Eyûb 42 - Kurmanji Încîl

Eyûbê Pêxember tobe dike

¹ Eyûb bersiva Xudan da û got:

² “Ez dizanim tu dikarî her tiştî bikî Û tu armanceke te nayê astengkirin.

³ Te got: ‘Ev zilam kî ye ku şêwrê bi nezanî reş dike?’ Rast e, min gotinên ku min jê fêm nedikirin gotin, Tiştên ku ji min zêde ne û min nizanibû.

⁴ “Te got: ‘Niha guhdar be, ez bêjim. Ez ji te bipirsim, tu bi min bide zanîn!’

⁵ Min li ser te bi guhan bihîstibû, Lê niha ez bi çavê xwe te dibînim.

⁶ Loma ez xwe kêm dibînim Û di nav toz û xweliyê de tobe dikim.”

Biryara Xudan

⁷ Piştî ku wî ji Eyûb re wiha got, Xudan ji Êlîfazê Têmanî re got: “Hêrsa min li dijî te û herdu hevalên te ye. Çimkî we wekî Eyûb nekir û li ser min ya rast negot.

⁸ Niha ji bo xwe heft conega û heft beranan bibin û herin ba Eyûbê xulamê min û ji bo xwe qurbana şewitandinê pêşkêş bikin. Bila Eyûbê xulamê min ji bo we dua bike. Ezê duaya wî qebûl bikim û bergîdana ehmeqiya we nedim. Çimkî we wekî Eyûb nekir û li ser min a rast negot.”

⁹ Êlîfazê Têmanî, Bîldadê Şûahî û Sofarê Naemayî çûn û bi ya Xudan kir. Xudan duaya Eyûb qebûl kir.

Xwedê Eyûbê Pêxember vedigerîne firehiya berê

¹⁰ Gava Eyûb ji bo hevalên xwe dua kir, Xudan Eyûb vegerand firehiya berê. Xudan du qatî hebûna wî ya berê da Eyûb.

¹¹ Hemû xwişk, bira û nasên wî yên berê hatin ba wî. Li mala wî, wan pê re xwarin xwar. Wan êşa wî parve kir û ji ber hemû belayên ku Xudan anîn serê wî, ew teselî kir. Her yekî perçeyek zîv û gustîleke zêrîn dan wî.

¹² Xudan Eyûb ji destpêkê bêtir bereket kir. Çardeh hezar pezên wî, şeş hezar deveyên wî, hezar cot gayên wî û hezar kerên wî çêbûn.

¹³ Heft kur û sê keçên wî çêbûn.

¹⁴ Wî navê keça xwe ya pêşî Yemîma, ya diduyan Qesiya û ya sisêyan Qeren-Happûk danî.

¹⁵ Li tevahiya welêt delalên wekî keçên Eyûb tunebûn. Bavê wan, tevî birayên wan, mîras da wan jî.

¹⁶ Paşê Eyûb sed û çil salan jiya û wî çar nifş ji kur û neviyên xwe dîtin.

¹⁷ Eyûb kal bû û ji jiyanê têrbûyî mir.