Kɔleŋtiɛŋ Maa-ŋuŋ 1 - Ŋ̀âla Kɔlɔ Maa Waai

La-ti-maa

¹ Ńyãa Pɔ̂ɔ, Ɣâla è ńdòli kwa ḿarâŋ nuui Soteni a ŋɔnîa mɛnii a gɛ́ɛ ŋá kɛ́ a Zîsɛ Kôrai ŋɔsia-nuu da kúƃarâŋ Soteni,

² Ɣâla-toli-kpɔŋ gáa Kɔleŋ da diai dímaa waai Zîsɛ Kôrai kponôi, e pɛlɛ diai kélee dîa díkaa kwaa kélee mai Ɣâla e dítòli a Ɣâla-ƃela gîe ma dí Kúnuu-namui Zîsɛ Kôrai láa tóli nyíi gáa a kwa dîa-ni Kúnuu-namui:

³ Ƃɛlɛ-sêe da lii-sêe dí kɛ́ káyêei é kula Kúnâŋ Ɣâla yêei da Kúnuu-namui Zîsɛ Kôrai.

M̀ɛlɛ-sêei maa sɛɣɛi-fei

⁴ Ŋa Ŋáɣâlai sɛɣɛ̂i fè kámɛni ma a tãi kélee m̀ɛlɛ-seei mɛni ma nyíi Ɣâla è dɛ̀ɛ kápɔ Zîsɛ Kôrai kponôi,

⁵ kpɛ́ni fêi, ká kɛ̀ a tɔɔ-ƃela pere sii kélee su gbonôi lóno-woo kélee su da táre kélee,

⁶ yɛ̂ɛ berei máŋ Kôrai m̀aa sêre-faai è lɔ̀ la kpɔ́ kákponôi

⁷ a gɛ́ɛ M̀ɔlêŋ ŋɔsama-sɛŋ da kélee fé kpɛ̀ɛ káyêei, a tãi kákaa Kúnuu-namui Zîsɛ Kôrai maa-kpɛnii la a gɛ́ɛ é gbîŋ lɛ́ kâa,

⁸ nyíi pâi kásonîi é lɛ́ɛ la zu gbɛɛ ŋái é pá a gɛ́ɛ ka sɔŋ fé lɛ́ɛ kâa Kúnuu-namui Zîsɛ Kôrai ŋɔɣelei mai.

⁹ Ɣâla sãâi, nyíi kátòli Ǹóŋ Zîsɛ Kôrai Kúnuu-namui ŋɔkɛ-naai sui.

Kôrai ŋá kɔlɛɛ̂i?

¹⁰ Ŋánûa, ŋa kákpera fêi Kúnuu-namui Zîsɛ Kôrai láai su a gɛ́ɛ kákelee ka fáa a gɛ́ɛ káfè kɛ̀ a káŋa kɔlɛɛ, kɛ́lɛ, ka kɛ́ zu tɔnɔɔ gili-ŋa-sia tɔnɔi su da m̀ɛni-ŋa-teɛɛ tɔnɔi.

¹¹ Kpɛ́ni fêi, ŋánûa, Kulowe-ƃela dí mo ḿâ a gɛ́ɛ laa-saa káa káloai.

¹² M̀ɛnii ŋa môi, zu-kulai ƃa kátà-ni ka mò kâa, “Ŋ́gaa a Pɔ̂ɔ pɔ́ɔ,” da-ni dîyɛɛ, “Ŋ́gaa a Apolo pɔ́ɔ,” da-ni dîyɛɛ, “Ŋ́gaa a Sîfa pɔ́ɔ,” da-ni dîyɛɛ, “Ŋ́gaa a Kôrai pɔ́ɔ.”

¹³ Kôrai ŋá kɔlɛɛ̂i? Dí Pɔ̂ɔ kpàmo wúru su-tíyeŋɔɔ ma kámɛni ma? Kpaa máŋ dí kábatâi kɛ̀ Pɔ̂ɔ láai su?

¹⁴ Ŋa Ɣâla sɛɣɛ̂i fè a gɛ́ɛ fé kátɔnɔ kpîŋ batâi kɛ́ ni é kúla Kulepɔ pôlu da Geeyɔ,

¹⁵ a gɛ́ɛ núu da fé mò a gɛ́ɛ dí kábatâi kɛ̀ ńaâi su. (

¹⁶ Ŋá Tɛfɛnɛ ŋɔpɛ́rɛi mu-ƃelai kélee batâi kɛ̀ máŋ. É kúla nyíŋi pôlu, fé gɔ́lɔŋ à kɛ̀ ŋa núu da kpɛni batâi kɛ̀ ŋɔ́nɔ.)

¹⁷ Kpɛ́ni fêi, Kôrai fé ńdɛ̀ɛ ní a gɛ́ɛ ŋá batâi kɛ́, kɛ́lɛ, è ńdɛ̀ɛ a gɛ́ɛ ŋa Duŋ Lɛ́lɛɛi ƃo. Fé wóo kpaya-kpaya ƃo ni a gɛ́ɛ Kôrai ŋɔsaa-wuruii su-wála-wala é kpéra.

Kôrai káa a Ɣâla ŋɔwála-wâlai da ŋɔtárei

¹⁸ Zaa-wuruii maa-wooi káa nɔ́ a ƃoo-woo diai ŋɛ́i díkaa saâi, kɛ́lɛ, kúai kúƃaloɔ̂i, gáa kúŋɛi a Ɣâla ŋɔwála-walai.

¹⁹ Kpɛ́ni fêi, bɔ̃yɛɛ̂i, “Ŋa pâi dare-ƃelai dítarei su karaâi, ŋa ŋôya-ƃelai dítarei kpera.”

²⁰ Dare-nuui kɔɔ? Gɔlɔ-pɔ̃yɛ-nuui kɔɔ? Ŋ̀éniɛi ŋí su yeli-tɔɔ-nuui kɔɔ? Diai da díkpîŋ kula a tare-ƃela ǹɔii ŋí sui, Ɣâla fé gɛ̀ ní dí kɛ́ a ƃoo-ƃela?

²¹ Kpɛ́ni fêi, berei Ɣâla ŋɔtárei káa lai, ŋ̀éniɛi su-ƃelai dífe Ɣâla kɔlɔŋ ni táre su, Ɣâla líi lâai a gɛ́ɛ diai laa-la káa díyêei, a díƃalo kúƃoo-Ɣâla-wooi sarâi.

²² Kpɛ́ni fêi, Zûu-ŋai da ŋɛi-kɛ-maa kɔ̂ri, Gurii-ŋai díkɛ táre kɔ̂ri.

²³ Kɛ́lɛ, kwa Kôrai kpamo mɛnii ƃo nyíi gáa a Zûu-ŋai perêi-kpáaŋ-sɛŋ, e ƃò a ƃoo-mɛni Zɛ̃tai-ŋai ŋɛi.

²⁴ Kɛ́lɛ, Zûu-ŋai da Gurii-ŋai nyíi-ŋai Ɣâla è dítòlii, Kôrai káa díŋɛi a Ɣâla ŋɔwála-walai da ŋɔtárei.

²⁵ Kpɛ́ni fêi, Ɣâla ŋɔƃoo-mɛnii káa a tare-mɛni é tɛ́ɛ núu-kpune ŋɔtárei ma, ŋɔmɛni fii-kpɛɛi kɛ́ ƃò a mɛni-kpanaŋ é tɛ́ɛ núu-kpune ŋɔmɛni-kpanaŋ ma.

²⁶ Ŋánûa, ka kákili ŋá sia berei ma Ɣâla è kátòli lai. Kátama-ɣele káfe táre ni yɛ̂ɛ berei ŋ̀éniɛi ŋí su tua-perei káa lai. Kátama-ɣele wála-wala-laa fe káyêei. Kátama-ɣele káfe a kâloŋ-lonii.

²⁷ Kɛ́lɛ, Ɣâla è ƃoo siɣe ŋ̀éniɛi ŋí su a gɛ́ɛ é tare-ƃela ŋumɛ la. É fii-kpɛɛ siɣe ŋ̀éniɛi ŋí su é wála-wala-ƃela ŋumɛ la.

²⁸ Ɣâla è zɛŋ nyíi siɣe ǹyeŋɔɔ̂i ǹɔii su núu-kpune ŋɛ́i naɣîŋɔɔi mɛi, zɛŋ nyíi máŋ ve ŋ̀éniɛi ŋí sui, a gɛ́ɛ é zãâi kélee kpɛtɛ la díkaa ŋ̀éniɛi sui,

²⁹ a gɛ́ɛ núu-kpune fé yoŋka tee Ɣâla ŋɛ́i.

³⁰ Nya ƃe kúfulu-laai a kûla ǹyêei Zîsɛ Kôrai kponôi, nyíi ǹyaa Ɣâla e gɛ̀ a ku-tárei, kútɔ̃yâ laa-lai, kúmaa-waa-laai, da kúmaa-tee-laai.

³¹ Mɛni ma, yɛ̂ɛ berei bɔ̃yɛɛ̂i lai, “Ǹúui a yoŋka tèei, tɔɔ é yoŋka tée Kúnuu-namui maa-mɛni ma.”