Zebûr 4 - Kurmanji Încîl

Zebûr 4

Bi sazên bi têl, Zebûra Dawid

¹ Gava ku min li te kir hawar, Bersîva min bide, ey Xwedayê min! Ji tengahiyan, tu derîne firehiyan, Li min were rehmê, goh bide dua min.

² Ey mirovno, hûnê heta kîngê, Rûmeta min vegerînin şermê? Hûnê heta kîngê, ji tiştê vala hez bikin, Û bi pey derewan bikevin?

³ Bizanin ku Xudan, yê dîlsoz ji bo xwe veqetandiye, Kengê ez bang bikimê, ew min dibihîze.

⁴ Ji hêrsê bilerizin; belê guneh nekin. Di nav nivînên xwe de kûr li ser vê yekê bifikirin, hiş bin.

⁵ Qurbanên rastiyê bidin, Bi Xudan ewle bin.

⁶ Yên ku dibêjin «Wê kî bi me qenciyê bike?» gellek in. Bi ronahiya rûyê xwe, me ronahî bike ya Xudan!

⁷ Te şahiyek wisa kir dilê min, wisa pirr, Ji ya ku ew, ji firehiya genim û şeraba teze distînin bêtir.

⁸ Ezê bi aştî xwe vezelînim û rakevim, Çimkî tenê tu, ya Xudan, Di ewlehiyê de min didî rûniştin.