Kɔleŋtiɛŋ Maa-ŋuŋ 10 - Ŋ̀âla Kɔlɔ Maa Waai

Ɣâla-pɔkɔɔŋ fɛliɛ maa-lia-woo

¹ Ŋánûa, ŋa ŋ̀wɛ̂lii ka gɔ́lɔŋ a gɛ́ɛ kúnâŋ-ni kélee dí kɛ̀ ŋele-kɔlɔŋ kolei mu, díkelee dí tɛ́ɛ ǹyúo-loŋ loai.

² Díkelee da Mose-ni dí kɛ̀ zu tɔnɔ batâi yée mu, ŋele-kɔlɔŋ-kolei su da ǹyúo-loŋ.

³ Díkelee dí Ŋ̀âla-mii-sɛŋ tɔnɔi mìi.

⁴ Díkelee dí Ŋ̀âla ya tɔnɔi kpèle. Kpɛ́ni fêi, dí díkpele é kúla Ŋ̀âla kɔnii su, nyíi lɛ̀ɛ dípôlui. Maa kɔnii ƃé kɛ̀ a Kôrai.

⁵ Kɛ́lɛ, Ɣâla líi fé kɛ́ ní a ǹáa dí támaa ɣele yêei. M̀ɛni ƃe dí sàa la vɛ̃ɛ-kpâlaŋ su.

⁶ Mɛni-ŋai ŋí káa nâa a kúmɛni kɔɔ̂ŋ-maa a gɛ́ɛ káfe sɛŋ nyɔ́mɔɔ-ŋa wɛli kɛ̀ yɛ̂ɛ berei dí gɛ̀ lai.

⁷ Káfè kɛ̀ a ɣâla-pɔkɔɔŋ fɛli-ƃela yɛ̂ɛ berei díta-ni dí gɛ lai, yɛ̂ɛ berei bɔ̃yɛɛ̂i lai, “Ǹûai dí sèe dí dílaa mii dí díkpele dí dímu siɣe a gɛ́ɛ dí pêle kɛ́.”

⁸ Kúfe wulu-wulu kɛ̀ yɛ̂ɛ berei ǹúui da-ni dí gɛ̀ lai. Maa-ɣele tɔnɔi ti nuu wála buu feerɛ kao saaƃa ƃe sàa ma.

⁹ Kúfe Kúnuu-namui su kɔɔ̂ŋ yɛ̂ɛ berei ǹúui da-ni dí gɛ̀ lai. Kali ƃe dípaa.

¹⁰ Káfe káŋuŋ su-woo sàa yɛ̂ɛ berei ǹúui da-ni dí gɛ̀ lai. Núu su-kara-nuui è dísu kara.

¹¹ Ǹyaŋ mɛni-ŋai ŋí dí kɛ̀ a dia a gɛ́ɛ é kɛ́ a mɛni kɔɔŋ-maa. Kɛ́lɛ, dí dípɔ̃yɛ̂ kútare tɔɔ mɛni ma, kúai ŋ̀éniɛi gbɛɛ-ŋai a pâi kúpɔi.

¹² M̀ɛni ma ǹúui gáa gíli ŋá a gɛ́ɛ a pɔ̂ri tɔɔ̂i, tɔ́ɔ é m̀ɛi káa va lâ too la.

¹³ Yee laa-maa da fé niî pá ní kápɔ nyíi ve niî pá ní núu da pɔi. Ɣâla sã́âi, nyíi ve pâi nɛɛ̂i naa yee-laa-maa é pá kápɔ nyíi dɛɛi káwala-walai mai. Kɛ́lɛ, tãi yee-laa-maa a pá lai, Ɣâla máŋ a pâi kúkula-perei tɛɛ̂i a gɛ́ɛ pɔ̂ri é kɛ́ káa ka tɔɔ zu.

¹⁴ Mɛni ma, ŋáwɛli-kɛ-maa-ƃelai, ka kasu kula ɣâla-pɔkɔɔŋ fɛliɛ ma.

¹⁵ Ŋa lônoi táre-ƃela pɔ. M̀ɛnii ŋa m̀ôi, ka ŋ̀á tée káa kpîŋ.

¹⁶ Ǹûa, gbele-kɔɛi kwa lûwa làa mai, ve a kɛ-zu-tɔnɔɔ Kôrai ŋãai su? Gbóloi kwa ŋalei, ve a kɛ-zu-tɔnɔɔ Kôrai kpono su?

¹⁷ Gbóloi káa tɔnɔɔ berei máŋ Kútamaâi lai, kúkelee kúkaa a kpono tɔnɔ, kpɛ́ni fêi, ku gbólo tɔnɔi tí mii.

¹⁸ Ka kákili ŋá sía Eezuɛ tua-pere ma. Diai da zâla-sãai mii, dífe zu tɔnɔɔ Díɣâla-mɛni kɛ́ɛ su?

¹⁹ Ŋa pɔ̂ri ŋaŋ kɛ̂i lé? A gɛɛ mii-sɛŋ da dɛɛ ɣâla-pɔkɔɔŋ-ŋa pɔi mɛni kpanaŋɔɔ̂i? Kpaa máŋ ɣâla-pɔkɔɔŋ mɛni kpanaŋɔɔ̂i?

²⁰ Kpao, ŋa m̀ôi a gɛ́ɛ zãâi diai dífe láa ní a Ɣalai da gùla a salâi, da gùla a sâla nyinaŋ nyɔ́mɔɔ-ŋai dîa, kɛ́lɛ Ɣâla fei. Fé ŋ̀wɛ̂lii a gɛ́ɛ ka nyinaŋ nyɔ́mɔɔ-ŋa ká kɛ́ zu tɔnɔɔ.

²¹ Káfa pɔ̂ri kákpelêi Kúnuu-namui ŋɔkpele-kɔɛi su, kákɛ kákpele ŋɔnɔ nyinaŋ nyɔ́mɔɔ-ŋai díkpele-kɔɛi su. Káfa pɔ̂ri Kúnuu-namui ŋɔteƃelei ma-mii-sɛŋ da mii, ká ŋɔnɔ nyinaŋ nyɔ́mɔɔ-ŋai díteƃelei ma-mii-sɛŋ da mii.

²² Kwa kɔ́i a gɛ́ɛ kú Kúnuu-namui kɛ́ é tólo? Kúwala-walaai é tɛ́ɛ mà?

Ka mɛni kélee kɛ́ Ɣâla ŋɔfólo-laai mɛni ma

²³ “Mɛni kélee káa tɔ̂ŋ lá-woo ma,” kɛ́lɛ, mɛni kélee fa kpɔŋ-mâa tɛ̀ɛ núu pɔ. “Mɛni kélee káa tɔ̂ŋ lá-woo ma,” kɛ́lɛ, mɛni kélee fa kúƃɔlɔ kúmɔlêŋ su.

²⁴ Tɔɔ núu da kélee fé mɛni lɛ́lɛɛ kɔ̀ri gbîŋ mɛni ma, kɛ́lɛ, é mɛni lɛ́lɛɛ kɔ̂ri ŋɔkɔlɛ-ma-nuui mɛni ma.

²⁵ Sua sii kélee ka pɔ̂ri ǹyâi nɔ́ɔ-kpalaŋ ŋái, ka ǹyá ka mii kákili-ŋa-siai fé gɛ̀ ká mare-kɛ̂ɛ kɛ́.

²⁶ Kpɛ́ni fêi! “Ǹɔii káa a Kúnuu-namui pɔ́ɔ da zu-sãa kélee.”

²⁷ A kɛ̀ diai laa-la fé díyêei da ƃɛlɛ-toli ƃò a káa a gɛ́ɛ ka dîa-ni ká kálaa mii, ǹyaŋ ka ŋ̀wɛ̂lii ka li, sɛŋ kélee da zee káŋɛi ka mii kákili-ŋa-siai fé kákɛ ká mare-kɛ̂ɛ kɛ́.

²⁸ Kɛ́lɛ, à kɛ̀ núu da à mò kâa, “Dí zuai tí kùla a sâla,” gɛ̀ ní ka kákili ŋá sía é pîlaŋ m̀aa-nuui tí ma nyíi mò kâai, da ŋɔkili-ŋa-siai.

²⁹ Kákili-ŋa-siai fei, gɛ̀ ní káfe m̀aa-suai tí mii. Kpɛ́ni fêi, lé mɛni ƃe núu da kpɛni ŋɔkili-ŋa-siai a pâi ŋ́gberâi la nia-mɛni-kɛɛ mai?

³⁰ A kɛ̀ ŋà sɛɣɛ-fei tɛ̀ɛ Ɣâla pɔ́ mii-sɛŋ ŋá mii mɛni ma, lé ƃe ka ńaa karâi la mii-sɛŋ mɛni ma nyíi ŋá maa sɛɣɛi-fei tɛɛ bɔi?

³¹ Mɛni ma, kà mii-sɛŋ mìi, kpaa máŋ kà kákpèle, kpaa máŋ mɛni kélee ka gɛ̀i, ka gélee kɛ́ Ɣâla ŋɔfólo-laai mɛni ma.

³² Káfe Zûu-ŋai líi soli, kpaa máŋ Gurii-ŋai, kpaa máŋ Ɣâla-toli-kpɔŋ,

³³ yɛ̂ɛ berei ŋa kɔ̂i la a gɛ́ɛ ŋa núu kélee líi láa ŋ́gɛ-mɛni kélee sui, fa mɛni lɛ́lɛɛ kɔ̀ri ŋ́gbîŋ mɛni ma, kɛ́lɛ, ŋa mɛni lɛ́lɛɛ kɔ̀ri núu támaa mɛni ma a gɛ́ɛ núu támaa dí ƃálo.