Kɔleŋtiɛŋ Maa-ŋuŋ 16 - Ŋ̀âla Kɔlɔ Maa Waai

Dí sɛŋ-kao ŋá tɛ̀ ma Ŋ̀âla-ƃelai mɛni ma

¹ Ŋa pá nâa lônoi é pîlaŋ sɛŋ-kao tɛɛ mɛni ma Ŋ̀âla-ƃelai pɔ. Yɛ̂ɛ berei ŋá mò la Galesia Kôrai-toli-kpɔŋ ŋai diai, káa máŋ ka gɛ́ ti.

² Lɔ́ɔ-kûu kélee su ŋele-kûu maa-ŋuŋ, zɛŋ núu kélee a zɔlɔ ƃôi, e da lâai kɛ́ yɛ̂ɛ berei a zɔlɔ ƃô lai, a gɛ́ɛ tãi ŋà pà lai, ve kɛ́ a sɛŋ ŋá kámarê kɛ́ sɛŋ-kao mɛni ma.

³ Ŋà pà, diai ká dílɛ̀i ŋa pâi kɔlɔ tɛɛ̂i dípɔ a gɛ́ɛ dí li a kásama-sɛŋ Zerusâlɛŋ.

⁴ A kɛ̀ gáa a sɛŋ fɛ̂ɛ ŋá lí máŋ, gɛ̀ ní kwa dîa-ni kwa pâi liî.

Pɔ̂ɔ è ŋɔsiai maa-mɛni kpɛ̀tɛ

⁵ Ŋa pâi kánaa kâai ŋá tɛ́ɛ a Masadonia-pere, kpɛ́ni fêi, ŋa gbɛ̀tɛ ŋ́gili ŋa a gɛ́ɛ ŋá tɛ́ɛ a naa-pere.

⁶ Ɣele da ŋa pâi lɛɛ̂i kápɔ naa, kpaa máŋ ŋa zamai tɛ́ɛ kákɔɔ mɛi a gɛ́ɛ ƃɛi kélee ŋa liî naai ká ńdɛɛ.

⁷ Kpɛ́ni fêi, fé ŋ̀wɛ̂lii ŋá kákaa nɔ́ sia-kɔɔ ŋá sîa su. Gáa ŋ́gili ŋá a gɛ́ɛ ŋá kɛ́ kákɔlɛ a tãi da, à kɛ̀ Kúnuu-namui à fàa ma.

⁸ Kɛ́lɛ, ŋa pâi lɛɛ̂i Ɛfesɛ Pɛŋtekɔ-ɣele é seri.

⁹ Kpɛ́ni fêi, tíi kpanaŋɔɔ kɛ́ɛ ŋɔkpôŋ lá a ƃó ḿberêi naa, ǹyaŋ kúkpɔara-ƃela támaa díkaa naa.

¹⁰ Temete à pà, ka gáa a gɛ́ɛ ve yao, é kɛ́ kásama, kpɛ́ni fêi, gáa Kúnuu-namui ŋɔtíi kɛ̂i yɛ̂ɛ ńyãa.

¹¹ Mɛni ma núu da fé ŋ̀ɛi naɣîŋ m̀ɛi. Ka dɛɛ lii-sêe su a gɛ́ɛ é pá pôlu ḿbɔ, kpɛ́ni fêi, ŋ́gaa berêi kâai da ḿarâai.

¹² À kɛ̀ a kúƃarâŋ Apolo, ŋa ǹia-woo ƃò kpɔ a gbanaŋɔɔ a gɛ́ɛ da kúƃarâai dí pá kánaa kâai kɛ́lɛ, ve kɛ́ ni a Ɣâla nia-mɛni a gɛ́ɛ é pá tãi ŋí su. A kɛ̀ à tãi kàa, a pâi pâi.

Ǹaa-ti-maai gbɛɛ ŋái

¹³ Ka kámɛi káa, ká tɔ́ɔ a gbanaŋɔɔ kálaa-lai su, lii-kpele é kɛ́ káyêei, kákponôi é kpanaŋ.

¹⁴ Mɛnii kélee ka gɛ̀i ka gɛ́ wɛli-kɛ-maa su.

¹⁵ Ŋánûa, ká gɔ́lɔŋ a gɛ́ɛ Tɛfɛnɛ ŋɔpɛ́rɛi mu-ƃelai kélee ƃé kɛ̀ a ǹûai maa-ŋuŋ dí dílii pene Ɛkeya-lɔii su, ǹyaŋ da díkpîŋ tɛɛ Ŋ̀âla-ƃelai dítii mɛni ma.

¹⁶ Ŋa kalia-woo ƃôi a gɛ́ɛ ka kɛ́ nûa sii-kɛɛ-ŋai tí mu da káƃarâa tii-kɛ-ƃela kpeli-ŋai.

¹⁷ Níi nɛ̃ɛ̂i a gɛ́ɛ Tɛfɛnɛ-ni dí pà da Fɔtunetɔ é pɛ́lɛ Akêiyikɔ ma, kpɛ́ni fêi, tãi káfe kɛ́ ni la ƃɛi dí kápɔɔ ŋá sìɣe.

¹⁸ Kpɛ́ni fêi, dí ŋámɔ̂leŋ ŋá nɛ̀nɛ yɛ̂ɛ káwɔ̂i máŋ. Ka ƃaa kɛ́-maa tɛ́ɛ ǹûa sii-ŋai tí pɔ́.

¹⁹ Kôrai-toli-kpɔŋ ŋai díkaa Eesia-lɔii sui, dí fàa kâa. Akoila da Purisela é pɛ́lɛ Kôrai-ƃelai dîa da kɔyaŋ dípɛrɛi mui, dí fàa kâa kpɔ́ a gbanaŋɔɔ Kúnuu-namui kponôi.

²⁰ Káƃarâai kélee dí fàa kâa. Ka kála tí kákîe-ni dîa a la-kpɔ see-maa maa waa.

²¹ Ńyãa Pɔ̂ɔ ŋa ǹaa-ti-maa kɔlɔi ŋí pɔ̃yɛ̂i a ŋ́gbîŋ yee.

²² Náɣâŋ é kɛ́ ǹúui ma wɛli-kɛ-maa fé ńyêei Kúnuu-namui mɛni mai. Kúnuu-namui, pá!

²³ Kúnuu-namui Zîsɛ ŋɔƃɛlɛ-sêei é kɛ́ kâa.

²⁴ Ŋáwɛli-kɛ-maai é kɛ́ kákelee kámɛni ma Zîsɛ Kôrai kponôi. É kɛ́ tí.