दहदर मंजका कत्‍था 8 - पुना गच्छरना NT (BSI)

सातवाँ मरका

¹ भेंडो ख़द्द मसीस सातवाँ मरकन ख़च्‍चियस ख़ने, मलागूटी अदहा घंटा मेर्ख़ा नू सुन्न मंजा केरा।

² अरा ऎन धर्मेसी मुन्दहारे इज्‍जका र'अनर अबड़ा सतियो मेर्ख़ा पैकारिन ईरकन, अरा आर गे सात गोटा पेंड़हे चीतारा।

³ अरा अउर ओन्टा मेर्ख़ा पैकस सोना ही धूप कुहुड़'अना मौनीन धरचस ती बरचस, अरा आस गोड़हा गुसन इज्‍जस। अरा आस गे बग्‍गे धूप चीतारा का आस बॆल-गदिया ही मुन्दहारे र'अना सोना ही गोड़हा नू उर्मी नेम्हा आलर ही गोहरारना गुट्ठी गने धूप कुहुड़'ओस।

⁴ अरा मेर्ख़ा पैकासी ख़ेक्खा ती धूप ही कुहड़ा नेम्‍हा आलर ही गोहरारना गुट्ठी गने मइय्याँ अर्गिया अरा धर्मेस गुसन अंड़सिया।

⁵ फेन मेर्ख़ा पैकस धूप कुहुड़'अना मौनीन होच्‍चस ती गोड़हा ता चिच्‍चिन नुल्लियस अरा ख़ॆख़ेल नू तुन्दियस चिच्‍चस, ख़ने मुर्रना चाड़ना गुट्ठी, अरा ख़रख़ना गुट्ठी, अरा लवका लौकारना गुट्ठी, अरा ख़ॆख़ेल नु‍कुरना मना हेलरा।

पेंड़हे गुट्ठी ही ऊरना

⁶ फेन अबड़ा सतियो मेर्ख़ा पैकर नॆख'आ गुसन सतियो पेंड़हे रहचा आर ऊर'आ गे सपड़ारर।

⁷ अरा मुन्द ता मेर्ख़ा पैकस पेंड़हे ऊरचस ख़ने, ख़ॆंस गने मेस्रका आली अरा चिच्‍ची मंजा, अरा ख़ॆख़ेल नू तुन्दतारा। ख़ने ख़ॆख़ेल ही तीन ती ओन भाग उल्‍लिया केरा, अरा मन्न गुट्ठी ही तीन ती ओन भाग हूँ उल्लिया केरा, अरा उर्मी हरियर लट्टी हूँ उल्‍लिया केरा।

⁸ अरा दोसर मेर्ख़ा पैकस पेंड़हे ऊरचस ख़ने, चिच्‍ची लघरना लेक्‍खा ओन्टा कोहाँ परता समुदर नू हेबड़तारा। अरा समुदर ही तीन ती ओन भाग ख़ॆंस मंजा केरा।

⁹ अरा समुदर ही उज्जना आलॊ तीन ती ओन भाग केच्‍चा केरा। अरा तीन ती ओन भाग कोहाँ डोंगा नठारा केरा।

¹⁰ अरा तिसर मेर्ख़ा पैकस पेंड़हे ऊरचस ख़ने, ओन्टा कोहाँ बीनको होरा लेक्‍खा लघरना ती मेर्ख़ा ती किच्‍चरा, अरा ख़ाड़ गुट्ठी ही तीन ती ओन भाग नू अरा अम्मु पझरा गुट्ठी नू खत्रा।

¹¹ अरा आ बीनको ही नामे ख़ड़ख़ा बार'ई। अरा तीन ती ओन भाग अम्मु ख़ड़ख़ा मंजा केरा, अरा ख़ड़ख़ा अम्मन ओन्ना ती बग्‍गे आलर केच्‍चर केरर।

¹² अरा चौथा मेर्ख़ा पैकस पेंड़हे ऊरचस ख़ने, तीन ती ओन भाग बीड़ी, अरा तीन ती ओन भाग चन्‍दो, अरा तीन ती ओन भाग बीनको नठारा। औंगे अबड़ा नू तीन ती ओन भाग ऊख़ा मंजा केरा। अरा तीन ती ओन भाग उल्‍ला नू अरा तीन ती ओन भाग माख़ा नू बिल्‍ली मल रहचा।

¹³ फेन ऎन ईरकन का मेर्ख़ा ही मझी नू ओन्टा गरुड़ उढियार'आ लगिया, अरा आद जॊरसरिया एन्ने ब'अना मेंजकन, “बछ्रका नन्ना तिनियों मेर्ख़ा पैकर ऊरना र'ई, आ पेंड़हे ऊरना ती ख़ॆख़ेल ता आलर मइय्याँ बोख़ बोख़ बोख़!”