Zebûr 24 - Kurmanji Încîl

Zebûr 24

Zebûra Dawid

¹ Dinya û hemû kesên ku tê de ne, Ruyê erdê û tijebûna wê, ya Xudan e.

² Çimkî wî ava kir ew li ser deryayan, Da sekinandin li ser çeman.

³ Kî dikare derkeve çiyayê Xudan, Û raweste li cihê wî yê pîroz?

⁴ Ew zilamê ku destê wî paqij û dilê wî pak e, Dilê wî neketiye pey derewkarî, Û ne jî sond xwarî bi hîlekarî.

⁵ Ew ji Xudan pîroziyê, Ji Xwedayê rizgarkirina xwe mafdariyê distîne.

⁶ Yên weha ji wî nifşî ne ku li wî digerin, Ew gelê Aqûb in ku li riya Xudan digerin.

⁷ Ey derîno, serê xwe bilind kin! Vebin, ey deriyên kevin! Da ku Padîşahê berz têkeve hundir!

⁸ Ma kî ye ev Padîşahê berz? Ew Xudan e, hêzdar û pêkar Ew Xudan e, di şer de mêrxas.

⁹ Ey derîno, serê xwe rakin! Vebin ey deriyên kevin! Da ku Padîşahê berz têkeve hundir!

¹⁰ Ma kî ye ev Padîşahê berz? Ew e Xudanê artêşên ezman, Ew e Padîşahê berziyê.