Hejmartin 30 - Kurmanji Încîl

Rê û rêbazên li ser sozdanê

¹ Mûsa ji serekên eşîrên Îsraêl re got: “Ya ku Xudan emir kir, ev e:

² ‘Heke kesek ji Xudan re soz bide yan sond bixwe û xwe bi vî awayî bixe bin barekî, divê ew gotina xwe xera neke û li gorî her tiştê ku ji devê wî derketiye bike.

³ “‘Heke jineke ciwan a ku hê li mala bavê xwe ye, ji Xudan re soz bide û xwe bixe bin barekî,

⁴ bavê wê jî bibihîze ku wê soz daye û xwe xistiye bin barekî û herwiha bêdeng bimîne, wê soza ku jinikê daye û barê ku xwe xistiye binî li ser wê bimîne.

⁵ Lê heke bavê wê roja ku ev yek bihîst li dij derkeve, wê soza ku keçikê daye û barê ku xwe xistiye binî betal bibe. Wê Xudan keçikê bibexişîne, çimkî bavê wê li dij derketiye.

⁶ “‘Heke keçika ku soz da yan jî bêyî ku bifikire xwe bixe bin barekî û bizewice,

⁷ mêrê wê vê yekê bibihîze û roja ku bihîstiye bêdeng bimîne, ew soz û barê ku keçikê xwe xistiye binî wê li ser wê bimîne.

⁸ Lê heke mêrê wê bibihîze û li dij derkeve, wê soza li ser wê û gotina bêyî ku bifikire gotiye û bi vî awayî xwe xistiye bin bar betal bibe. Wê Xudan keçikê bibexişîne.

⁹ “‘Lê wê soza ku jinebî yan jina ku ji mêrê xwe qetiyaye soz daye yan barê ku xwe xistiye binî li ser wê bimîne.

¹⁰ “‘Heke jinek li mala mêrê xwe soz dabe û sond xwaribe û xwe xistibe bin barekî,

¹¹ mêrê wê jî bibihîze, bêdeng bimîne û li dij dernekeve, wê hemû sozên wê û barên ku xwe xistiye binî li ser wê bimînin.

¹² Lê gava mêrê wê vê yekê bibihîze, ew bi tevahî betal bike, wê tevahiya soza ku ji devê wê derketiye û barên ku wê xwe xistiye binî betal bibin. Mêrê wê ew betal kirine û wê Xudan wê bibexişîne.

¹³ Mêrê jinikê, her soz û barê ku jina wî, ji bo dev ji nefsa xwe berde, bi sond xwe xistiye binî, dikare qebûl bike yan jî betal bike.

¹⁴ Lê heke mêrê wê di wê rojê de li ber vê yekê bêdeng bimîne, ew hemû sozên wê û barên ku wê xwe xistiye binî li ser wê bimînin. Çimkî ew di roja ku bihîstiye de li dij derneketiye.

¹⁵ Lê heke mêrê wê tiştên ku bihîstine, piştî demekê betal bike, wê sûcê jinikê bikeve stûyê wî.’”

¹⁶ Qanûnên Xudan li ser jin û mêrê wê û li ser bav û keça wî gava ew ciwan û li mala bavê xwe ye li Mûsa emir kirine, ev in.