Hejmartin 9 - Kurmanji Încîl

Cejna Derbasbûnê

¹ Di meha pêşî ya sala diduyan a derketina ji welatê Misrê de, Xudan li Beriya Sînayê ji Mûsa re got:

² “Bila gelê Îsraêl di dema kifşkirî de Cejna Derbasbûnê pîroz bike.

³ Hûnê di dema kifşkirî, di çardehê vê mehê de, ber êvarê vê bikin. Hûnê li gorî hemû qanûn û rêbazên wê, Cejna Derbasbûnê pîroz bikin.”

⁴ Mûsa li gelê Îsraêl emir kir ku Cejna Derbasbûnê pîroz bikin.

⁵ Îcar wan li Beriya Sînayê, di çardehê meha pêşî de, ber êvarê Cejna Derbasbûnê pîroz kir. Gelê Îsraêl her tiştî bi awayê ku Xudan li Mûsa emir kiriye pêk anî.

⁶ Lê hinek kes hebûn ku dest dabûn miriyan û qirêj bûbûn. Wan wê rojê nikaribûn Cejna Derbasbûnê pîroz bikin. Wê rojê hatin ba Mûsa û Harûn.

⁷ Wan ji Mûsa re got: “Ji ber ku me dest daye miriyan, em qirêj bûne. Lê çima destûr tuneye ku em di dema kifşkirî de bi Îsraêliyên din re ji Xudan re pêşkêş bikin?”

⁸ Mûsa ji wan re got: “Ka bisekinin, ez bibihîzim Xudan ji bo we çi emir kiriye.”

⁹ Xudan ji Mûsa re got:

¹⁰ “Ji gelê Îsraêl re bêje: ‘Yekî ji we yan jî yekî ji ziriyeta we ji ber ku dest dabe miriyan û qirêj bûbe yan li rêwîtiyeke dûr be, dîsa dikare Cejna Derbasbûnê ya Xudan pîroz bike.

¹¹ Wê di çardehê meha diduyan de ber êvarê wê bike. Wê bi nanê şikeva û bi giyayên tehl re bixwe.

¹² Wê ew heta serê sibê ji xwarinê tiştekî nehêlin û hestiyekî wê neşikênin. Wê Cejna Derbasbûnê li gorî hemû rê û rêbazên wê pîroz bikin.

¹³ Lê yekî ku paqij e û ne li rêwîtiyê ye û Cejna Derbasbûnê pîroz neke, wê ji nav gelê xwe bê avêtin. Madem wî di dema kifşkirî de pêşkêşî Xudan nekiriye, wê cezayê gunehê xwe bikişîne.

¹⁴ “‘Heke xerîbek di nav we de bimîne û bixwaze ji Xudan re Cejna Derbasbûnê pîroz bike, wê li gorî qanûn û rêbazên wê, bike. Wê ji bo we, qanûneke welatiyan û xerîban hebe.’”

Ewrê li ser Konê Hevdîtinê

¹⁵ Roja ku mesken hat danîn, ewran meskên ango Konê Şahidiyê nixamt. Ji êvarê heta serê sibê di şiklê êgir de li ser meskên sekinî.

¹⁶ Ev hergav wiha bû. Ewr mesken dinixamt û bi şev şiklê êgir hebû.

¹⁷ Gava ewr ji ser kon radibû, gelê Îsraêl koç dikir. Ewr li ku derê bisekiniya, Îsraêliyan li wê derê kon vedida.

¹⁸ Li gorî fermana devê Xudan, gelê Îsraêl koç dikir û li ser fermana devê Xudan kon vedida. Di hemû rojên ku ewr li ser meskên dima de, ji cihê xwe ranedibûn.

¹⁹ Gava ewr demeke dirêj li ser meskên dima, gelê Îsraêl fermana Xudan pêk dianî û bi rê nediketin.

²⁰ Carna ewr ji bo çend rojan li ser meskên dima. Wî çaxî li ser fermana devê Xudan li cihê xwe diman û li ser fermana devê Xudan jî wan koç dikir.

²¹ Carna ewr ji êvarê heta serê sibê dima û gava serê sibê radibû, wan koç dikir. Bi şev an bi roj, gava ewr ji ser kon rabûya wan koç dikir.

²² Dixwazî du roj, dixwazî mehek an demeke dirêj, heta ewr li ser meskên dima, Îsraêlî li cihê xwe diman û bi rê nediketin. Lê gava ewr radibû wan koç dikir.

²³ Wan li ser fermana devê Xudan kon vedida û li ser fermana devê Xudan koç dikir. Bi vî awayî wan fermana Xudan ku bi riya Mûsa hat dayîn, pêk anî.