Eyûb 38 - Kurmanji Încîl

Bersiva Xwedê

¹ Xudan ji nav bagerê bersiva Eyûb da û got:

² “Ev zilam kî ye Ku bi peyvên nezanî şêwrê reş dike?!

³ Niha wekî mêrekî piştênka xwe girê bide! Ez ji te bipirsim, tu bi min bide zanîn!

⁴ “Gava min bingeha dinyayê datanî, Tu li ku derê bûyî? Heke fêmdariya te hebe, ka bêje!

⁵ Madem tu dizanî, kê pîvanên wê danîn? An kê benê pîvanê kişand ser?

⁶ Binikên wê li ser çi hatin danîn? An kevirê wê yê rikin kê bicih kir?

⁷ Di wê demê de stêrên sibê bi hev re lavij gotin Û hemû hebûnên ezmanî bi şahî qîriyan.

⁸ “Dema derya ji zikê diya xwe jinişkave hat der Kê deryayê bi deriyan girt?

⁹ Gava min ewr jê re kirin cil Û taristana kûr jê re kir pêçek,

¹⁰ Çaxê min sînorên wê danîn Û derî û zirzeyên wê bicih kirin

¹¹ Û got: ‘Tê heta vir werî û derbas nekî. Wê pêlên te yên qure li vir bisekinin.’

¹² “Ma te di jiyana xwe de emir li sibehê kir? Te cihê şeveqê hînî wê kir

¹³ Ku her aliyê dinyayê bigire Û xerab jê bên daweşandin û avêtin?

¹⁴ Şiklê wê diguhere û wekî gila li bin morê, Êdî her tişt baş tê dîtin.

¹⁵ Ronahiya xeraban ji wan tê texsîrkirin Û zendê rakirî tê şikandin.

¹⁶ “Ma tu gihîştî heta ber kaniyên deryayê? Yan tu di avên kûr de geriyayî?

¹⁷ Dergehên mirinê li ber çavê te xuya bûn? Te dergehên siya mirinê dîtin?

¹⁸ Ma te fêm kir dinya çiqas mezin e? Heke tu hemûyan dizanî, ka bêje!

¹⁹ “Riya warê ronahiyê li ku ye Û ka cihê tariyê?

²⁰ Ma tu dikarî yeka ji wan bibî sînorê wê Û riya mala wê fêm bikî?

²¹ Bêguman tu dizanî! Çimkî tu wê gavê hatî dinyayê! Emrê te ewqas dirêj e!

²² “Ma tu ketî embarên berfê Yan te embarên zîpikê dîtin

²³ Ku ez ji bo dema tengasiyê, Ji bo roja şer û pevçûnê diparêzim?

²⁴ Ma riya dera ku ronahî tê parvekirin li ku ye? Ka cihê ku bayê rojhilat li ser rûyê erdê belav dibe?

²⁵ Ma kî ji bo lehiya baranê co Û ji bo brûskê rê kola

²⁶ Ku li ser dera bêmirov, Li ser beriya kes lê tuneye baranê bibarîne,

²⁷ Dera wêran û helakbûyî têr bike Û giyayê teze derîne?

²⁸ Gelo bavê baranê heye? Kê dilopên xunavê birin dinyayê?

²⁹ Cemed ji zîkê kê derket? Kê xusika ezmanan bir dinyayê?

³⁰ Av wekî kevir hişk dibin Û rûyê avên kûr diqerise.

³¹ “Gelo tu dikarî Komstêra Perwînê girê bidî Û benên Oriyonê vekî?

³² Ma tu dikarî komstêran ji demsalan derînî Û rêberiya Hirça Mezin û zarokên wê bikî?

³³ Gelo tu bi qanûnên ezmanan dizanî? Tu dikarî serweriya wan li ser rûyê erdê ava bikî?

³⁴ “Gelo tu dikarî dengê xwe bigihînî ewran Ku lehiyên avê te binixêmin?

³⁵ Ma tu dikarî brûskan rakî Ku bên û ji te re bêjin: ‘Em li vir in.’

³⁶ Kê şehrezayî xist dilan? An kê fêmdarî xist aqilan?

³⁷ Kî ewqas şehreza ye ku ewran bijmêre? Kî dikare meşkên ezmanan vala bike,

³⁸ Gava ax hişk dibe Û terkên wê bi hev ve dizeliqin.

³⁹ “Ma tu dikarî ji bo şêremê nêçîrê bikî Û zikê şêrên ciwan têr bikî

⁴⁰ Ku xwe di şikeftên xwe de ditepisînin Û di nav deviyan de dikevin kozikê.

⁴¹ Gava têjikên qijakê ji Xwedê re dikin hewar Û ji birçîbûnê virde wêde digerin, Kî nêçîrê jê re amade dike?