Kɔleŋtiɛŋ Maa-ŋuŋ 4 - Ŋ̀âla Kɔlɔ Maa Waai

Zia-ƃelai dítii

¹ Tɔɔ núu e gíli ŋá sía é pîlaŋ kûa yɛ̂ɛ Kôrai yée-mu-ƃela da Ɣâla ŋɔkili-ŋa-tɛi mɛni-ŋai mɛi-ƃela.

² Bere sii ŋí su, fɛ̂ɛ sɛŋ mɛi-ƃela dí kɛ́ a dísã́a.

³ Kɛ́lɛ, mɛni a kpera mâ gáa a mɛni-loŋ kuro-te a gɛ́ɛ ka ŋámɛni ŋá tée, kpaa máŋ mɛni ƃo-kêre mu-ƃela kélee. Fa ŋ́gbîŋ maa-mɛni ŋá tèe máŋ.

⁴ Kpɛ́ni fêi, fé mɛni da kélee kɔlɔŋ é pîlaŋ ŋ́gbîŋ ma. Kɛ́lɛ, zu-kulai fa a gɛ́ɛ ḿaa waâi, kɛ́lɛ, ǹúui a ḿaa-mɛni ŋa tèei, ǹyaa ƃa Kúnuu-namui.

⁵ Mɛni ma káfe mɛni ŋá tèe tãi tuɛ, é lɛ́ɛ zu Kúnuu-namui é pá. A pâi pâi a gbínii ŋɔloo-sãai fíeŋ ŋá e núu-kpune líi su mɛni ƃó. À kɛ̀ tí, gɛ̀ ní, núu kélee a pâi Ɣâla ŋɔlaa-maa-tɛi sɔlɔ ƃôi.

⁶ Ŋánûa, ŋa nyíŋi kélee pɔ̃yɛ é pîlaŋ ńyãa kpîŋ ma da Apolo kámɛni ma, a gɛ́ɛ ka mɛni-ŋai kélee maa kɔri kúsarâi nyíi-ŋa bɔ̃yɛɛ̂i, ka maa-tua kɛ́ a gɛ́ɛ kátɔnɔ kpîŋ káfe yoŋka tee a gɛ́ɛ kákaa a núu da-ni pɔ́ɔ ka tɔ́ɔ da-ni dîa.

⁷ Kpɛ́ni fêi, gbɛ̂ɛ ƃa mɛni da kàa íkponôi a dee núu da kpɛni ma? Lé sɛŋ ƃe gáa íyeêi ífe zɔlɔ ƃo nii? À kɛ̀ ǹyaŋ í zɔlɔ ƃo, íkaa yoŋka teêi lé mɛni ma yɛ̂ɛ nya ƃe vé kɛ́ ní a sama-sɛŋ?

⁸ Ka gâai kâa kálii a nâa láa! Ka gâai kâa ka nâa tɔɔ! Ka gâai kâa kákaa nâa a kâloŋ kúŋɛi pôlu! Kâi kɛ̀ a kâloŋ a gɛ́ɛ kwa kâa-ni kú gâloŋ-laai kɛ́ gîe ma!

⁹ Kpɛ́ni fêi, gáa ŋ́gili ŋá a gɛ́ɛ kúai kúkaa a zia-ƃelai Ɣâla a kúlɛ a núu doo-mu-ŋa yɛ̂ɛ nûa ƃe dí dímɛnii ŋá tèe a gɛ́ɛ dí sáa; kpɛ́ni fêi, kwa kɛ́ nɔ́ a lɛ-sɛŋ ŋ̀éniɛi ŋí su Ŋ̀âla-taa-kela-ŋai dîa da núu-kpune.

¹⁰ Kúkaa a ƃoo-ƃela Kôrai mɛni ma, kɛ́lɛ, kákaa a táre-ƃela Kôrai kponôi. Kúfii kpɛɛ̂i, kɛ́lɛ, kasu kpanaŋɔɔi. Da ƃâa kɛ̀ kâa, kɛ́lɛ, da díŋɛi naɣîŋ kúmɛi.

¹¹ É síɣe tãi ŋí ma puru káa kúkɛ̂i kpele wɛli kɛ́ kúkɛ̀, kúmaa sáa, díkɛ kútuaŋ-tuaŋ, kúkɛ̂i fé ma.

¹² Kwa kôlo, kúkɛ tíi kɛ̀ a kúkpîŋ yée. Núu à lòno kûa, kú lûwa too ma. Núu a kúkpɔara, kú kúlii kpéle.

¹³ Núu à kúlaa kàra, kú kɔ́ a gɛ́ɛ lii-sêe é kɛ́ kúloai kwa dîa-ni. É síɣe tãi ŋí ma kúkaa yɛ̂ɛ ŋ̀éniɛi ŋɔkala. Kúkaa a sɛŋ kélee maa-pɔrɔ.

¹⁴ Fé nyíŋi pɔ̃yɛɛ̂i a gɛ́ɛ ŋa káŋumɛ, kɛ́lɛ, ŋa bɔ̃̀yɛ a gɛ́ɛ ŋa kalia-woo ƃô yɛ̂ɛ ŋáwɛli-kɛ-maa nia-pɛlɛɛ.

¹⁵ Kpɛ́ni fêi, berei máŋ sɛŋ-lɛ-ƃela wála támaa káa la káyêei Kôrai kponôi, kánâŋ-ni dífe tama ni. Kpɛ́ni fêi, ŋá kɛ̀ a kánâŋ Zîsɛ Kôrai kponôi Duŋ Lɛ́lɛɛi sarâi.

¹⁶ Gɛ̀ ní, ŋa kalia-woo ƃôi, ká kɛ́ a ḿbɔkɔɔŋ-ƃela.

¹⁷ Mɛni ma ŋa Temete tɛɛ̂i kápɔ naa, nyíi gáa a ŋáwɛli-kɛ-maa loŋ sãa Kúnuu-namui kponôi, a gɛ́ɛ ńdûa-perei gáa Kôrai kponôi é maa mɛni too kákili ŋá, yɛ̂ɛ berei ŋa sɛŋ lɛ́ la dîa kwaa kélee ma Kôrai-toli-kpɔŋ kélee sui.

¹⁸ Kata-ni yoŋkai yɛ̂ɛ nyaa ƃe fé kɛ́ ní pâi kápɔ.

¹⁹ Kɛ́lɛ, à kɛ̀ Kúnuu-namui à fàa ma, ŋa pâi pâi kápɔ a maa félaa. Ḿve pâi ǹyoŋka-ƃelai ŋí dílono-ŋai mɛni ma, kɛ́lɛ, ŋa pâi gâai berei wála-wala káa la díyêei.

²⁰ Kpɛ́ni fêi, Ɣâla ŋɔkâloŋ-laai kɔ́ɔ fé tɔɔ̂ni lóno ma, kɛ́lɛ, gɔ́ɔ tɔɔ̂i wála-wala ma.

²¹ Lé ƃe ka ŋ̀wɛ̂lii? Ŋá pá kápɔ a fáa, kpaa ŋá pá kápɔ a wɛli-kɛ-maa sɔŋ lɛ́lɛ-pere su?