Kɔleŋtiɛŋ Maa-ŋuŋ 13 - Ŋ̀âla Kɔlɔ Maa Waai

Wɛli kɛ́-mâa

¹ A kɛ̀ máŋ ŋà lòno a núu-kpune da Ɣâla-taa kela-ŋa lá-sii woo-ŋa, ǹyaŋ wɛli-kɛ-maa fé ńyêei, gɛ̀ ní ŋ́gaa nɔ́ lônoi yɛ̂ɛ taya-saa ɣale-woo, kpaa máŋ kóno ɣale-woo.

² À kɛ̀ máŋ wála-wala káa ńyêei a gɛ́ɛ ŋá Ɣâla-woo ƃó, ŋ́gɛ tàre kili-ŋa-tɛi mɛni kélee su, táre kélee kɛ́ ƃo ńyêei, a kɛ̀ máŋ laa-la kélee káa ńyêei a gɛ́ɛ ŋa pɔ̂ri yée-ŋa siɣêi dítɔɔ̂i, kɛ́lɛ, wɛli-kɛ-maa fé ńyêei, ŋ́gaa nɔ́ kpɛni-kpɛni.

³ A kɛ̀ máŋ ŋà ŋ́gɔ̃liŋ kélee kɔ̀lɛ gôlo-ƃelai dîa, ŋá ŋ́gbono tɛ́ɛ a gɛ́ɛ dí géreŋ, kɛ́lɛ, wɛli-kɛ-mâa fé ńyêei, fa sɛŋ da sɔlɔ ƃô zu.

⁴ Wɛli-kɛ-maa líi kpeleɛ̂i, zɔŋ lɛ́lɛɛ. Wɛli-kɛ-maa fé tólo ní, wɛli-kɛ-maa fa yoŋka tee.

⁵ Va zu-mɛ̂ni kɛ̀tɛ, va ŋumɛ-tûa kɛ̀. Wɛli-kɛ́-maa fa gbîŋ-pere kɔ̀ri, va ǹíi ŋwàna a maa félaa, va mɛni nyɔ́mɔɔ su gbà kùla.

⁶ Ǹíi fa nɛ̃ɛ lɛ́ɛ mɛni su, kɛ́lɛ, ǹíi a nɛ̃ɛ tɔ̃yâ-mɛni su.

⁷ Wɛli-kɛ-maa a mɛni kélee sìɣe, gɛ laa a mɛni kélee, gíli kɛ́ ƃò mɛni kélee su, ǹíi kpeleɛ mɛni kélee su.

⁸ Wɛli-kɛ-maa kôyaŋ fé m̀a. Kɛ́lɛ, Ɣâla-woo ƃóɔɔ a pâi tɛɛ̂i. Sîi-woo-ŋa nyíi-ŋai núu fa târe dísui, da pâi tɛɛ̂i. Táre máŋ a pâi tɛɛ̂i.

⁹ Kpɛ́ni fêi, kútarêi láa fé fɛ́ɛ ní, Kúɣâla-woo ƃóɔɔi láa fé fɛ́ɛ ní.

¹⁰ Kɛ́lɛ, tãi m̀ɛnii nyíi ǹáa fɛɛ̂i a pá lai, mɛni kpûra-ŋai ŋí da pâi tɛɛ̂i.

¹¹ Tãi ŋá kɛ̀ la a lôloŋ ŋá lòno yɛ̂ɛ lôloŋ, ŋá mɛni ŋá káa yɛ̂ɛ lôloŋ, ŋá ŋ́gili ŋá sía yɛ̂ɛ lôloŋ. Kɛ́lɛ, tãi ŋa nâa kɛ̀ la a núu kɛ́tɛi ŋa kpèra lôloŋ mɛni ma.

¹² Tãi ŋí su kúfa kwaa kâa a zu ponoɔɔ. Gáa nɔ́ yɛ̂ɛ núu à kɛ̀ sɛŋ da kâai mɛ̃lɛ-mɛ̃lɛ su. Kɛ́lɛ, nàa pôlu ma, kwa pâi mɛni-ŋai kpîŋ kâai yɛ̂ɛ berei díkaa lai. Tãi ŋí su ŋámɛni-kɔlɔŋɔɔi káa nɔ́ a gbua. Kɛ́lɛ, tãi tí sú ŋa pâi gélee kɔ́lɔnîi yɛ̂ɛ berei máŋ Ɣâla è ŋ́gɔlɔŋ la a ǹɛ́lɛɛi.

¹³ Mɛni ma, zɛŋ saaƃa ŋí, laa-la, kili-kɛ-zu, da wɛli-kɛ-mâa díkaa nɔ́ naa wɔlɔ-wɔlɔ, kɛ́lɛ, zɛŋ saaƃai ŋí nyíi dɛɛ̂i gélee mai, ǹyaa ƃa wɛli-kɛ-maa.