Kɔlɔnikɔ Maa-ŋuŋ 11 - Ŋ̀âla Kɔlɔ Maa Waai

Dí Deeƃé lɛ̀ a Eezuɛ-ŋai díkâloŋ

¹ Naa pôlu ma, Eezuɛ-ƃelai kélee dí lì Deeƃé pɔ́-naa tãi è kɛ̀ la Iburɔŋ. Dí mò ma dîyɛɛi, “Kwa kâa-ni kúkaa a núu-suu tɔnɔ.

² Kú gɔ́lɔŋ tãi Sɔ̂ɔ è kɛ̀ la a kúkâloŋ, yá ƃé yà kâa tɔ̀ɔ kúkɔ-kuluƃa-ŋai láa túɛ ka dîa-ni kákɛ kúlɔii maa kɔ̃ɔ. Kú gɔ́lɔŋ a gɛ́ɛ Íɣâlai Yâwɛɛ è wɔ́lɔ góno tèe íyêei a gɛ́ɛ ya pâi kɛ̂i a ŋɔnûai láa túɛ-nuu.”

³ Eezuɛ nuu-pɔlɔ-ŋai dí pà Gâloŋ Deeƃé pɔ́ Iburɔŋ, è kpanaŋ-woo kɛ́ díyêei Yâwɛɛ ŋɛ́i-tuɛ. Dí nâa wúlɔ pú ŋ̀ûa dí gɛ̀ a díkâloŋ yɛ̂ɛ berei Yâwɛɛ è wɔ́lɔ góno tèe la Samia sarâi.

⁴ Naa kɛ́ɛ tíi, Deeƃé da Eezuɛ kɔ kɔ́-ƃelai dí lì dí kɔ́ pɛ́lɛ Zerusâlɛŋ taa-leei ma. Zerusâlɛŋ láa ƃé kɛ̀ a Zɛbusi. Naa ƃé Zɛbusi-ŋai kɛ̀ ǹɔii tí sui díseɛɛ è kɛ̀ naa.

⁵ Nya ƃe Zɛbusi-ŋai dí mò Gâloŋ Deeƃé ma dîyɛɛi, “Ífa pɔ̂ri serîi daai ŋí su.” Kɛ́lɛ Deeƃé è Zãiyɔŋ Yeei ŋɔkili tɔɔ maa kwaai ma sòŋ dí nàa láa sèe a Deeƃé ŋɔtaa-lêei.

⁶ Gɛ́ɛ tí, Deeƃé è mò ŋɔkɔ́ kɔ́-ƃelai dîa ǹyɛɛi, “Ǹúui pâi tɔɔ̂i gɔ́-kuluƃa-ŋai túɛ dí kɔ́ pɛ́lɛ Zɛbusi-ƃelai diai ǹyaa ƃé pâi kɛ̂i a ŋákɔ-kuluƃa-ŋai mɛi-nuu kɛ́tɛi.” Nya ƃe Zeruia ǹóŋ Zoa è kɛ̀ a m̀aa-ŋuŋ é lí é pɛ́lɛ ǹûai ŋí dîa. M̀ɛni ma dí nâa gɛ̀ a ǹúu kɛ́tɛi.

⁷ Deeƃé è lì é sée daai su. M̀ɛnii ŋí ƃé gɛ̀ díkɛ daai ŋí láa sèe a “Deeƃé Ŋɔtaa-lêei.”

⁸ È daai ŋí tɔ̀ɔ é siɣe ƃɛ́i dí gbotoloi láa fɛ̂ɛ naa a pɔ̂rɔi é seri ziɣãŋ ma. Zoa è daai ŋí m̀éla kpéli tɔ̀ɔ ŋɔ́nɔ pôlu.

⁹ Deeƃé ŋɔwála-wala-laai su è kɛ̀ nɔ́ kpanâni gɛ̀ li tuɛ pere, kpɛ́ni fêi, ŋ̀wála-wala kélee Yâwɛɛi è kɛ̀ bôlu.

Deeƃé ŋɔkɔ-kuluƃa-ŋai

¹⁰ Diai ŋí ƃé kɛ̀ a Deeƃé ŋɔkɔ-kûluƃa-ŋai láa túɛ-ƃelai. Ǹûai ŋí da Eezuɛ-ƃelai kélee ƃé wɔ́lɔ tɔ̀ɔ bôlu a gɛ́ɛ pɔri é kɛ́ mì é ǹɔii kélee sóŋ yɛ̂ɛ berei Yâwɛɛ è wɔ́lɔ mò la é pîlaŋ Eezuɛ mai dí gɛ́ ŋɔkâloŋ-laai su é kpanâŋ.

¹¹ M̀aa-ŋuŋ ƃé kɛ̀ a Zasobeaŋ. È kɛ̀ a Akimoŋ suui su nuu. Ǹalôŋ ŋí ƃé kɛ̀ a “Gɔ-kuluƃa wála-wâla ǹuu-kpulu Saaƃai” wála-wâla-ŋai láa túɛ-nuui. È kɔ̀ kpakolo ŋuŋ saaƃa pɔ́ a ŋɔƃóa-sɔkpɔi é gélee páa kɔ́ tɔnɔ su. Ǹúu saaƃai ŋí ƃé kɛ̀ a Deeƃé ŋɔkɔ-kuluƃa wála-wala-ŋai.

¹² Ǹúu saaƃa wála-walaai veerɛi ƃé kɛ̀ a Ilieza. Ilieza ŋí ǹâŋ láa ƃé kɛ̀ a Dôdo. Dôdo è kùla Ao ŋɔsuui su.

¹³ Ǹalôŋ ŋí da Deeƃé ƃé kɔ̀ Felesia-ŋai pɔ́ Pa-damiŋ. Dí gɔi ŋí kɔ́ bale kpalaŋ ŋá. Eezuɛ kɔkuluƃa-ŋai dí pú Felesia-ŋai yêei gwaai ŋí ma.

¹⁴ Kɛ́lɛ Deeƃé da Ilieza dí lɛ̀ɛ dítɔɔ̂i bale kpalaŋ sâmai. Dí lɛ̀ɛ naa é lɛ́ɛ la zu dí Felesia-ŋai yée mɛi ɣále. M̀aa ɣelei tí Yâwɛɛ è tɔɔ dípôlu dí ǹûai yée mɛi ɣále.

¹⁵ Ɣele tɔnɔ ta, gɔ-kuluƃa saaƃa wála-wala-ŋai ŋí dí sìɣe dí lí Deeƃé pɔ́-naa Adulaŋ Kɔni-woloi kɔlɛ. Ǹúu saaƃai ŋí dí kùla Deeƃé ŋɔkɔ-kuluƃa wála-wala buu-saaƃai sáma. M̀aa tãi tí yée mu, Felesia-ŋai dí pà dí díƃûu pú Lefaiŋ tiŋ-tiŋ su.

¹⁶ Tãi ŋí yée mu, Deeƃé è kɛ̀ ŋɔloo kwaai ma. Felesia-ŋai dia máŋ díkɛ̀ Bɛpeleɣɛ̃ɛ.

¹⁷ Kpele wɛ̂li è Deeƃé sòŋ a ŋánaa. Nya ƃe è mò ǹyɛɛi, “Núu da fêi kɛ̀ naa é yá kɔ́ɔ ǹya-loai su Bɛpeleɣɛ̃ɛ siɣãŋ kɔlɛ é dɛɛ ḿbɔ ŋá gbele.”

¹⁸ Gɔ-kûluƃa saaƃai ŋí kɛ̀ gɔlɛ ma dí dí mu-sìɣe dí lí ƃɛ́i Felesia-ŋai díkɛ̀ naai dí tɛ́ɛ dísama a wála-wala-laa dí ǹyái kɔ́ɔ dí pá la Deeƃé pɔ́. Kɛ́lɛ vé gbele ni. È bù Yâwɛɛ mì a sâla sɛŋ,

¹⁹ é m̀ó ǹyɛɛi, “Ɣâla fé m̀ɛni a dɔnɔ kpîŋ a gɛ́ɛ ŋá nyíŋi kɛ́. Ŋa ǹyai ŋí kpêle, a pâi kɛ̂i yɛ̂ɛ ǹûai ŋãa kpeleɛɛ nyii-ŋai dífulu-laai kɔ̀lɛ a gɛ́ɛ dí ǹyái ŋí kɔ́ɔi.” Deeƃé fé ǹyái ŋí kpele ní, kpɛ́ni fêi, ǹúu saaƃai ŋí dí dífulu-laai sèe a sɛ́ɣɛ dí lí dí pá pôlu. Bere sîi ŋí ƃé “Ǹúu wála-wala saaƃai” ŋí dí díwala-wala-laai lɛ̀ la.

²⁰ Zoa ǹêɣe Abisai ƃé kɛ̀ a ǹúu-buu saaƃai láa túɛ-nuu. Ǹalôŋ ŋí ǹyaa tɔnɔ è núu ŋ̀uŋ saaƃai (300) pàa kɔ́ tɔnɔ su. M̀ɛnii ŋí ƃé gɛ̀ díkɛ ƃaa kɛ́-maa támaa tɛ̀ɛ bɔ́ naa yɛ̂ɛ gɔ-kuluƃa wála-wala saaƃai.

²¹ È kɛ̀ a nuu buu saaƃai láa tuɛ nuui. Ŋɔƃaa kɛ́-maai è kɛ̀ nɔ́ yɛ̂ɛ gɔ-kuluƃa saaƃa wála-wala-ŋai, berei máŋ vé kɛ́ ní la a dítai.

²² Zioada ǹóŋ Bɛnaya è kɛ̀ a gɔ-kuluƃa wála-walai dɔnɔ. È lii-kpêle mɛni támaa kɛ̀. Zeoiada è kula Kazii ŋɔsuui su. È Môa-ƃela wála-walaa feerɛi pàa. Kɔ́lɛ ɣele tɔnɔ da è lɔ̀ lóa kɛ́tɛ tɔnɔ su é yala-sulu tɔnɔ paa naa.

²³ Bɛnaya ŋí è wɔ́lɔ Ize naloŋ tɔnɔ pàa a gbɔ́ɔi kpala. Ǹaloŋ ŋí ŋɔmu sîɣe è kɛ̀ a kɔ́ɔ ƃɔ́rɔni lɔ́ɔlu mɛi-feerɛ da gbura. Kpála kɛ́tɛ maa pɔlɔ-pɔlɔɔ tɔnɔ è kɛ̀ ǹyêei. Da Benaiya díkɛɛ kɔ̂i, Benaiya è gbálai lòkwa ǹyêei a wuru gbua kɛ́tɛ tɔnɔ é gula ǹyêei. Benaiya è ǹalôŋ kpɔ́ɔi kpalai sìɣe é bàa la.

²⁴ Bɛnaya ŋɔƃaa kɛ́-maai è kɛ̀ a nɔ́ yɛ̂ɛ gɔ-kuluƃa saaƃa wála-wala-ŋai dɔnɔi.

²⁵ Ǹalôŋ ŋí ŋɔƃaa kɛ́-maai è kɛ̀ a gɛ́tɛ ǹúu wála-wala buu saaƃai sáma. Kɛ́lɛ ŋɔwála-wala laai fé kɛ̀ ní a zeriɛ́ɛ gɔ-kuluƃa saaƃa wála-wala-ŋai díwɔ̂i pɔ́. Ǹalôŋ ŋí ƃé Deeƃé è wɔ́lɔ dɔ̀ɔ ŋɔkɔ-kuluƃa-ŋai kɛ̀ m̀ɛi kâai láa-tuɛ.

^26-47 Diai ŋí ƃé kɛ̀ a gɔ-kûluƃa tɔɔ̂i kpanaŋɔɔ-ŋai: Zoa ǹêɣe Asaɛ Bɛpeleɣɛ̃ɛ nuui Dôdo ǹóŋ Ɛɛanaŋ, Ɛrɔ nuui Samɔ Pilɔŋ nuui Ɛlɛzi Tikoa nuui Ikesi ǹóŋ Ira Anatɔ nuui Abiezɛ Usa nuui Sibɛka Ao nuui Ilai Nɛtofa nuui Maarai Nɛtofa nuui Bɛnaya ǹóŋ Ɛlɛ Libai kùla Giƃia, Bɛŋsima ŋɔlɔii-kpîniŋ sui ǹóŋ Itai Paratɔŋ nuui Bɛnaya Urai nyíi kùla Gaasi tiŋ-tiŋ sui Aba nuui Abiɛ Bauruŋ nuui Azimavɛ Saabɔŋ nuui Ɛɛliaba Gisɔŋ nuui Asɛŋ Sagee kùla Arari ǹóŋ Zonetaŋ Arari nuui Saka ǹóŋ Abiaŋ Ɔ̂ɔ ǹóŋ Ilifaa Mekɛra nuui Ɛfɛ Pelɔŋ nuui Aiza Kamɛɛ nuui Ɛzilo Ɛziba ǹóŋ Naara Netaŋ ǹêɣe Zooɛ Agiri ǹóŋ Miba Amɔŋ nuui Zɛlɛ Bɛɛrɔ nuui Naarai nyíi kɛ̀ a Zɛrua ǹóŋ Zoa ŋɔkeŋe-la kɔli-kalaŋ siɣe-nuui Itilai-ƃelai Ira da Galɛ Ita nuui Yuraya Alai ǹóŋ Zaba Lubiŋ ŋɔsuui su-nuui Siza ǹóŋ Adina, nya ƃé kɛ̀ a Lubiŋ ŋɔsuui su-ƃelai láa túɛ-nuui é pɛ́lɛ ǹúu buu-saaƃai kɛ̀ bôlui Maaka ǹóŋ Anaŋ Mitaŋ nuui Zosafa Asitɛla nuui Uzia Aloɛ nuui Otaŋ ǹônii-sinaai sáma da Zɛiɛ Simiri nyíi kùla Tizi ǹônii-sinaai Zediaɛ da Zoɣa Maava nuui Iliɛ Ɛɛnaaŋ ǹônii-sinaai Zeliba da Zosavia Môa nuui Itima Iliɛ Mizoba nuai Iliɛ Obɛ da Zaasiɛ.