Kɔleŋtiɛŋ Maa-ŋuŋ 14 - Ŋ̀âla Kɔlɔ Maa Waai

Núu lónoɔɔ sîi-woo-ŋa su nyíi-ŋai núu da fa târe dísui

¹ Ka wɛli-kɛ-maa kɔ́ri. Ka M̀ɔlêŋ ŋɔsama-sãai wɛ́li a ŋ̀ánaa. Ŋuŋ ƃa zama-sɛŋ nyíi gáa a Ɣâla-woo ƃóɔɔi.

² Kpɛ́ni fêi, ǹúui a lôno a sîi-wooi nyíi núu fa târe zui, gɛ̀ ní maa-nuui fé lóno ní núu-kpune pɔ́, gáa lônoi Ɣâla pɔ́, kpɛ́ni fêi, núu fa târe ŋ̀óo su, kɛ́lɛ, a loo-mɛni-ŋa ƃò ŋɔmɔlêŋ su.

³ Ǹúui a Ɣâla-woo ƃôi, a lôno núu-kpune pɔ́ díkponôi-kpanaŋ mɛni ma da fɔlɔ-fɔlɔ é pɛ́lɛ ŋa-nɛnɛ ma.

⁴ Ǹúui nyíi a lôno a sii-wooi nyíi núu fa târe zui, gɛ̀ ní maa-nuui a mɛni lɛ́lɛɛ kɛ̂i gbîŋ mɛni ma, kɛ́lɛ, ǹúui nyíi a Ɣâla-woo ƃòi, a mɛni lɛ́lɛɛ kɛ̂i Kôrai-toli-kpɔŋ mɛni ma.

⁵ Ŋa ŋ̀wɛ̂lii a gɛ́ɛ kákelee ká lóno sii-woo-ŋa su nyíi-ŋai núu fa târe dísui, kɛ́lɛ, mɛni kpanaŋɔɔi ƃa ká Ɣâla-woo ƃóɔɔ. Ǹúui a Ɣâla-woo ƃòi gɛ́tɛi é tɛ́ɛ ǹúui ma a lôno sii-woo-ŋa su nyíi-ŋai núu fa târe dísui, fɛ̂ɛ núu da é dísu kula a gɛ́ɛ Kôrai-toli-kpɔŋ é mɛni lɛ́lɛɛ sɔlɔ ƃó dísarâi.

⁶ Ŋánûa, à kɛ̀ ŋà pà kápɔ ŋ́gɛ lono a sii-woo-ŋa nyíi-ŋai káfa târe dísui, lé ƃe ka pɔ̂ri gulâi zu, fɛ̂ɛ ŋá pá kápɔ a m̀ɛni-ŋai Ɣâla a ǹɛ́ ḿâi, kpaa táre, kpaa Ɣâla-woo ƃóɔɔ, kpaa máŋ sɛŋ lɛ́ɛ?

⁷ A kɛ̀ máŋ ɣale-sãa nyíi-ŋai dífulu fé dísui, ƃɔɔ kpaa máŋ kɔnîŋ díwoo fé lɛlɛ ní, gɛ̀ ní núu a pɔ̂ri ŋulei kɔ́lɔnîi leŋ díkaa doôi?

⁸ A kɛ̀ túru-fɛɛ-woo à kɛ̀ a nyɔ́mɔɔ, gbɛ̂ɛ ƃa gbîŋ kpɛ̀tɛ kɔ́ mɛni ma?

⁹ Bere nɔ́ ƃe gáa la a káa kpîŋ. A kɛ̀ kà lòno a sii-wooi nyíi núu fa târe zui, gɛ̀ ní núu a pâi m̀ɛnii kɔ́lɔnîi leŋ kákaa m̀ôi? Gɛ̀ ní kákaa nɔ́ lônoi káwoo kɛ̀ li vãai su.

¹⁰ Tɔ̃yâ ma sii-woo támaa káa ŋ̀éniɛi su, ǹyaŋ gélee su-kulâi káa m̀a.

¹¹ Kɛ́lɛ, à kɛ̀ fé zîi-wooi tí su-kulâi kɔ́lɔŋ, gɛ̀ ní kwa m̀ó-nuu kúkaa a kúkîe maa-wôya ƃela.

¹² Bere nɔ́ ƃe gáa la a káa kpîŋ. Tãi ka ŋ̀wɛ̂lii la kpɔ́ a gbanaŋɔɔ a gɛ́ɛ ka M̀ɔlêŋ ŋɔkili-ŋa-ponoɔi sɔlɔ ƃói, ka kɔ́ ká Kôrai-toli-kpɔŋ su kpanaŋ a ǹɛ́lɛɛ.

¹³ Mɛni ma ǹúui a lôno a sii-wooi nyíi núu fa târe zui, fɛ̂ɛ é Ɣâla fɛli wála-wala-laa mɛni ma a gɛ́ɛ é maa sii-wooi tí sú kula.

¹⁴ Kpɛ́ni fêi, à kɛ̀ ŋà Ɣâla fɛ̀li a sii-wooi nyíi núu fa târe zui, gɛ̀ ní ŋámɔlêŋ káa Ɣâla fɛlîi, kɛ́lɛ, ŋákili-ŋa-siai ƃá fé ŋ̀á.

¹⁵ Lé ƃe ŋa pɔ̂ri gɛ̂i? Ŋa pâi Ɣâla fɛlîi a ŋámɔlêŋ, ŋá Ɣâla fɛli a ŋákili-ŋa-siai máŋ. Ŋa pâi wule toôi a ŋámɔlêŋ, ŋá wule tóo a ŋákili-ŋa-siai máŋ.

¹⁶ A wàla kɛ́ tí, à kɛ̀ kà sɛɣɛi-fei tɛ̀ɛ Ɣâla pɔ a kámɔlêŋ, gɛ̀ ní a pɔ̂ri kɛ̂i leŋ ǹúui nyíi táre fé ǹyêei é kɛ́ kâa, “É kɛ́ tí” kásɛɣɛ̂i-fei mɛni ma, à kɛ̀ à wàla m̀ɛnii kɔ́lɔŋ kákaa m̀ôi?

¹⁷ Kpɛ́ni fêi, tãi da ka pɔ̂ri sɛɣɛi-fei tɛɛ̂i a ǹɛ́lɛɛ, kɛ́lɛ, káƃarâŋ-nuui fa mɛni lɛ́lɛɛ kùla zu.

¹⁸ Ŋa Ɣâla sɛɣɛ̂i fé a gɛ́ɛ pɔ̂ri káa mî ŋa sii-woo-ŋa ƃó é tɛ́ɛ káa nyíi-ŋai núu fa târe dísui.

¹⁹ Kɛ́lɛ, à kɛ̀ a Ŋ̀âla-pɛrɛi mu, ǹɛ́lɛɛ̂i ŋa wóo lɔ́ɔlu ƃó a ŋákili-ŋa-siai a gɛ́ɛ ŋa sɛŋ lɛ́ ḿarâai dîa é tɛ́ɛ la ńonoɔɔ ma sii-woo wála puu (10,000) su nyíi-ŋai dífa târe dísui.

²⁰ Ŋánûa, káfè kɛ̀ a nîa-pɛlɛɛ kákili-ŋa-siai su. Ka kɛ́ a kwâtara-ŋa mɛni nyɔ́mɔɔ kɛ́ɛ su, kɛ́lɛ, ka kɛ́ a núu kpaya-kpaya kákili-ŋa-siai su.

²¹ Bɔ̃yɛɛ̂i dɔ̂ŋ su, “Kúnuu-namui ǹyɛɛi, ŋa pâi lônoi ǹûai ŋí pɔ́ sii-woo da kpɛni ƃó-ƃela sarâi da ŋɔ̃yâ-ŋa, é máŋ kɛ́ tí dífe pâi díwoli tɔɔ̂i ḿâ.”

²² Mɛni ma, sii-wooi nyíi-ŋai núu fa târe dísui, dífe a ŋɛi-kɛ-maa laa-la-ƃela mɛni ma, kɛ́lɛ, díkaa a ŋɛi-kɛ-maa diai mɛni ma laa-la fé díyêei. Ɣâla-woo ƃóɔɔ fé diai mɛni ma laa-la fé díyêei, kɛ́lɛ, gáa laa-la-ƃela mɛni ma.

²³ Mɛni ma, à kɛ̀ Ŋ̀âla-pɛrɛ mu-ƃelai kélee da díŋa tɛ̀ ma díkelee dí lóno a sii woo-ŋa nyíi-ŋai núu fa târe dísui, diai dífa târe dísui da diai laa-la fé díyêei, da lɔ̀ dífe pâi m̀ôi a gɛ́ɛ káƃoɔɔ̂i?

²⁴ Kɛ́lɛ, a kɛ̀ kákelee ka Ɣâla-woo ƃò, gɛ̀ ní ǹúui laa-la fé ǹyêei, kpaa máŋ ǹúui táre fé ǹyêei, à lɔ̀, a pâi ŋɔsɔnyɔ̂ŋ kɔ́lɔnîi. Kákelee ka Ɣâla-woo ƃóɔɔi a pâi ŋɔmɛnii ŋá teêi.

²⁵ Gɛ̀ ní, ǹíi su loo mɛni-ŋai kélee da pâi kulâi. A kɛ̀ tí, gɛ̀ ní, a pâi pɛlɛ̂i ǹɔii mâ é Ɣâla fɛli é m̀o a gɛ́ɛ Ɣâla káa kásama a tɔ̃yâ.

Ɣâla-pɛrɛ mu tua-perei

²⁶ Lé ƃe ŋaŋ, ŋánûa? Kà pà kákîe ma, ǹúui da-ni wule káa díla, da-ni sɛŋ lɛ́ɛ kɛ́ ƃo díyêei, da-ni sii-woo da kpɛni ƃó pere kɛ́ ƃo díyêei nyíi núu fa târe zui, da-ni la-woo su-kulaa kɛ́ ƃo díyêei. Tɔɔ mɛni kélee é kɛ́ mɛni lɛ́lɛɛ mɛni ma.

²⁷ A kɛ̀ nûa díkaa kásama nyíi-ŋai da sii-woo da kpɛni-ŋa ƃò nyíi-ŋai núu fa târe dísui, tɔɔ dí kɛ́ nɔ́ feerɛ, kpaa máŋ tãi da saaƃa, dí lóno tɛi-tɛi núu da é díla-woo su kula.

²⁸ Kɛ́lɛ, a kɛ̀ núu lá-woo su kula-nuu fé naa, tɔɔ dí dímɛi sáa Ŋ̀âla-pɛrɛi mu dí lóno nɔ́ dí kpîŋ pɔ́ da Ɣâla.

²⁹ Tɔɔ Ɣâla ŋɔlóno kɛ́-ƃela feerɛ, kpaa máŋ saaƃa dí lóno nɔ́, ǹúu kpeli-ŋai dí díkili ŋá sía m̀ɛnii mâ díkaa m̀ôi.

³⁰ À kɛ̀ Ɣâla à mɛni da lɛ̀ diai seêni naa kɔlɛi da ma, à kɛ̀ maa-nuui a ŋ̀wɛ̂lii é ŋá lɛ́, tɔɔ Ŋ̀âla-woo ƃó-nuui é mɛi sáa.

³¹ Kpɛ́ni fêi, kákelee ka pɔ̂ri Ɣâla-woo ƃôi tɔnɔ́-tɔnɔ́ a gɛ́ɛ ǹúui kélee dí sɛŋ kɔ́lɔŋ, lii-kpele é kɛ́ ǹúui kélee yêei.

³² Ɣâla ŋɔlóno kɛ́-ƃelai dímɔlêŋ káa Ɣâla ŋɔlóno kɛ́-ƃelai yée-mu.

³³ Kpɛ́ni fêi, Ɣâla fé a yóo-yoo Ɣâla, kɛ́lɛ, gáa a lii-sêe Ɣala. Ŋ̀âla-ƃelai Díɣâla-pɛrɛ-ŋai kélee mu,

³⁴ fɛ́ɛ nɛnî-ŋai dí dímɛi sáa Ɣâla-pɔrɔŋ. Kpɛ́ni fêi, ve a sɛŋ a gɛ́ɛ dí lóno naa, kɛ́lɛ, fɛ́ɛ dí ƃaa-kɛ́-mâa tɛ́ɛ zinâai pɔ́, yɛ̂ɛ berei máŋ dɔ̂ŋ a mò lai.

³⁵ A kɛ̀ mɛni da káa naa da ŋ̀wɛ̂lii dí gɔ́lɔŋ, tɔɔ dí dísinâai marê kɛ́ dípɔ-taai, kpɛ́ni fêi, gáa a ŋumɛ mɛni a gɛ́ɛ nɛnî é lóno Ɣâla-pɛrɛ mu.

³⁶ Lé ƃe! Ɣâla ŋɔwóoi kɔ́ɔ pîlaŋɔɔ è kùla káyêei, kpaa káa tɔnɔ nɔ́ ƃe Ɣâla ŋɔwóoi a sèri kâa?

³⁷ A kɛ̀ gáa núu da kíli ŋá a gɛ́ɛ gáa a Ɣâla ŋɔlóno-kɛ-nuu, kpaa máŋ M̀ɔlêŋ ŋɔsama-sãai díkaa gbonôi, gɛ̀ ní, fɛ́ɛ é gɔ́lɔŋ a gɛ́ɛ m̀ɛnii ŋ́gaa bɔ̃yɛɛ̂i kápɔ-naai, gáa a Kúnuu-namui ŋɔtɔ̂ŋ.

³⁸ À kɛ̀ núu à wàla ŋ̀óli tɔɔ nyíŋi ma, gɛ̀ ní, m̀arâai dífe pâi díwoli tɔɔ̂i ma.

³⁹ Mɛni ma, ŋánûa, ka Ɣâla-woo ƃóɔɔ wɛli kpɔ́ a ŋ̀ánaa. Ǹyaŋ, zîi-wooi nyíi-ŋai núu fa târe dísui, káfe díƃoɔɔ kpèra.

⁴⁰ Kɛ́lɛ, fɛ̂ɛ m̀ɛnii kélee é kɛ́ a ǹɛ́lɛɛ gɛ ƃò a zã́a.