मरकुस 11 - पुना गच्छरना NT (BSI)

येरुसलॆम नू येसुस जितचका बॆलस बेसे कोरदस

¹ येसुस अरा आसी चेलर येरुसलॆम हेद्दे बर'आलियर। ख़ने आर बॆतफगे अरा बेतानिया पद्दा नू बरचर। इबड़ा प‍द्दा जैतून मन्न परता ही ढेंरंगा नू र'ई। येसुस तंग्‍है चेलर ती ऎनोटा चेलारिन त‍इय्‍यस

² अरा आरिन बाचस, “मुन्‍दहारे ता पद्दा नू कला, अइय्‍या कोरना गनेम ओन्‍टा गदही ही ख़द्दो खुटुरका ख़क्ख्र'ओ, अइय्‍या नॆ हूँ मल्‍ला अरगका, अदिन बिछर'आ ती एंग्‍है गुसन ओन्‍द्र'आ।

³ नीम एन्‍देर ननालदर? एन्ने नीक‍ईम निमन मेनोर होले, नीम ब'अके, उर्बस गे इदही चाड़ र'ई, अरा आस इदिन लेथेम किर्त'ओस चि'ओस।”

⁴ ख़ने अबड़ा दुयो चेलर केरर, अरा गदही ख़द्दोन बहरी बली गुसन बखड़े नू खुटुरका ख़क्‍खियर, अरा अदिन बिछरर।

⁵ असन नॆ नॆ इज्जका रहचर आर आरिन मेंजर, “नीम एन्‍देरगे गदही ख़द्दोन बिछर'आलदर?”

⁶ अबड़ा चेलर आरिन येसुस एन्‍देर ब'आ गे आनकाचस अन्नेम बाचर। ख़ने अबड़ा आलर आरिन गदही ख़द्दोन हो'आ गे चिच्‍चर।

⁷ अबड़ा चेलर गदही ख़द्दोन येसुस गुसन ओन्‍द्रर, अरा अदही म‍इय्‍याँ तंग्‍है म‍इय्‍याँ अत्तना ही किचरिन नंजर, अरा येसुस अइय्‍या उक्‍कियस।

⁸ ख़ने नगदे आलर तम्‍है किचरिन डहरे नू अट्टियर, अरा नन्नर ख़ल्ल गोड्डा ता डहुड़न खं‍डरकी डहरे नू बींडचर। एन्ने आसिन म‍ईन नंजर।

⁹ आसी मुन्‍द ईकुर अरा ख़ॊख़ा ईकुर चिच्चि‍यारनुम बाचर, “धर्मेसी महबा मनन! धर्मेस ईसिन बरकत नन्‍दस नॆ उर्बासी आकुस गने बरदस।

¹⁰ धर्मेस निंगन बरकत नन्‍दस नेक‍अन, नॆ पूरखा दाऊद बॆलस बेसे राजी ननोस। उर्मी ती म‍इय्याँ मेर्ख़ा नू र'ऊ धर्मेसी महबा मनन।”

¹¹ एन्नेम येसुस येरुसलॆम नगरे अंड़सियस अरा धर्मेसी मन्दिर चाली नू कोरचस, अरा चरियो तरा उर्मी आलॊन ईरियस। बीड़ी पुत्तालिया ख़ने आस तंग्‍है बारा चेलर गने बेतानिया किरिम बिचियस।

येसुस अंजीर मन्नन सरपाचस

¹² दोसर उल्‍ला येसुस अरा आसी चेलर बेतानिया ती उरखर। आ बारी आस गे कीड़ा लग्‍गिया।

¹³ आस गेच्‍छा ती ओन्‍टा झपूर्रा अंजीर मन्नन ऎररकी हेद्दे केरस का अइय्या ती ख़ंजपा इन्द्रिइम ख़क्‍खोस। लिकिन आस अतख़न अम्‍बरकी एन्‍द्रन हूँ मल ख़क्‍खियस, एन्‍देरगेका ईद अंजीर ही ख़ंजना ही बेड़ा मल रहचा।

¹⁴ ख़ने आस आ मन्नन बाचस, “नीन इकला हूँ मल ख़ंज'ओय। ख़ने अक्‍कु ती निंग्‍है ख़ंजपन नॆ हूँ मल मॊख़ोर।” आसी ई ब'अनन चेलर हूँ मेंजर।

येसुसी धर्मेसी मन्दिर आबोन सफा नन्ना

¹⁵ येसुस अरा आसी चेलर येरुसलॆम किर्रियर ती आस धर्मेसी मन्दिर चाली नू कोरचस। असन आलर दाँड़े नन्ना ही मेक्‍खोन ख़ॆंदा पिटालियर। ख़ने येसुस आरिन अइय्या ती बहरी ओथ्र'आ हेलरस। अरा रोम राजी ता ढिबन धर्मेसी मन्दिर ही ढिबा नू बदलुर ही कं‍डोन, अरा पेरवाँ बीसुर ही मचियन हूँ बिड़दाचस चिच्‍चस।

¹⁶ अरा इन्द्रिइम जिनिसन बीसा गे हो'अरकी धर्मेसी मन्दिर चाली नू काला बर'आ गे नॆकन हूँ मल चिच्‍चस।

¹⁷ तहाँ आस अबड़ा आलारिन सिखाबाचस, अरा बाचस, “नेम्हा पुथी नू ईद एन्ने लिख्रकी र'ई का, ‘एंग्‍है मने र'ई का एंग्‍है एड़पन उर्मी जातियर एंगन ओहमा नन्ना अरा बिन्‍ती नन्ना ही एड़पा ब'ओर।’ लिकिन नीम इदिन डाकुर ही अड्डा कमचका चिच्कादर।”

¹⁸ येसुस एन्‍देर नंजस अदिन मुध नैगर अरा नॆग सिखाब'उर मेंजर। ख़ने आर आसिन पिटा गे बेड़ा बेद्दते र'आलियर। आर गा आसिन एल्चालियर, इदगेका गोंहड़ा आसी सिखाब'अना ती अकबकरा केरा।

¹⁹ बीड़ी पुत्तना गनेम येसुस अरा आसी चेलर नगरे ती बहरी किर्रिम बिच्‍चियर।

ख़ैका अंजीर मन्‍न ती सिख्रना

²⁰ दोसर उल्‍ला पैरी बारी आर किर्रालियर, ख़ने आर आ अंजीर मन्नन पादा गूटी ख़ैका ईरियर एकदन येसुस सर्पाचका रहचस।

²¹ पतरस सुरताचस का येसुस मुन्‍द उल्‍ला ई मन्‍नन एन्‍देर बाचका रहचस। अरा आस येसुसिन बाचस, “अना गुरु! ऎरा, ई अंजीर मन्नन, एकदन नीन सर्पाचकय, आद ख़ैकी किरकी र'ई।”

²² ख़ने येसुस चेलारिन आनाकिर्त'अर बाचस, “धर्मेस म‍इय्‍याँ पत्त'आ का आस एन्‍देर नना गे नीम ने'अदर अदिन निमा ननोस।

²³ ऎन निमन ओन्‍टा मुदे कत्था ब'अदन, एक‍अम ओर्तोस ई परतन ‘नीन चडर'अय कलय अरा समुदर नू खत्तर'अय कलय’ ब'अरकी तंग्‍है जिया नू धुकुर पुकुर मल ननरकी ऎन एन्‍देर ब'अदन आद मनो अन्ने पत्त'ओस होले, धर्मेस आस गे अदन ननोस।

²⁴ औंगेम ऎन निमन ब'अदन का नीम निम्‍है बिन्‍ती नू इन्द्रिइम ने'ओर होले, अदिन पत्त'आ का ऎम ख़क्‍खोम। होले धर्मेस अदन निमा गे ननोस।

²⁵ इकल‍अम नीम बिन्‍ती नन्‍दर होले, निम्‍है जिया नू नॆख‍अम बिड़दो नू आर ही इन्द्रिइम अक्‍का-बलका र'ई होले आसिन छमा नना, होले निम्‍है मेर्ख़ा ता बंगस हूँ अन्नेम निम्‍है अक्‍का-बलकन छमा ननोस।

²⁶ [ लिकिन नीम नन्नारिन छमा मल ननोर होले निम्‍है मेर्ख़ा ता बंगस हूँ निम्‍है अक्‍का-बलकन छमा मल ननोस।” ]

येसुसी आकुस ही पत्त नू यहूदी मुद्ध आलर मेन्नर

²⁷ फिन येसुस अरा आसी चेलर येरुसलॆम मन्‍दिर नू बरचर। येसुस धर्मेसी मन्दिर ही चाली नू कुद्दा नुंगालियस, ख़ने मुध नैगर अरा नॆग सिखाब'उर अरा सेयान आलर आसी गुसन बरचर।

²⁸ आर आसिन मेंजर, “नीन इबड़ा नलखन नॆखा आकुस ती ननालदय?, अरा निंगा इबड़न नना ही आकुस नॆ चिच्‍चा?”

²⁹ येसुस आरिन बाचस, “ऎन हूँ निमन ओन्‍टा कत्‍था मेन्‍दन। अदिन किर्त'अर तेंगोर होले, ऎन हूँ निमन तेंगोन का ऎन इबड़ा नलखन नॆखा आकुस ती ननालदन।

³⁰ यॊहनस गे नॊड़रत'अना ही आकुस धर्मेस चिच्‍चस का आलर चिच्‍चर? अदिन एंगन तेंगा।”

³¹ आर ई पत्त नू ताम तामिम कछनख्रर। आर बाचर, “नाम धर्मेस आकुस चिच्‍चस अन्नेम ब'ओत होले, आस ब'ओस अन्नु हूँ नीम एन्‍देरगे यॊहनसिन मल पत्ताचकर।

³² अरा आलर आकुस चिच्‍चर अन्नेम ब'ओत होले, आलर ती इलचका र'ई। एन्‍देरगेका ओर्मर पत्ताचर का मानिम यॊहनस धर्मेस ती बरचका ओन्‍टा धर्मेसी कत्‍था तिंगुस रहचस।”

³³ ख़ने आर येसुसिन किर्त'अर बाचर, “ऎम बलदम।” ख़ने येसुस आरिन बाचस, “नीम एंगन मल तिंकर औंगे ऎन हूँ निमन मल तेंगोन इबड़ा नलखन नॆखा आकुस ती नन्‍दन।”