai dífe wɔ́lɔ̂i. Diai lii-nɛ̃ɛ kulâi, dí kɛ́ yɛ̂ɛ diai dífe lii-nɛ̃ɛ kulâi, diai sãâ yâi, dí kɛ́ yɛ̂ɛ diai sãâ fé díyêei.

³¹ Diai tíi kɛ̂i a ŋ̀éniɛi su-sãai kéleei, tɔɔ dí kɛ́ yɛ̂ɛ diai dífe tíi kɛ̂i a ŋ̀éniɛi su-sãai. Kpɛ́ni fêi, ŋ̀éniɛi ŋí kpɛtɛ-perei káa tɛɛ̂i.

³² Ŋa ŋ̀wɛ̂lii lii-sɛlɛŋ kélee da fé kɛ́ kâa. Goyaŋ-surɔŋ, é kɛ́ a gbáaŋɔɔ a Kúnuu-namui ŋɔmɛni-ŋai kélee, da berei a pɔ̂ri Kúnuu-namui líi lâai lai.

³³ Kɛ́lɛ, zurɔ̂ŋ nyii nɛnî káa ǹyêei, gbáaŋɔɔ̂i a ŋ̀éniɛi su-sãai, da berei a pɔ̂ri ŋɔnɛnîi líi lâai lai.

³⁴ Ŋɔkili-tɔɔ-maai ŋáa kɔlɛɛ̂i. Goyaŋ-nɛni, kpaa máŋ nɛnî-kpela kpáaŋɔɔ̂i a Kúnuu-namui ŋɔmɛni-ŋai, da berei a pɔ̂ri kɛ̂i la a gbono da ŋɔmɔleŋ maa-waai. Kɛ́lɛ, nɛnîi nyíi surɔ̂ŋ káa ǹyêei, gbáaŋɔɔ̂i a ŋ̀éniɛi su-sãa, da berei a pɔ̂ri ŋɔsurɔ̂ŋ líi lâai lai.

³⁵ Ŋa nyíŋi ƃôi nɔ́ kákpɔŋ-mâai mɛni ma. Fé môi a gɛ́ɛ ŋá mɛni-kpanaŋ láa káyêei. Kɛ́lɛ, m̀ɛnii nyíi zã́âi, nya ƃe ŋa môi kâa, a gɛ́ɛ káfe kákili-tɔɔ-maai ŋáa kɔlɛ Kúnuu-namui ŋɔtíi su.

³⁶ À kɛ̀ surɔ̂ŋ da káa nɛnî wɛli kɛ̂i, ǹyaŋ è gɔ́lɔŋ a gɛ́ɛ dûa-pere fé sãa ní é pîlaŋ nɛnîi tí ma, à kɛ̀ a ŋ̀wɛ̂lii é gula a maa félaa, à kɛ̀ ǹyaŋ gáa a sɛŋ fɛ̂ɛ é gula, tɔɔ é gɛ́ yɛ̂ɛ berei a ŋ̀wɛ̂lii lai. Ve sɔnyɔ̂ŋ kɛ́ ni. Tɔɔ dí díkîe kula.

³⁷ Kɛ́lɛ, à kɛ̀ surɔ̂ŋ da káa nɛnî wɛ́li kɛ̂i, ǹíi kpeleɛ, ve kpaaŋ ní a gɛ́ɛ é nɛnîi kpîŋ kúla, ǹyaŋ à gbɛ̀tɛ gíli ŋá a gɛ́ɛ da ǹyaa dífe díkîe kula, gɛ̀ ní a mɛni lɛ́lɛɛ kɛ̀.

³⁸ Mɛni ma ǹúui à nɛnî wɛ́li kɛ̀ é gula a nɛnîi, a mɛni lɛ́lɛɛ kɛ́. Ǹúui nyíi a nɛnî wɛ́li kɛ̀ va gulâi, a mɛni lɛ́lɛɛ kɛ́ é tɛ́ɛ m̀arâŋ-nuui ma.

³⁹ Nɛnî káa nɔ́ ŋɔsurɔ̂ŋ mɛni ma tãi nɔ́ gáa la ɣele mai. À kɛ̀ ŋɔsurɔ̂ŋ à sàa, gɛ̀ ní ŋuŋ ma ƃóɔi a gɛ́ɛ surɔ̂ŋ nyíi kélee a ŋ̀wɛ̂lii é gula, à kɛ̀ nɔ́ maa-surɔŋ káa a Kôrai-nuu.

⁴⁰ Kɛ́lɛ, ŋákili-ŋa-siai su, à kɛ̀ à lɛ̀ɛ a pɔɔ-nɛnî lii-laa a pâi kɛ̂i ǹyêei. Ǹyaŋ ŋa gɔ́lɔŋ a gɛ́ɛ Ɣâla Ŋɔmɔleŋ káa ŋ́gbonôi.