Kɔlɔnikɔ Maa-ŋuŋ 23 - Ŋ̀âla Kɔlɔ Maa Waai

¹ Gâloŋ Deeƃé kɛ́ɛ a pɔlɔi, è ŋɔlôloŋ Saloma lɛ̀ɛ bɔ́ɔ ŋá a Eezuɛ-ŋai díkâloŋ.

Liiva-ŋai dítii-ŋai

² Gâloŋ Deeƃé è Eezuɛ mɛi-ƃelai kélee, zâla láa-soŋ-ƃelai da Liiva-ŋai kélee ŋáa tɛ̀ gîe ma.

³ È Liiva-ŋai díkoraŋ è kɛ̀ a kóraŋ buu-saaƃai é tɛ́ ǹaa mɛi perei lòno. Díkelee díkɛ̀ a kpakolo wála buu saaƃa káo lɔ́ɔlu mɛi saaƃa (38,000).

⁴ È mò ǹyɛɛi, “Ǹûa wála buu feerɛ káo naaŋ (24,000) ŋí ƃé pâi kɛ̂i tíi kɛ̂i Yâwɛɛ ŋɔpɛ́rɛi mu. Dí wála lɔ́ɔlu mɛi da (6,000) ƃé pâi kɛ̂i a dílaa-ƃelai da mɛni-sâa ƃó-ƃelai.

⁵ Dí wála náaŋ (4,000) ƃe pâi kɛ̂i ziɣãŋ láƃelei mɛi kâai. Dí wála náaŋ (4,000) ƃé pâi kɛ̂i laa-maa tɛ̂ tɛɛ̂i Yâwɛɛ pɔ́ a ŋ̀ále sãai ŋá gbɛtɛ a gɛ́ɛ ŋa laa-maa tɛ̂ tɛ̀ɛ la bɔ́i tíŋ.”

⁶ Nya ƃe Gâloŋ Deeƃé è díŋa-kɔ̀lɛ a díkpulu yɛ̂ɛ berei Liiva ǹônii-sinaai díkɛ̀ lai: Gɛsɔŋ, Koa, da Melali.

⁷ Gɛsɔŋ ǹônii-sinaai ƃé kɛ̀ a: Ladaŋ da Simei.

⁸ Ladaŋ ǹônii-sinaai díkɛ̀ saaƃa: Zeiɛ, nyíi kɛ̀ a dílaa-tuɛ nuui da Zɛtaŋ da Zooɛ.

⁹ Simei ǹyaa máŋ ǹônii-sinaai díkɛ̀ saaƃa: Selomɔ, Aziɛ da Araŋ. Dia ƃé kɛ̀ a dínâŋ Ladaŋ ŋɔsuui su-ƃelai láa túɛ-ƃela.

¹⁰ Simei ǹônii-sinaai díkɛ náaŋ: Zaɣa, Zina, Zeusi da Bɛria.

¹¹ Zaɣa ƃé kɛ̀ a dílaa túɛ-nuui, Ziza kɛ́ ƃò a gɔlɛ ma nuu. Kɛ́lɛ Zeusi da Bɛria dífe nîa-pɛlɛɛ támaa maa sɔlɔ ƃó ni. M̀ɛni ma dí dílòno nɔ́ a núu-suu tɔnɔ.

¹² Koa ǹônii-sinaai díkɛ náaŋ: Amaraŋ, Iza, Iburɔŋ da Uziɛ.

¹³ Amaraŋ ǹyaŋ ǹônii-sinaai ƃé kɛ̀ a Eelɔŋ da Mose. Dí Eelɔŋ siɣe zu a gɛ́ɛ gɛ́ zãa maa-waa-ŋai mɛi kâa. Dí ǹônii-sinaai siɣe zu a gɛ́ɛ díkɛ kéreŋ sɛŋ kúŋ-nɛ̃ɛ kereŋ Yâwɛɛ ŋɛ́i-tuɛ a ɣele kélee, díkɛ tíi kɛ mi, díkɛ ŋɔlûwai láa seri ǹûai dîa.

¹⁴ Kɛ́lɛ dí Ɣâla ŋɔnuui Mose ǹônii-sinaai láa siɣe Liiva-ŋai dínuu-suui sáma.

¹⁵ Mose ǹônii-sinaai ƃé kɛ̀ a Gɛsɔŋ da Iliezɛ.

¹⁶ Gɛsɔŋ ǹyaŋ ǹônii-sinaai láa túɛ-nuui ƃé kɛ̀ a Sebuɛ.

¹⁷ Iliezɛ ǹyaŋ ǹóŋ è kɛ̀ nɔ́ tɔnɔ. Ǹáa ƃé kɛ̀ a Leɣabia. Ǹônii-sinaai díkɛ̀ a dítamaa.

¹⁸ Koa ǹóŋ-surɔŋ veerɛi, Iza ǹóŋ-surɔŋ láa ƃé kɛ̀ a Silomi. Ǹyaa ƃé kɛ̀ a ǹúu-suui kpîŋ láa túɛ-nuu.

¹⁹ Koa ǹônii-sinaai zaaƃa ɣelei láa ƃé kɛ̀ a Iburɔŋ. Iburɔŋ ǹônii-sinaai díkɛ̀ náaŋ: Zeria, Amaria, Zaaziɛ da Zekamiaŋ.

²⁰ Koa ǹóŋ surɔŋ ǹáaŋ ɣelei Uziɛ ǹóŋ-surɔŋ m̀aa-ŋuŋ ƃé kɛ̀ a Maka. Veerɛ ɣelei ƃé kɛ̀ a Isia.

²¹ Melali ǹônii-sinaai díkɛ̀ feerɛ: Maali da Musi. Maali ǹyaŋ ǹônii-sinaai ƃé kɛ̀ a Ilieza da Kesi.

²² Ilieza fé lóŋ-surɔŋ maa sɔlɔ ƃó ní. Lônii-nɛyaa nɔ́ ƃe è dímaa sɔlɔ ƃò gɛ̀ sâa. Díkaayɔɔ-ŋai kɛ̀ Kesi ŋɔsuui sui ƃé díkùla a dínɛyâa.

²³ Musi ǹônii-sinaai díkɛ̀ saaƃa. Maali, Ɛdɛ da Zeremɔ.

²⁴ Liiva ŋɔnúu-suui su-ƃelai ká ŋí kɛ̀ yɛ̂ɛ berei díkoli-ŋai díkaa-laa-ŋai díkɛ̀ lai. Dí díkelee dílòno dílaa ma é siɣe kóraŋ buu feerɛ-ƃela dîa é tɛ́ ǹaa mɛi pere. Dí dílɛ̀ a gɛ́ɛ díkɛ a Yâwɛɛ ŋɔpɛ́rɛi lá tii kɛ́-ƃela da-ŋa.

²⁵ Deeƃé è mò ǹyɛɛi, “Eezuɛ-ŋai Díɣâlai Yâwɛɛ a lii-see tɛɛ ŋɔnûai pɔ́. A pâi seêi Zerusâlɛŋ wɔ́lɔ-wɔlɔ da wɔ́lɔ-wɔlɔ.

²⁶ M̀ɛni ma Liiva-ŋai dífa ŋɔ́nɔ zua-kɔlɔ-seɣe pɛrɛi siɣe kpaa máŋ mu sãa da siɣe dí lí la kpaa máŋ dí tíi tá kɛ́ m̀a.”

²⁷ É siɣe ŋ̀elei ŋí ma, dí Deeƃé wóo siɣe a gɛ́ɛ Liiva-ŋai da a sèri kóraŋ buu-feerɛ su é tɛ́ ǹaa mɛi pere, a pɔri tíi kɛ̂i Yâwɛɛ mi.

²⁸ Kɛ́lɛ, díi-ŋai da pɔri gɛ̂i ƃé kɛ̀ dí kpɔŋ Eelɔŋ ǹônii-sinaai dîa díkɛ tíi kɛ̀ Yâwɛɛ ŋɔpɛ́rɛi mu. Da pɔri kɛ̂i tíi kɛ̂i bɛ́rɛi láƃelei díkɛ loŋpo-ŋai mu kɔ̀ɔ. È kɛ̀ dîa a kpa a gɛ́ɛ zãai nyíi kélee da tíi kɛ̀ lai é kɛ́ a m̀aa-waa Ɣâla ŋɔpɛ́rɛi mɛ̂ni ma.

²⁹ Gáa kɛ̀ a sɛŋ dí kpɔŋ mâa tɛ̀ɛ gbólo maa-waai kpɛtɛ mɛ̂ni ma da felaƃai nyíi kɛ̀ m̀ii-sɛŋ kpoloi kpɛtɛ mɛ̂ni ma da dɛ́-sɛŋ-fe zu kpoloi kpɛtɛ mɛ̂ni. Dítii-ŋai da ƃé kɛ̀ a gɛ́ɛ dí zama-sɛŋ kpoloi kpɛtɛ da zama-sɛŋ nyíi kɛ̀ a zumoɔ́ɔ a wúlɔi. Dîa ƃa kâa zãai ŋí kélee kɔ̀ɔŋ.

³⁰ Dítii-ŋai da ƃé kɛ̀ a gɛ́ɛ díkɛ sɛɣɛ-fêi tɛ̀ɛ Yâwɛɛ pɔ́ díkɛ wule tòo m̀a a ɣele-wala da ɣele-wulii kélee.

³¹ Da kâa wule tòo Yâwɛɛ m̀a da kɛ̀ kéreŋ sala kulâi m̀a a Vii-tɔɔ-ɣelei, Ŋ̀áloŋ Ninai da gúu-ŋai da kpɛ́ni-ŋai kélee ŋ̀ele yɛ̂ɛ berei m̀aa nɛ̃ɛ̂i kɛ̀ dí gɛ́ la a ɣele kélee Yâwɛɛ ŋɛ́i-tuɛi.

³² Liiva-ŋai dítii ƃé kɛ̀ a gɛ́ɛ díkɛ zua-kɔlɔ-seɣe pɛrɛi da Ŋ̀âla-pɛrɛ Kɛ́tɛi mɛi kàa Yâwɛɛ ŋɛ́i-tuɛ. Díkɛ naa díkɛ̀ kpɔŋ mâa tɛɛ ŋ̀âla-fɛli mɛni-ŋai su díkaayɔɔ-ŋai kɛ̀ a Eelɔŋ ǹônii-sinaai yée mu.