Helbesta Helbestan 1 - Kurmanji Încîl

¹ Helbesta herî xweş a Silêman e.

Keçik

² Bila ew min bi ramûsanên devê xwe maç bike. Hezkirina te ji şerabê çêtir e.

³ Bêhna miskên te çi xweş in, Navê te wekî miska rijiyayî ye. Loma keçik ji te hez dikin.

⁴ Bi destê min bigire, birevîne! Bila padîşah min bibe odeyên xwe. Emê bi te re şa û kêfxweş bibin. Emê ji şerabê zêdetir, Hezkirina te bi bîr bînin. Heqê wan heye ji te hez bikin.

Hevalên keçikê Keçik

⁵ Ez reşik im, lê xweşik im. Ya keçên Orşelîmê, Mîna konên Qêdarê, Mîna perdeyên konê Silêman im.

⁶ Li reşikbûna min nenêrin, Tavê ez şewitandim. Hêrs bûn ji min kurên diya min, Wan ez kirim nobedarê rezan, Lê min bala xwe neda rezê xwe.

⁷ De ka ji min re bêje evîndarê min, Tu pezê xwe li ku derê diçêrînî? Nîvro li ku mexel tînî? Çima li ba keriyên hevalên te Bibim jineke rûyê xwe dinixême?

Hevalên Keçikê

⁸ Ya delala nav jinan, Heke tu nizanî, Bide pey şopa pêz Li ber konên şivanan, Karikên xwe biçêrîne.

Lawik

⁹ Ez te dişibînim mehîna erebeyên Firewn, yara min.

¹⁰ Dêmên te bi xemlan, Stûyê te bi gerdeniyan çiqas xweşik e.

¹¹ Emê ji te re xemlên zêrîn çêkin, Bi pariyên zîvîn.

Keçik

¹² Gava padîşah li ser sifrê bû, Bêhna xweş a rûnê min ê simbilî fûriya.

¹³ Evîndarê min, kîsikê mûrê Ku di sing û berê min de veşartiye.

¹⁴ Evîndarê min, wekî qevdek kulîlka hinê ye, Li nav rezên Eyn-Gedî.

Lawik

¹⁵ Ax tu çiqas delal î, yara min! Ax tu çiqas delal î. Çavên te mîna kevokan in.

Keçik

¹⁶ Tu çiqas lihevhatî yî, yarê min! Çiqas şîrîn î. Mêrga kesk ji bo me nivîn e.

Lawik

¹⁷ Kêranên mala me ji darên sedrê ne, Textên banê me ji darên biyê ne.