Kɔleŋtiɛŋ Maa-ŋuŋ 12 - Ŋ̀âla Kɔlɔ Maa Waai

Sama-sãa nyíi-ŋai da kûla M̀ɔlêŋ yêei

¹ É pîlaŋ la M̀ɔlêŋ ŋɔsama-sãai dîa, ŋánûa, ḿve ŋ̀wɛ̂lii ŋá kálɛɛ a káƃoɔɔ mɛni ma.

² Ka gɔ́lɔŋ a gɛ́ɛ ká kɛ́ɛ a Zɛ̃tai-ŋai ká làŋ kálɛɛ ɣâla-pɔkɔɔŋ-ŋa pôlu nyíi-ŋai dífa lônoi. Ƃɛ́i kélee dí pɔ̂ri liî naa a káai, ká lì naa.

³ Mɛni ma ŋa ǹɛ kâa a gɛ́ɛ núu da fa lôno Ɣâla Ŋɔmɔlêŋ su ǹyɛɛ, “Naɣâŋ káa Zîsɛ ma!” Núu fa téla mò, ǹyɛɛ, “Zîsɛ káa a Kúnuu-namui” fɛ̂ɛ é kɛ́ M̀ɔlêŋ Maa Waai sarâi.

⁴ Ǹyaŋ sama-sɛŋ sii támaa káa naa, kɛ́lɛ, M̀ɔlêŋ káa nɔ́ tɔnɔ.

⁵ Tíi sii támaa káa naa, kɛ́lɛ, Kúnuu-namui káa nɔ́ tɔnɔ.

⁶ Tíi kɛ́-pere támaa káa naa, kɛ́lɛ, Ɣâla káa nɔ́ tɔnɔ nyíi a mɛni kélee kɛ̀ núu kélee kponôi.

⁷ Kɛ́lɛ, M̀ɔlêŋ ŋɔkili-ŋa-ponoi tɛ̂ɛi núu kélee pɔ́ tɛi-tɛi a mɛni lɛ́lɛɛ núu kélee mɛni ma.

⁸ Táre-woo tɛ̂ɛi dɔnɔ pɔ́ M̀ɔlêŋ sarâi. Mɛni-kɔlɔŋ woo tɛ̂ɛi dɔnɔ pɔ́ M̀ɔlêŋ tɔnɔi sarâi.

⁹ Laa-la tɛ̂ɛi dɔnɔ pɔ́ M̀ɔlêŋ tɔnɔi sarâi. Ƃálo-laa sama-sɛŋ tɛ̂ɛi dɔnɔ pɔ́ M̀ɔlêŋ tɔnɔi sarâi.

¹⁰ Ŋ́ɛi-kɛ-maa kɛ́ɛ tɛ̂ɛi dɔnɔ pɔ́, Ɣâla-woo ƃoɔɔ tɛ̂ɛi dɔnɔ pɔ́, mɔlêŋ-ŋa loai kɔ́lɔŋ-tare tɛ̂ɛi dɔnɔ pɔ́. È sii-woo da kpɛ́ni-ŋa ƃó pere lɛ̀ núu da ni dîa. É zîi-woo da kpɛ́ni-ŋai núu fa târe dísui dísu-kulâi tɛ̂ɛi da-ni pɔ́.

¹¹ Nyíŋi-ŋai kélee M̀ɔlêŋ sii tɔnɔi ƃé gɛ̀ é ŋáa kɔlɛ núu kélee ma tɛi-tɛ́i yɛ̂ɛ berei a ŋ̀wɛ̂lii lai.

Gbono tɔ̂nɔi ŋoŋo támaa ma

¹² Berei nɔ́ gbonôi káa la tɔnɔ ŋoŋo támaa mai, berei máŋ ŋoŋo-ŋai támaâi lai, díkaa a kpono tɔnɔ, bere nɔ́ ƃe ǹyaŋ gáa la a Kôrai.

¹³ Kpɛ́ni fêi, M̀ɔlêŋ tɔnɔi sarâi dí kúkelee kúbatâi kɛ̀ kpono tɔnɔ su Zûu-ŋai kpaa máŋ Gurii-ŋai, luɛ-ŋa kpaa máŋ diai díŋuŋ ma ƃôɔi, Ɣâla è kúkɛ̀ kú kúkpele M̀ɔlêŋ tɔnɔi su.

¹⁴ Kpɛ́ni fêi, gbonôi ŋoŋo fé tɔnɔ, kɛ́lɛ, ŋoŋo támaâi.

¹⁵ A kɛ̀ kɔ́ɔ a mò, ǹyɛɛ, “Fé a gbonoi ŋoŋo da, kpɛ́ni fêi, fé a yée,” nyíti fé pâi gɛ̂i a gɛ́ɛ ve a gbonoi ŋoŋo da.

¹⁶ A kɛ̀ wóli à mò, ǹyɛɛ, “Fé a gbonoi ŋoŋo da, kpɛ́ni fêi, fé a ŋɛ́i,” nyíti fé pâi gɛ̂i a gɛ́ɛ ve a gbonoi ŋoŋo da.

¹⁷ Eêi kɛ̀ gbonoi kélee eêi kɛ̀ nɔ́ a ŋɛ́i, gɛ̀ ní, mɛni mɛniɛɛ eêi pâi kulâi mí? Eêi kɛ̀ gbonoi kélee eêi kɛ̀ nɔ́ a wóli, gɛ̀ ní, sɛŋ kúŋ-mɛni maa-tarei eêi pâi kulâi mí?

¹⁸ Kɛ́lɛ, berei gáa lai, Ɣâla è núu kpono zua kélee pù bûi, yɛ̂ɛ berei è kɛ̀ ŋ̀wɛ̂lii lai.

¹⁹ Eêi kɛ̀ ŋoŋo-ŋai kélee dîi kɛ̀ nɔ́ a woŋo tɔnɔ, gɛ̀ ní, gbonoi eêi kùla mí?

²⁰ Yɛ̂ɛ berei gáa lai, gbonoi woŋo támaâi ma, kɛ́lɛ, gáa nɔ́ a kpono tɔnɔ.

²¹ Ŋɛ́ii fa pɔ̂ri m̀ôi yée ma, ǹyɛɛ, “Ímaa-kpaaŋ fé mâ,” kpaa máŋ, ŋuŋ fa pɔ̂ri m̀ôi kɔ́ɔ ma, “Ímaa-kpaaŋ fé mâ.”

²² Vé tí. Gbonoi ŋɔwoŋo-ŋai nyíi-ŋai díkɛ̂ɛi yɛ̂ɛ dia ƃe dímɛni fii-kpɛɛi, gbonoi fa kɛ̂ díŋɛi pôlu.

²³ Kúkponôi m̀ɛi-ŋai kwa kúkili ŋá sìa a gɛ́ɛ ƃaa kɛ́-maa fé diai, kwa ƃaa kɛ́-maa támaa tɛ̀ɛ dípɔ. Kúkponôi m̀ɛi-ŋai kwa ǹaa lòoi, kwa nàa mɛi kâa a ŋ̀ánaa.

²⁴ Kúkponôi m̀ɛ́i-ŋai kwa nàa lɛɛ fíyeŋ ŋái, kúfa nàa mɛi kâa ti, kɛ́lɛ, Ɣâla è kúkponoi pû gîe ma é ƃaa kɛ́-maa tɛ́ɛ m̀ɛi-ŋai pɔ́ nàa fii-kpɛɛi,

²⁵ a gɛ́ɛ ŋaa-kɔlɛ fè kɛ̀ kúkponôi, kɛ́lɛ, kúkponoi ŋɔwoŋo-ŋai kélee dí kpáaŋ díkîe-ni mɛni ma.

²⁶ A kɛ̀ gbonoi woŋo-ŋai dɔnɔ à mɛni-soli kàa, gélee a mɛni-soli káa gîe ma. A kɛ̀ dɔnɔ a ƃaa kɛ́-maa sɔlɔ ƃô, gélee a lii-nɛ̃ɛ kula gîe ma.

²⁷ Mɛni ma kákaa a Kôrai kpono ka ƃo a ŋoŋo-ŋa tɛi-tɛi.

²⁸ Ɣâla a sia-ƃela lɛ́ Ŋɔkôrai-toli-kpɔŋ su a maa-ŋuŋ, veerɛi Ɣâla a ŋɔlóno kɛ́-ƃela lɛ́, zaaƃai sɛŋ-lɛ-ƃela, ŋɛi-kɛ-maa kɛ-ƃela, núu ƃálo-ƃela, kpɔŋ-mâa-ƃela, núu-mɛi-ƃela, sii-woo ƃó-ƃela nyíi núu fa târe dísui.

²⁹ Ǹúui kélee díkaa a sia-ƃela? Ǹúui kélee díkaa a Ɣâla ŋɔlóno kɛ́-ƃela? Ǹúui kélee díkaa a sɛŋ-lɛ-ƃela? Díkelee da ŋɛi-kɛ-maa kɛ̂?

³⁰ M̀álo-laa sama-sɛŋ tɛɛ̂i núu kélee pɔ? Ǹúui kélee da sîi-woo ƃò nyíi núu fa târe dísu? Ǹúui kélee da woo-su-kula kɛ̂?

³¹ Kɛ́lɛ, fɛ̂ɛ ka sama-sɛŋ mɛni kpanaŋɔɔ kɔ̂ri kpɔ́ a gbanaŋɔɔ. Ŋa pâi bere lɛ́lɛɛi lɛ̂i kâa máŋ é tɛ́ɛ nyíti ma.