Kɔleŋtiɛŋ Maa-ŋuŋ 6 - Ŋ̀âla Kɔlɔ Maa Waai

Mɛni-saa ƃóɔɔ diai dífe láa ní a Ɣâlai ŋɛ́i-tuɛ

¹ À kɛ̀ sɔŋ pu-maa káa kála kákîe-ni mɛni ma, ka pɔ̂ri liî kôtii diai dífe a tɔ̃yâ-ƃelai díŋɛi é tɛ́ɛ la kaliɛɛ ma Ŋ̀âla-ƃelai pɔ?

² Káfe gɔ́lɔŋ a gɛ́ɛ Ŋ̀âla-ƃelai da pâi ŋ̀éniɛi ŋɔmɛnii ŋá teêi? À kɛ̀ ka pâi ŋ̀éniɛi ŋɔmɛnii ŋá teêi, pɔ̂ri fé pâi kɛ̂i kâa a gɛ́ɛ ka m̀ɛni fii-kpɛɛ-ŋai kélee ŋá tee.

³ Káfe gɔ́lɔŋ a gɛ́ɛ kwa pâi Ŋ̀âla-taa-kela-ŋai dímɛnii ŋá teêi? À kɛ̀ ti gɛ̀ ní, kwa pâi máŋ ŋ̀éniɛi ŋí su mɛni-ŋai ŋá teêi a gbanaŋɔɔ e tɛɛ nyíti ma!

⁴ A kɛ̀ mɛni kɛɛ-ŋai tí da kɛ̀ káyêei, fɛ̂ɛ ká dílaa diai ŋɛ́i dítɔɔ̂i fé ma Kôrai-toli-kpɔŋ su lé mɛni ma?

⁵ Ŋa nyíŋi ƃôi nɔ́ káŋumɛ mɛni ma. A pɔ̂ri kɛ̂i a sɛŋ a gɛ́ɛ táre-nuu kélee fé kásama a gɛ́ɛ é mɛni ŋá tée kákîe-ni loai káai kákaa a Ŋ̀âla-ƃelai,

⁶ kɛ́lɛ, fɛ̂ɛ Ɣâla-nuu é lí a m̀arâŋ Ɣala-nuu kɔlɔ síɣe diai dífe a laa-la ƃelai dîa?

⁷ Kákîe-ni kɔlɔ siɣeɛ káa nɔ́ a kalaŋɔɔ. Núu à lɛ́ɛ-mɛni ƃò a kálaa káfa káyee sèe mu lé mɛni ma? Lé ƃe káfa ǹɛɛ naa dí káwôyai?

⁸ Kɛ́lɛ, káa kpîŋ ka lɛ́ɛ-mɛni ƃò a nûa láa kakɛ wôya kɛ̀ a dia, kakɛ máŋ gɛ a káa kpîŋ káƃarâa.

⁹ Káfe gɔ́lɔŋ a gɛ́ɛ diai dífe a tɔ̃yâ-ƃelai Ŋ̀âla-taa kaloŋ-laai fé pâi kɛ̂i a dípɔɔ? Káfe kákpîŋ pɛ̀lɛ. Goyaŋ-wulu-wulu kɛ-ƃela, kpaa máŋ ɣâla-pɔkɔɔŋ fɛli-ƃela, kpaa máŋ wulu-wulu kɛ-ƃela, kpaa máŋ zinâai da díkîe-ni kɛ̀ a dínɛyaai,

¹⁰ kpaa máŋ ŋuma-ƃela, kpaa máŋ sɛŋ wɛli-ƃela, kpaa máŋ lɔɔ kpele-ƃela, kpaa máŋ diai da lôno núu mai, kpaa máŋ sɛŋ kula-yeei kɛ-ƃela, Ɣâla ŋɔkâloŋ-laai fé pâi kɛ̂i a dípɔɔ.

¹¹ Ǹyaŋ bere ƃe kata-ni ká kɛ̀ la. Kɛ́lɛ, dí kámaa waa, dí kálɛ, dí kákɛ a tɔ̃yâ-ƃela Kúnuu-namui Zîsɛ Kôrai láai su da Kúɣâlai Ŋɔmɔ̂leŋ.

Ka Ɣâla ŋɔfólo-laai maa tɛ́ kákponôi

¹² “Ŋa pɔ̂ri mɛni kélee kɛ̂i.” Kɛ́lɛ, mɛni kélee fé kpɔŋ-mâa káa zu. “Ŋa pɔ̂ri mɛni kélee kɛ̂i.” Kɛ́lɛ, fa pɔ̂ri ŋ́gbîŋ kɛ̂i a luɛ mɛni da kélee mu.

¹³ “Mii-sɛŋ káa núu koi mɛni ma, núu koi kɛ́ ƃo mii-sɛŋ mɛni ma.” Ǹyaŋ Ɣâla a pâi dífeerɛ dísu karâi. Núu kpono fe wulu-wulu kɛ́-mɛni ma, kɛ́lɛ, gáa Kúnuu-namui mɛni ma, ǹyaŋ Kúnuu-namui kɛ́ ƃo núu kpono mɛni ma.

¹⁴ Ɣâla e Kúnuu-namui mu siɣe saa yêei, ǹyaŋ a pâi kúmu siɣêi máŋ saa yêei a ŋɔwála-walai.

¹⁵ Káfe gɔ́lɔŋ a gɛ́ɛ kákpono-ŋai díkaa a Kôrai woŋo-ŋa? Mɛni ma ŋa pâi Kôrai ŋoŋo-ŋai siɣêi ŋá díkɛ a nɛnîi a gbîŋ tɛ̀ɛ sinâa pɔ sɛŋ-kao mɛni mai woŋo-ŋa? Ve ti a dɔnɔ kpîŋ!

¹⁶ Káfe gɔ́lɔŋ a gɛ́ɛ ǹúui a kânaŋ nɛnîi ma nyíi a gbîŋ tɛ̀ɛ sinâa pɔ sɛŋ-kao mɛni mai da ǹyaa da kɛ̂ a kpono tɔnɔ? Kpɛ́ni fêi, bere ƃe bɔ̃yɛɛ̂i la, “Dífeerɛ-ŋɔɔ da pâi kɛ̂i a kpono tɔnɔ.”

¹⁷ Kɛ́lɛ, ǹúui da Kúnuu-namui díkaa zu tɔnɔɔi da ǹyaa díkaa M̀ɔlêŋ tɔnɔi su.

¹⁸ Káfe káyee pìli wulu-wulu kɛ́ɛ su. Sɔnyɔ̂ŋ da kpɛni kélee núu a gɛ̀i, gáa kpono ŋíni ŋa-pere; kɛ́lɛ, wulu-wulu kɛ-nuu a sɔnyɔ̂ŋ kɛ̀ a gbîŋ kpono.

¹⁹ Káfe gɔ́lɔŋ a gɛ́ɛ kákponôi káa a Ɣâla-pɛrɛ M̀ɔlêŋ Maa Waai mɛni ma kákponôi, nyíi ka zɔlɔ ƃô Ɣâla yêei? Kápɔɔ fa kákpîŋ.

²⁰ Dí káyà a kásɔ̃ɔ. Mɛni ma ka pá a folo-laa Ɣâla pɔ