Kɔlɔnikɔ Maa-ŋuŋ 20 - Ŋ̀âla Kɔlɔ Maa Waai

Deeƃé è Laba taa-leei sòŋ

¹ È kɛ̀ a fólo láa ƃóɔɔ tãi nyíi kâloŋ-ŋa da kâa lì la kɔ́ kɔ̂i. Ɣele tɔnɔ da Zoa è Eezuɛ kɔ-kûluƃa-ŋai sìɣe a gɛ́ɛ dí lí kɔ́ kɔ̂i. Dí lì dí Amɔŋ-ŋai dílɔii síɣe. Kɛ́lɛ Gâloŋ Deeƃé è lɛ̀ɛ Zerusâlɛŋ. Zoa è lì é pɛ́lɛ Laba taa-leei ma é naa sòŋ.

² Deeƃé kɛ́ɛ a pâi, è lì é díɣâla-pɔkɔɔŋ Maakɔŋ ŋɔkâloŋ ƃɔrɔi síɣe é zèe ŋ̀ûa. M̀ɔrɔi ŋí ŋɔwuyɛ è kɛ̀ a gôo ŋɔpãŋ buu lɔ́ɔlu mɛi feerɛ kao lɔɔlu. Kɔni-sɔ̃ɔ kpanaŋɔɔ è kɛ̀ m̀ɔrɔi ŋí ma. Deeƃé è ŋɔ́nɔ sãâ támaa sìɣe daai ŋí su.

³ Naa pôlu ma, Deeƃé è ŋɔ́nɔ daai su-ƃelai sìɣe é díkɛ a ǹyée mu-ƃela díkɛ tíi kɛ̀ mì. Díkɛ tíi kɛ̂i a wúru ƃéla kɔli, kɔli-kɔɔ-ŋa kɔlɔ da yûɔ-ŋa. Deeƃé è mɛni sîi tɔnɔi ŋí kɛ̀ a Amɔŋ-ŋai dítaa-ŋai kélee su-ƃela. Nya ƃe Deeƃé da ŋɔkɔ-kuluƃa-ŋai kélee dí lène pôlu dí lí Zerusâlɛŋ.

Eezuɛ-ŋai da Felesia namu-sirɛ-ŋai

⁴ Naa kɛ́ɛ tí, laa-sâa è tòo Eezuɛ-ŋai da Felesia-ŋai kɛ̀ Gezɛ díloai. Gɔ́i ŋí su ƃé Sibɛka nyíi kɛ̀ a Usa-nuui è Felesia-ŋai dínâmu-sirɛi nyíi da kâa dòli a Sipâi paa. Maa tãi tí ma dí Felesia-ŋai yée mɛi ɣâle.

⁵ Gɔ́i dɔnɔ è ŋɔ́nɔ tèe Felesia-ŋai da Eezuɛ-ŋai loai. Gɔ́i ŋí ŋɔtãi ƃé Zaɛ ǹóŋ Ɛɛanaŋ è Laami nyíi kɛ̀ a Gâa taa-leei su nuui Golaya ǹêɣe pàa naa. Laami ŋɔkpálai ŋuŋ è kɛ̀ yɛ̂ɛ seɣe-pala siɣãŋ tɔɔ wûru.

⁶ Naa pôlu ma, gɔ́i dɔnɔ è ŋɔ́nɔ tèe Gâa taa-leei su. Kɔ-kuluƃa tɔnɔ è kɛ̀ naa ǹyée-gbua è kɛ̀ puu káo feerɛ, gɔ́ɔ-gbua kɛ́ ƃò puu káo feerɛ. Ǹalôŋ ŋí è kɛ̀ a gɔ-kuluƃa-ŋai dísuui su-nuui dɔnɔ.

⁷ Báai, è Eezuɛ-ŋai maa fôo. Nya ƃe Deeƃé ǹêɣe Sama ǹóŋ Zonetaŋ è pà é bàa.

⁸ Ǹúu saaƃai ŋí Deeƃé da ŋɔkɔ-kuluƃa-ŋai dí dípaai, díkɛ̀ a Gâa taa-leei su kɔ-kuluƃa-ŋai dísuui su-ƃela.