Kɔleŋtiɛŋ Maa-ŋuŋ 2 - Ŋ̀âla Kɔlɔ Maa Waai

Pɔ̂ɔ è Kôrai kpamo-mɛnii ƃô

¹ Ŋánûa, tãi ŋá pà la kápɔi, fé pá ní kápɔ a gɛ́ɛ ŋa Ɣâla ŋɔsêre-faai kɛ́ kâa a wóo kpaya-kpaya da táre-woo.

² Kpɛ́ni fêi, ŋa gbɛ̀tɛ ŋ́gili ŋá a gɛ́ɛ fé mɛni da kɔlɔŋ kásama é kúla Zîsɛ Kôrai pôlu da kpamo-mɛnii.

³ Ŋá kɛ̀ kásama a fii-kpɛɛ da yao kɛ́tɛ e pɛlɛ kpɛ̃lîŋ ma.

⁴ Ńono-woo da m̀ɛnii ŋá kɛ̀ m̀ôi dífe kɛ́ ni nɔ́ a la-nɛ̃ɛ maa-tare woo-ŋa, kɛ́lɛ, dí kɛ̀ a M̀ɔlêŋ ŋɔmɛni-ŋa-lɛɛ da ŋɔwála-walai,

⁵ a gɛ́ɛ kálaa-lai fè kɛ̀ núu-kpune ŋɔtáre ma, kɛ́lɛ, é kɛ́ Ɣâla ŋɔwála-walai su.

Ɣâla è Ŋɔmɔ̂leŋ lɛ̀

⁶ É máŋ kɛ́ tí, à kɛ̀ a kúai kúƃɔlɔ̂i M̀ɔlêŋ kponôi ku sama, kwa tare-woo-ŋa ƃo, berei máŋ vé la a ŋ̀éniɛi ŋí su tare-woo-ŋa, kpaa máŋ ŋ̀éniɛi ŋí su mɛi-ƃelai dítare-woo-ŋai, nyíi-ŋai gáa a sɛŋ fɛ̂ɛ dí sáai.

⁷ Kɛ́lɛ, kwa Ɣâla ŋɔtáre loo-mɛni-ŋai lɛ̀, nyíi Ɣâla è gbɛ̀tɛ nàa tuɛ ŋ̀éniɛi ŋí kɔ́ɔ é lɛ́ɛ pâi pîlanii kúfolo-laai mɛni mai.

⁸ Ŋ̀éniɛi ŋí su nuu mɛi-ƃelai dɔnɔ kpîŋ fé táre ní mɛnii ŋí su. Kpɛ́ni fêi, eêi kɛ̀ dîi táre zu, dîi fei Kúfolo laa-nuu-namui kpamôi wúru su-tíyeŋɔɔ ma.

⁹ Kpɛ́ni fêi, yɛ̂ɛ berei bɔ̃yɛɛ̂i lai, “M̀ɛnii nuu ŋɛ́i fé niî gáa niî, kpaa máŋ núu wóli fé niî mɛni níi, kpaa máŋ vé niî lɔ́ ní núu líi sui, m̀ɛnii Ɣâla a gbɛtɛ diai dí ŋ̀wɛ́li níi dímɛni mai.”

¹⁰ Ɣâla a gélee lɛ́ kûa M̀ɔlêŋ sârai. Kpɛ́ni fêi, M̀ɔlêŋ a sɛŋ kélee kɔ̀ri é tóo máŋ Ɣâla ŋɔtárei kpóŋ seêi ma.

¹¹ Kpɛ́ni fêi, gbɛ̂ɛ ƃe m̀arâŋ-nuu ŋɔkili-ŋa-siai kɔ́lɔŋ é kúla maa-nuui tí kpîŋ ŋɔmɔ̂leŋ pôlu nyíi gáa gbonôi? Bere nɔ́ ƃe máŋ núu fa târe la Ɣâla ŋɔkili-ŋa-siai su fɛ̂ɛ Ɣâla Ŋɔmɔ̂leŋ.

¹² Kúfe niî ŋ̀éniɛi ŋí su tua-perei sɔlɔ ƃo ni, kɛ́lɛ, kwa M̀ɔlêŋ sɔlɔ ƃo nyíi kùla Ɣâla yêei a gɛ́ɛ ku táre zama-sɛŋ maa-mɛnii su Ɣâla e dɛ̀ɛ kúpɔi.

¹³ Kúfa nyíŋi lɛ̀ wóo-ŋa su nyíi núu-kpune ŋɔtárei è nɛ̀ kûai, kɛ́lɛ, kwa nɛ̀ wóo-ŋa su nyíi M̀ɔlêŋ è nɛ̀ kûai, kú Ɣâla ŋɔtɔ̃yâ-ŋai ŋá lɛ́ diai dîa M̀ɔlêŋ káa díkponôi.

¹⁴ Núu-kpune tua-perei a gɛ̀ va Ɣâla Ŋɔmɔ̂leŋ ŋɔsama-sãai sɔlɔ ƃo, kpɛ́ni fêi, díkaa nɔ́ ŋ̀ɛi a ƃoo-sãa, va târe dímaa-mɛni su, kpɛ́ni fêi, núu a târe dímaa-mɛni su M̀ɔlêŋ sârai.

¹⁵ Ǹúui M̀ɔlêŋ káa gbonôi, a mɛni kélee ŋá tèe, kɛ́lɛ, núu fa ŋɔmɛni ŋá tèe.

¹⁶ “Kpɛ́ni fêi, gbɛ̂ɛ ƃe Kúnuu-namui kíli ŋá mɛni kɔ́lɔŋ a gɛ́ɛ é mɛni lɛ́ mà?” Kɛ́lɛ, Kôrai ŋɔkili-ŋa-siai káa kúyêei.