Zebûr 113 - Kurmanji Încîl

Zebûr 113

¹ Pesnê Xudan bidin! Pesin bidin, ey evdên Xudan, Pesnê navê Xudan bidin!

² Ji niha heta her û her, Bila pîroz be navê Xudan!

³ Ji derketina rojê heta çûna wê ya ava, Hêjayî pesindanê ye navê Xudan!

⁴ Xudan li ser tevahiya miletan serwer e, Û berziya wî li ser ezmanan e.

⁵ Ma kî wek Xudan Xwedayê me ye? Li jorê rûdinê.

⁶ Xwe ditewîne, Da ku erd û ezman bibîne.

⁷ Ew yê ketî ji erdê radike, Yê hejar ji ser sergo bilind dike;

⁸ Da ku gelê wî bi mîran re, Bi mîrên gelê xwe re rûnê.

⁹ Ew malê dide jina stewr, Wê dilşa dike û dike dayika zarokan. Pesnê Xudan bidin!