मत्तायोस 28 - पुना गच्छरना NT (BSI)

येसुसी उज्‍जा चो'अना

¹ ख़न्न ऎख़ना उल्‍ला मुंजियस ती हप्‍ता ही मुन्‍द उल्‍ला बिज्‍जा गनेम मरियम मगदलेनी अरा नन्‍ना मरियम मसड़न ऎरा बरचर।

² आ बारी कोड़हे ख़ॆख़ेल नुक्रना मंजा, एन्‍देरगेका उर्बासी ओन्‍टा पैकस मेर्ख़ा ती इत्तियस अरा मसड़ा हेद्दे बरचस ती पखनन ताड़चस अरा अइय्या उक्‍कियस।

³ आसी रूप बिजली लेक्‍खा अरा आसी किचरी कीबा लेक्‍खा पंडरू रहचा।

⁴ आसी इल्चका ती ख़ापुर असरा ख़च्‍चियर, अरा केचका लेक्‍खा मंजर केरर।

⁵ आ पैकस मुक्‍कारिन बाचस, “अमा एल्‍चा, ऎन अख़दन का नीम क्रुस नू ठोकचका नासरेत ता येसुसिन बेद्दालदर।

⁶ आस इसन मलकस, तंग्‍है बाचका लेक्‍खम आस केचका ती उज्‍जा चॊचकादस, बरा, आसी कीदका अड्डन ऎरा।

⁷ अक्‍कुन नीम लॆम कला ती आसी चेलारिन तेंगा का आस केचका ती उज्‍जा चॊचकादस। आस निमन ती मुन्‍द गलिलेया कालदस, असन नीम आसिन ऎरोर। ऎरा, ऎन निमन तिंका चिच्‍चकादन।”

⁸ अबड़ा मुक्‍कर इल्चका अरा रिझ गने मसड़ा ती लॆम किर्रियर ती येसुसी चेलारिन इदन तेंगा गे बुंगनुम केरर।

⁹ आचका येसुस आरिन भेंट मंजस अरा बाचस, “जोहार,” अबड़र हेद्दे बरचर ती आसी ख़ेड्डेन धरचर ती ऒड़ लगियर।

¹⁰ ख़ने येसुस आरिन बाचस, “अमा एल्‍चा, एंग्‍है भईरिन कला ती तेंगा का गलिलेया किर्रिमबि'ओर, असन एंगन ऎरोर।”

ख़ापुर ही अरो

¹¹ अबड़ा मुक्‍कर काला लगियर ख़ने, ख़ापुर ती जोक्‍कोर नगरे नू बरचर ती मुध नैगारिन उर्मी हलन तिंगियर।

¹² ख़ने मुध नैगर सेयान आलर गने भेंट मंजर ती सलहा नंजर। अरा आर अबड़ा सैनर गे बग्‍गे ढिबा चिच्‍चर ती बाचर,

¹³ “एन्ने ब'अके का, ‘माख़ा बारी ख़न्‍द्र'आ लिक्‍कम ख़ने, आसी चेलर बरचर ती आसिन ख़ड्डर होच्‍चर।’

¹⁴ ई कत्‍था राजीख़ापुस गूटी अंड़सो होले, ऎम आसिन बुझाब'ओम अरा निमन सस्‍ती ती बछाब'ओम।”

¹⁵ औंगे आर ढिबा होच्‍चर ती एकासे बाचका रहचर अन्‍नेम नंजर। ई कत्‍था इन्ना गूटी यहूदी आलर नू बींड़रकी र'ई।

येसुसी ऎथ्रना अरा छेद्दे पॆसका

¹⁶ तहाँ ग्यारा चेलर गलिलेया नू येसुस आरिन तिंकाचस आ परता नू केरर।

¹⁷ आर येसुसिन इरियर ख़ने, आर आसिन ऒड़ नंजर, लिकिन नॆका नॆका धुक-पुक मंजा।

¹⁸ तहाँ येसुस आर ही हेद्दे बरचस ती बाचस, “मेर्ख़ा अरा ख़ॆख़ेल नू उर्मी अदिया एंगा चीरकी र'ई।

¹⁹ औंगे नीम कला अरा उर्मी राजी ता आलारिन चेला कम'आ अरा आर गे धर्मे बबस अरा ख़द्दस अरा नेम्‍हा बॊलतासी नामे ती नॊड़रत'आ,

²⁰ अरा आरिन उर्मी कत्‍था एकदन ऎन निमा पॆसकादन, मन'आ गे सिखाब'आ। अरा ऎरा, ऎन उर्मी उल्‍ला ख़ॆख़ेल ही मुं‍ज्रना गूटी निम्‍है गने र'अदन।”