Lêwiyî 6 - Kurmanji Încîl

¹ Xudan ji Mûsa re got:

² “Heke kesek bi vî awayî guneh û nedilsoziyê li dijî Xudan bike; di tiştekî ku lê hatiye emanetkirin, tiştekî ku danîne ba wî, yan di tiştekî ku hatiye dizîn de cîranê xwe bixapîne yan jî neheqiyê bike

³ yan tiştekî windabûyî bibîne û derewan bike, bi derewan sond bixwe, ango ji van sûcên ku mirov dikin yekî bike,

⁴ wî çaxî wî guneh kiriye û ew sûcdar e. Wê ya ku diziye yan bi neheqî bi dest xistiye, ya ku lê hatiye emanetkirin an tiştê windabûyî yê ku dîtiye

⁵ yan tiştê ku bi derewan li ser sond xwariye, ji pêncan yekî jî deyne ser û roja ku pêşkêşiya berdêlê tîne, bi şûn de bide xweyê wî.

⁶ Wê ji bo Xudan, wekî pêşkêşiya berdêlê beranekî bêqisûr ê ku hêja ye bîne û bide kahin.

⁷ Wê kahin ji bo wî li hizûra Xudan kefaretê bide û wê ew kes ji ber çi sûc kiribe, wê bê bexişandin.”

Rê û rêbazên pêşkêşiyan a) Qurbana Şewitandinê

⁸ Xudan ji Mûsa re got:

⁹ “Li Harûn û kurên wî emir bike û bêje: ‘Rê û rêbaza qurbana şewitandinê ev e: Wê qurbana şewitandinê tevahiya şevê, heta serê sibê li ser agirê gorîgehê bimîne. Wê agirê li ser gorîgehê netefe.

¹⁰ Wê kahin derpî û kincên xwe yên kitan li xwe bike. Wê xweliya ku ji ber qurbana şewitandinê li ser gorîgehê maye bide hev û deyne ber gorîgehê.

¹¹ Wê kincên ser xwe biguhere û xweliyê bibe dereke paqij ya li derveyî artêşgehê.

¹² Wê agirê ser gorîgehê pêketî bimîne û netefe. Wê kahin her sibe êzingan bavêje ser êgir, qurbana şewitandinê bavêje ser hev û li ser wê jî bezê perçeyên pêşkêşiyên aştiyê bişewitîne.

¹³ Wê agirê ser gorîgehê herdem pêketî bimîne, qet netefe.

b) Pêşkêşiya Dexlê

¹⁴ “‘Rê û rêbaza pêşkêşiya dexlê ev e: Wê kurên Harûn li ber gorîgehê, li hizûra Xudan pêşkêş bikin.

¹⁵ Wê kahin ji pêşkêşiya dexlê kulmeke arvanê hûr û zeytê, tevî guniya li ser wê hilîne û bi awayê bêhna ku bi Xudan xweş tê vê para diyarkirî li ser gorîgehê bişewitîne.

¹⁶ Ya ji ber mayî wê Harûn û kurên wî bixwin. Wekî nanê şikeva, wê li dereke pîroz, li hewşa Konê Hevdîtinê bixwin.

¹⁷ Divê ew bi hevîrtirş neyê pehtin. Min ev ji pêşkêşiyên min ên şewitandinê wekî para kahinan da. Wekî pêşkêşiya paqijiyê û pêşkêşiya berdêlê ev jî gelekî pîroz e.

¹⁸ Wê her zilamê ziriyeta Harûn jê bixwe. Ev di nav nifşên we de, wê ji pêşkêşiyên şewitandinê bibe para wan a herheyî. Her kesê li pêşkêşiyan bikeve, divê pîroz bibe.’”

¹⁹ Xudan ji Mûsa re got:

²⁰ “Pêşkêşiya ku wê di roja ku kahin bê kifşkirin de Harûn û kurên wî pêşkêş bikin ev e: Dehyeka efaya arvanê hûr, nîvî serê sibê, nîvî jî êvarê bê pêşkêşkirin.

²¹ Wê pêşkêşî bi zeytê bê hevîrkirin û li ser sêlê bê pehtin. Wê pêşkêşiya dexlê bînin û wekî pariyên pehtî pêşkêş bikin ku bêhna wan bi Xudan xweş tê.

²² Wê kahinê kifşkirî yê ku ji ziriyeta Harûn e, pêşkêşî Xudan bike. Ev qanûna herheyî ya Xudan e. Wê bi tevahî bê şewitandin.

²³ Wê hemû pêşkêşiyên dexlê yên kahinan bi tevahî bên şewitandin, wê jê neyê xwarin.”

c) Pêşkêşiya Paqijiyê

²⁴ Xudan ji Mûsa re got:

²⁵ “Ji Harûn û kurên wî re bêje: ‘Rê û rêbaza pêşkêşiya paqijiyê ev e: Wê pêşkêşiya paqijiyê li dera ku qurbanên şewitandinê tên serjêkirin, li hizûra Xudan bê serjêkirin. Ew gelekî pîroz e.

²⁶ Kahinê ku pêşkêşiya paqijiyê pêşkêş dike, wê li dereke pîroz, li hewşa Konê Hevdîtinê jê bixwe.

²⁷ Her kesê li goştê wê bikeve, divê pîroz bibe. Heke xwîna wê bipeşke ser kincê yekî, divê kinc li dereke pîroz bê şûştin.

²⁸ Dîzika ku goşt tê de hatiye kelandin, divê bê şikandin. Heke di tiştekî tûnc de hatibe pehtin, divê baş bê celandin û bi avê bê şûştin.

²⁹ Her zilamê ji ziriyeta kahinan e, dikare jê bixwe. Ev gelekî pîroz e.

³⁰ Lê ji pêşkêşiya paqijiyê ya ku xwîna wê tînin Konê Hevdîtinê û bi kefaret tê dayîn, nayê xwarin. Wê bê şewitandin.