Padîşah II, 12 - Kurmanji Încîl

Yoaşê Padîşahê Cihûdayê perestgehê nû dike

¹ Gava Yoaş bû padîşah heft salî bû. Wî di heft saliya padîşahiya Yêhûyê Padîşahê Îsraêlê de bû Padîşahê Cihûdayê. Wî li Orşelîmê çil salan padîşahî kir. Diya wî Sîvyaya Beêr-Şevayî bû.

² Wî di tevahiya rojên xwe de, tiştên di çavê Xudan de rast in kirin, çimkî Yehoyadayê Kahin hînî wî dikir.

³ Wî bi tenê bilindciyên perizînê ji holê ranekirin. Gel hê jî li bilindciyan qurban serjê dikirin û bixûr pêdixistin.

⁴ Yoaş ji kahinan re got: “Pereyê tevahiya pêşkêşiyên pîroz yê dikeve Mala Xudan, pereyê ji serjimariya her kesî û tevahiya pereyê bi dilxwazî dihat Mala Xudan,

⁵ bila kahin van pereyan ji peywirdarên xezîneyê bistînin û li Mala Xudan li nûkirina her dera xerabe xerc bikin.”

⁶ Heta bîst û sê saliya padîşahiya Yoaş, kahinan hê jî dest bi temîra Malê nekiribûn.

⁷ Li ser vê yekê Yoaşê Padîşah bi Yehoyadayê Kahin re gazî wan kahinên din kir û ji wan re got: “Hûn çima Malê nû nakin? Êdî ji peywirdarên xezîneyê pere nestînin, pereyên we standin li nûkirina Malê xerc bikin.”

⁸ Kahin razî bûn ku êdî ji gel pere nestînin û ew bi xwe Malê nû nekin.

⁹ Yehoyadayê Kahin rahişt sindoqekê û di deriyê wê de qulek vekir. Wî sindoq li ber gorîgehê, gava mirov dikeve Mala Xudan li milê rastê danî. Dergevan tevahiya pereyên hatine Mala Xudan xistin nava wê sindoqê.

¹⁰ Gava didîtin ku di sindoqê de pere gelek e, nivîsendeyê padîşah û Serkahin diçûn, pereyên li Mala Xudan dihejmartin û dixistin kîsikan.

¹¹ Pereyên dihatin jimartin, didan destên serkarên Mala Xudan. Wan jî ew didan necar û karkerên Mala Xudan

¹² û didan kevirbir û hosteyên dîwaran. Herwiha ji bo nûkirina Mala Xudan dar, kevirên qewartî û çi lazim bûya li wan xerc dikirin.

¹³ Lê ji pereyên hatina Mala Xudan, bi tasikên zîvîn, meqesên fitîlan, tas, borî û tiştên ku ne ji zêr û zîv hatine çêkirin nehat xerckirin.

¹⁴ Çimkî pere dane kesên ku dixebitîn û bi wan Mala Xudan nû dikirin.

¹⁵ Serkarên pere didan karkerên Mala Xwedê, ewqas dirust bûn ku kesek ji wan hesab nedipirsiya.

¹⁶ Pereyên pêşkêşiyên berdêlê û paqijiyê neanîn Mala Xudan, çimkî ew para kahinan bû.

Hazaêlê Padîşahê Aramê li dijî Orşelîmê radibe

¹⁷ Wê demê Hazaêlê Padîşahê Aramê rabû li dijî Gatê şer kir, ew stand û Hazaêl ji bo ku bistîne berê xwe da Orşelîmê.

¹⁸ Yoaşê Padîşahê Cihûdayê, tevahiya diyariyên pîroz ên ku padîşahên Cihûdayê; Yehoşafat, Yehoram û Ahazyayê bav û kalên wî, ew pîroz kiribûn, tevî diyariyên pîroz ên xwe, tevahiya zêrê xezîneyên Mala Xudan û qesrê standin û ew ji Hazaêlê Padîşahê Aramê re şandin. Hazaêl jî, ji Orşelîmê dûr ket.

¹⁹ Qewimînên din ên padîşahiya Yoaş û hemû kirinên wî di Nivîsa Qewimînên Padîşahên Cihûdayê de hatin nivîsandin.

²⁰ Xulamên Yoaş fen lê kir û ew li ser riya diçe Sîllayê, li Bêtmîlloyê kuştin.

²¹ Xulamên wî Yozavadê kurê Şîmat û Yehozavadê kurê Şomêr lê xist û ew mir. Wan ew li Bajarê Dawid, li ba bav û kalên wî veşart. Kurê wî Amatsya li cihê wî bû padîşah.