Hejmartin 17 - Kurmanji Încîl

Gopalê Harûnê Kahin

¹ Xudan ji Mûsa re got:

² “Ji gelê Îsraêl re bêje, bila ji bo her serekê eşîrekê gopalekî hebe, ji bo duwanzdeh eşîran, duwanzdeh gopal bînin. Navê her serekî li ser gopalê wî binivîse.

³ Tê li ser gopalê eşîra Lêwî navê Harûn binivîsî. Wê ji bo serekê her eşîrekê gopalek hebe.

⁴ Tê wan di Konê Hevdîtinê yê ku ez bi we re dicivim de deynî ber Sindoqa Şahidiyê.

⁵ Wê gopalê zilamê ku ezê hilbijêrim şax bide. Wî çaxî ezê dawî li gazinên gelê Îsraêl bînim ku hergav li we dikin.”

⁶ Mûsa bi gelê Îsraêl re peyivî û serekên wan ji bo her eşîrekê gopalekî dan Mûsa. Wan bi awayê ku ji her serekekî re yek bikeve, duwanzdeh gopal danê. Gopalê Harûn jî di nav wan de bû.

⁷ Mûsa gopal li konê ku Sindoqa Şahidiyê lê ye danîn hizûra Xudan.

⁸ Dotira rojê Mûsa çû Konê Peymanê. Dît ku gopalê Harûnê ku Mala Lêwiyiyan temsîl dike, şax vedaye, kulîlk vekiriye û behîv şîn bûne.

⁹ Mûsa hemû gopal ji hizûra Xudan hildan û nîşanî gelê Îsraêl da. Wan lê nêrî û her kesî gopalê xwe hilda.

¹⁰ Xudan ji Mûsa re got: “Ji bo li dijî kesên serî hildidin bibe nîşanek, tu gopalê Harûn hilde û deyne ber Sindoqa Şahidiyê. Wê ev bibe dawiya gazina wan a li dijî min ku ew nemirin.”

¹¹ Mûsa wiha kir. Çawa ku Xudan lê emir kir, wî wiha kir.

¹² Gelê Îsraêl ji Mûsa re got: “Va ye, em tune dibin! Em dimirin! Emê hemû tune bibin!

¹³ Her kesê nêzîkî Meskenê Xudan dibe, tune dibe. Ma emê hemû bimirin?”