Kɔlɔnikɔ Maa-ŋuŋ 4 - Ŋ̀âla Kɔlɔ Maa Waai

Zuda ŋɔsuui su-ƃelai

¹ Zuda ŋɔsuui su-ƃelai ƃé kɛ̀ a: Pɛrɛzi, Ɛzɔrɔŋ, Kami, Ɔ̂ɔ da Soba.

² Soba ƃé kɛ̀ a Le-aiya ǹâŋ. Le-aiya ƃé kɛ̀ a Zaa ǹâŋ. Zaa kɛ̀ ƃò a Aumai da Laa dínâŋ. Ǹûai ŋí ƃé kɛ̀ a Zora-ŋai dínuu-suui su-ƃelai.

³ Itaŋ ǹônii-sinaai ƃé kɛ̀ a: Zariɛɛ, Isima da Idibasi. Dísaaƃɔlɔ láa ƃé kɛ̀ a Aseleponi.

⁴ Pɛnuɛ ƃé kɛ̀ a Gidɔ ǹâŋ, Izɛ ǹyaŋ gɛ́ ƃò a Usaŋ ǹâŋ. Ɔ̂ɔ ƃé kɛ̀ a Kelɛ ŋɔnɛnîi Ɛfata ǹóŋ duɛ-tuɛi. Ɔ̂ɔ ŋí ŋɔsuui su-ƃelai ƃé Bɛpeleɣɛ̃ɛ taa-lêei tɔ̀ɔ.

⁵ Asɔɔ ƃé kɛ̀ a Tikoa ǹâŋ. Nɛnî feerɛ ƃé kɛ̀ Asɔɔ yêei. Dílaa ƃé a Ɛla da Naara.

⁶ Naara da Asɔɔ dínîa-pɛlɛɛi ƃé kɛ̀ a: Auzaŋ, Ɛfɛ, Temeni da Aa Asitari. Dia ƃé kɛ̀ a Naara ŋɔsuui su-ƃelai.

⁷ Ɛla ǹônii-sinaai ƃé kɛ̀ a: Zere, Iza da Ɛtinaŋ.

⁸ Kozi ƃé kɛ̀ a Anu da Zoƃeba dínâŋ. È kɛ̀ máŋ a Aluŋ ǹóŋ Aaɛ ŋɔsuu su nuui da.

⁹ Nalôŋ tɔnɔ è kɛ̀ naa ǹáa ƃé kɛ̀ a Zabɛsi. Ƃaa-kɛ-maa támaa è kɛ̀ ma ǹêɣe-sinaai da ǹîa-sinaai sáma. Ǹee è ǹáa sèe a Zabɛsi, ǹyɛɛi, ŋá ǹáai ŋí sèe mà, kpɛ́ni fêi ŋá m̀aa sɔlɔ ƃò mɛni kpɔ̂lu su.

¹⁰ Zabɛsi ŋí è wɔ̀lɔ Eezuɛ Ɣalai ma a ɣele tɔnɔ da ǹyɛɛi, “Óo ye lûwa láa ḿâ í ŋálɔii-kpiniŋ su kɛ́tɛ. Ǹɛɛ naa íyee é kɛ́ ḿɛi í ŋ́gula mɛni kpɔ̂lu su a gɛ́ɛ ḿve sɛŋ sôli maa sɔlɔ ƃô.” Nya ƃe Ɣâla è ǹyée sèe ŋɔfɛli-wooi mu.

Ǹúu-suui da ni-ŋa láa

¹¹ Kelu è kɛ̀ a Sua ǹîa. Ǹóŋ-surɔŋ láa ƃé kɛ̀ a Mei. Mei è kɛ̀ a Ɛsitɔŋ ǹâŋ.

¹² Ɛsitɔŋ ǹônii-sinaai díkɛ̀ saaƃa: Bɛrafa, Pasia da Teinaŋ. Teinaŋ ƃé kɛ̀ a Naasi ǹâŋ. Ǹûai ŋí ƃé kɛ̀ a Leka-ƃelai.

¹³ Kena ǹônii-sinaai ƃé kɛ̀ a: Ɔtɛniɛ da Seraya. Ɔtɛniɛ ǹônii-sinaai ƃé kɛ̀ a: Ata da Mionotai.

¹⁴ Mionotai ƃé kɛ̀ a Ofura ǹâŋ. Seraya ƃé kɛ̀ a Zoa ǹâŋ. Zoa è taa tɔ̀ɔ ǹyée loai. Daai su-ƃelai kélee díkɛ a yɛrɛ kɛ́-ƃela.

¹⁵ Zefunɛ ǹóŋ Kelɛ ǹônii-sinaai ƃé kɛ̀ a: Iru, Ila da Naaŋ. Ela ǹóŋ-surɔŋ ƃé kɛ̀ a: Kena.

¹⁶ Zealɛlɛ ǹônii-sinaai ƃé kɛ̀ a: Zifi, Zifa, Tiriya da Asaree.

¹⁷ Ɛzura ǹônii-sinaai ƃé kɛ̀ a: Zɛtɛ, Merɛ, Ifɛ da Zaloŋ. Merɛ ŋɔnɛnî dɔnɔ è kɛ̀ a Ize kaloŋ ǹóŋ-nɛnî. Ǹáa ƃé kɛ̀ a Betia. Da ǹyaa dí lóŋ-nɛni tɔnɔ da lóŋ sinaa feerɛ maa sɔlɔ ƃò. Dí díloŋ-nɛnii láa sée a Meriaŋ. Dílônii-sinaai láa ƃé kɛ̀ a Samai da Isiba. Isiba ƃé wɔ́lɔ Ɛsitimoa-taai tɔ̂ɔ.

¹⁸ Merɛ è ŋɔ́nɔ Zûu-nɛni tɔnɔ kùla a ŋɔnɛnî. Da ǹyaa dí lônii-sinaa saaƃa maa sɔlɔ ƃò. Dílôloŋ dɔnɔ láa ƃé kɛ̀ a Zɛre. Zɛre ƃé kɛ̀ a Gidɔ-ǹâŋ. Veerɛi láa ƃé kɛ̀ a Ɛbɛ nyii kɛ̀ a Soko ǹâŋ. Zekutiɛ ƃé kɛ̀ a Zanoa ǹâŋ.

¹⁹ Odaya è Naaŋ zaaƃɔlɔ kùla a ŋɔnɛnî. Ǹɛnîi ŋí ǹônii-sinaai ƃé kɛ̀ a Gami suui su nuui Keila da Maaka suui su nuui Ɛsitimoa dísuui su-ƃelai dínâŋ ni.

²⁰ Simiɔŋ ǹônii-sinaai ƃé kɛ̀ a: Amɔŋ, Liina, Bɛŋ-anaŋ da Talɔŋ. Isi ŋɔsuui ƃé kɛ̀ a Zooɛ da Bɛŋ-zoɛ.

Sila ŋɔsuui su-ƃelai

²¹ Sila è kɛ̀ a Zuda ǹônii-sinaai dɔnɔ. Ɛɛ̂ ƃé kɛ̀ a Leka ǹâŋ, Laada kɛ́ ƃò a Marisa ǹâŋ. Ŋɔsuui su ƃé zeɣe kole fɛŋ-fɛŋ pala-ƃelai díkùla naa. Díseɛɛ è kɛ̀ Bɛ-asibea-taa su.

²² Zokiŋ é pɛ́lɛ ǹûai dîa nyii-ŋai kɛ̀ Kosiba-taai sui da Zoasi é pɛ́lɛ Sarafi nyii-ŋai Môa nɛyãai kùla dí sée Bɛpeleɣɛ̃ɛ. (Mɛni-ŋai ŋí káa a mɛni pɔ̂lɔ-pɔlɔ.)

²³ Dia ƃé kɛ̀ a gâloŋ ŋɔleɣi tɔɔ-ƃelai. Díseɛɛ è kɛ̀ Netaiŋ da Gidɛra taa-ŋai su.

Simiɔŋ ŋɔsuui su-ƃelai

²⁴ Simiɔŋ ŋɔsuui su-ƃelai ƃé kɛ̀ a: Nɛmuɛ, Zamiŋ, Zari, Zera da Sau.

²⁵ Saluŋ è kɛ̀ a Sau ǹóŋ, Saluŋ kɛ́ ƃò a Misaŋ ǹâŋ, Misaŋ ǹyaŋ kɛ́ ƃò a Misima ǹâŋ.

²⁶ Misima ŋɔsuui su-ƃelai ƃé kɛ̀ a: Amuɛ ƃê kɛ̀ a Zakɔ ǹâŋ, Zakɔ ǹyaŋ kɛ́ ƃò a Simei ǹâŋ.

²⁷ Simei ǹônii-sinaai díkɛ̀ puu káo lɔ́ɔlu mɛi da, nɛyãai dí ƃò lɔ́ɔlu mɛi-da. Kɛ́lɛ Simei ǹêɣe-sinaai dífe nîa-pɛlɛɛ támaa maa sɔlɔ ƃó ní. M̀ɛni ma, dínuu-suui fé kɛ́ ní a dámaa yɛ̂ɛ Zuda ŋ̀ɔi.

²⁸ Ǹûai ŋí seɛɛ è kɛ̀ daa-ŋai ŋí su é lɛ́ɛ la zu Deeƃé é kɛ́ a kâloŋ. Daa-ŋai kpîŋ ƃé kɛ̀ a: Bɛɛsiba, Molada, Azasua,

²⁹ Bila, Ɛzeŋ Tola,

³⁰ Bɛtuɛ, Ɔma, Zikila,

³¹ Bɛ-maikabo, Aza Susiŋ, Bɛɛ-biri da Saaraiŋ ma.

³² Ǹûai ŋí da-ni díkɛ̀ daa-lêe lɔ́ɔlui ŋí su máŋ: Itaŋ, Aiŋ, Limɔŋ, Tokɛŋ da Asaŋ.

³³ Kpânaŋ-ŋa díkɛ̀ naa kɔlɛ ma é lɛ́ɛ la zu é seri Bêe taai su. Ǹɔii-kpiniŋ ŋí ƃé kɛ̀ a ǹûai ŋí dísuui ŋɔlɔii kpiniŋ. Dí wɔ́lɔ dínûai kélee láa sìɣe. Diai dí dílaa siɣei dia ƃé kɛ̀ a:

^34-38 Zinaai ŋí ƃé kɛ̀ a dínuu suui láa túɛ-ƃela: Mesoba, Zamilɛ, Amazia ǹóŋ Zosa, Zooɛ, Zosibia ǹóŋ Zewu, Seraya ǹóŋ, Asiɛ ǹóŋ, Ɛlioenai, Zaakoba, Zesoaiya, Asaya, Adiɛ, Zesimiɛ, Bɛnaya, Sifi ǹóŋ Zina, Alɔŋ ǹóŋ Zidaya, da Simaiya ǹóŋ Simiri. Ǹûai ŋí dísuui è wɔ́lɔ kɛ̀ a núu-suu su kɛ́tɛ.

³⁹ Dí tàa-taa kpɔ́ dí seri Gera-taa kɔlɛ ma. Da kâa lì diŋ-tiŋ su vóloi ƃêlai-pere kala ŋûnu kɔ̂rii naa dítaa-tulɛ-ŋai mɛni ma.

⁴⁰ Dí kala ŋûnu lɛ́lɛɛ kàa naa. Gwaai ŋí ma è kɛ̀ a lɔii lɛ́lɛɛ, kpɛ́ni fêi, è kɛ̀ a lii-see lɔii, naa kɛ́tɛɛ dímaa mɛni ma. Aaŋ ŋɔsuui su-ƃelai ƃé kɛ̀ ǹɔii ŋí su a maa ŋuŋ.

⁴¹ Ǹûai ŋí dí dílaa sìɣei, dí pà ǹɔii ŋí su Ɛsekaya ŋɔkâloŋ-laa koraŋ su Zuda lɔii mɛi. Dí kɔ́ pɛ̀lɛ Gera ŋɔsuui su-ƃelai dîa da Meuniŋ-ŋai dîa dí díyee mɛi ɣále. Dí díyee mɛi ɣâle dí díkelee kpɛ dí ǹɔii ŋí síɣe a díƃala-ŋai mɛi kâai. Díkaa naa é tóo sâa ma.

⁴² Simiɔŋ ŋɔsuui su-ƃelai ŋuŋ lɔ́ɔlu (500) dí lì Siɛ Yeei ma ǹyée lɔii su. Ǹûai ŋí láa túɛ-ƃelai ƃé kɛ̀ a: Pelatia, Niaria, Lefaiya da Uziɛ. Ǹûai ŋí díkɛ̀ a Isi ǹônii-sinaai.

⁴³ Simiɔŋ ŋɔsuui è ŋɔ́nɔ lì é Amɛlɛka-ƃelai nyii-ŋai wɔ́lɔ pù dí sée ǹɔii tí sui díkelee dípaa. Díkaa naa é tóo sâa ma.