Methelokên 28 - Kurmanji Încîl

¹ Xerab, kes nede pey jî direve, Lê rast wekî şêrê ciwan ji xwe ewle ye.

² Gava welat serî radike, Serwer jî zêde dibin. Lê fêmdar pergalê didomîne.

³ Feqîrê ku zorê li belengazan dike, Wekî taviya baranê ye ku nên nahêle.

⁴ Kesên dev ji şerîetê berdidin, pesnê mirovên xerab didin, Lê kesên şerîetê pêk tînin, li dijî wan derdikevin.

⁵ Xerab ji edaletê fêm nakin, Lê kesên li Xudan digerin, bi kamilî fêm dikin.

⁶ Feqîrê riya kamil, Ji dewlemendê riya xwar, çêtir e.

⁷ Kesê şerîetê pêk bîne, kurekî fêmdar e, Lê hevalê mirovên têrnexwar, bavê xwe rezîl dike.

⁸ Kesê bi faîz û selefxwariyê hebûna xwe zêde dike, Wî ji bo kesê li ber belengazan dikeve, kom dike.

⁹ Kesê guhê xwe nade şerîetê, Duaya wî jî kirêt e.

¹⁰ Kesê berê dilrastan dide riyên xerab, Wê bi xwe bikeve çala ku kolaye, Lê qencî, mîrasa mirovên kamil e.

¹¹ Dewlemend di çavê xwe de şehreza ye, Lê belengazê fêmdar dilê wî dixwîne.

¹² Gava rast bi ser dikevin, berziyeke mezin çêdibe, Lê gava xerab tên ser kar, mirov xwe vedişêrin.

¹³ Kesê neheqiyên xwe vedişêre, bi ser nakeve, Lê kesê li wan mikur tê û dev ji wan berdide, wê rehmê bibîne.

¹⁴ Xwezî bi wî kesî ku herdem ji Xwedê ditirse, Lê kesê serhişk, dikeve belayê.

¹⁵ Serwerê xerab ê li ser belengazan, Wekî şêrê dike himîn û hirçê êrîşkar e.

¹⁶ Serwerê ne fêmdar e, gelekî xedar e, Lê kesê ji qezenca neheq nefret dike, emirdirêj e.

¹⁷ Mirovê xwîna yekî ketiye stûyê wî, Wê heta gorê bireve. Bila tu kes pişta wî negire.

¹⁸ Kesê di riya kamil de dimeşe, wê rizgar bibe, Lê kesê dide ser riya xwar, wê yekser bikeve.

¹⁹ Kesê axa xwe dajo, bi nên têr dibe, Kesê dide pey tiştên vala, bi feqîriyê têr dibe.

²⁰ Bereketa kesê dilsoz gelek e, Lê kesê ji bo serwetê dilezîne, bêceza namîne.

²¹ Ferq û meylî ne baş e, Çimkî ji bo pariyek nên, mirov gunehan dike.

²² Mirovê çikûs li pey serwetê dibeze, Lê nizane xizanî bi ser wî de tê.

²³ Kesê erzê yekî dişikêne, Ji kesê zimanê wî şelafiyan dike, zêdetir keremê dibîne.

²⁴ Kesê diziya dê û bavê xwe bike û bêje: “Ev ne guneh e,” Ew hevalê xerabkaran e.

²⁵ Çavbirçî pevçûnê dertîne, Lê kesê bi Xudan ewle ye wê bigihîje firehiyê.

²⁶ Kesê bi xwe ewle ye bêaqil e, Lê kesê dide ser riya şehrezayiyê rizgar dibe.

²⁷ Kesê bide feqîran xizaniyê nabîne, Lê naleta zêde li ser wî kesî ye ku çavê xwe ji feqîran dizivirîne.

²⁸ Gava xerab rabin, mirov xwe vedişêrin, Lê gava ew tune dibin, kesên rast zêde dibin.