Eyûb 28 - Kurmanji Încîl

Helbesta li ser lêgerîna şehrezayiyê

¹ Bi rastî zîv li kana madenê, Cihê safîkirina zêr jî heye.

² Hesin ji axê tê derxistin, Sifir ji kevir tê helandin.

³ Mirov dawî li tariyê tînin Û di taristan û şevereşê de Heta sînorê dawî li van keviran dikolin.

⁴ Dûrî dera kes lê dijî, ew kanan dikolin, Li dera lingê mirov jî, ji bîr kiriye, Ji her kesî dûr xwe davêje werîs û dihejîne.

⁵ Nan ji erdê dertê, Lê binê erdê bi êgir serobino dibe.

⁶ Di kevirên wê de lapîs, Tê de toza zêr jî heye.

⁷ Teyrê dirinde wê riyê nizane, Çavên teyrê baz nedîtiye.

⁸ Heywanên qure pê li wê derê nekiriye, Şêrek di wir re derbas nebûye.

⁹ Ew destê xwe dirêjî kevirê heste dike, Çiyayan ji kokê ve serobino dike.

¹⁰ Di nav zinaran re coyan vedike, Çavê wî her tiştê hêja dibîne.

¹¹ Ji bo ku av neherike, çeman girê dide Û ya tarî dertîne ronahiyê.

¹² Lê şehrezayî li ku derê dikare bê dîtin? Cihê fêmdariyê li ku ye?

¹³ Mirov qîmeta wê nizane Û ew li diyarê zindiyan nayê dîtin.

¹⁴ Ava kûr dibêje: “Ew ne di min de ye.” Derya dibêje: “Ne li ba min e.”

¹⁵ Berdêla wê bi zêrê xas nayê dayîn, Bihayê wê bi zîv nayê kişandin.

¹⁶ Bihayê wê bi zêrê Ofîrê, Bi onîksê hêja û lapîsê nayê pîvandin.

¹⁷ Ne zêr, ne jî cam wekî wê ye, Ew bi taximên zêrê xas jî nayê guhertin.

¹⁸ Li ba wê behsa mircan û krîstalê nabe, Bihayê şehrezayiyê di ser cewheran re ye.

¹⁹ Topazê Kûşê nabe wekî wê Bihayê wê bi zêrê xas nayê pîvan.

²⁰ Şehrezayî ji ku derê tê? Cihê fêmdariyê li ku der e?

²¹ Ew ji çavê hemû jîndaran Û ji teyrên ezmanan hatiye veşartin.

²² Warê helakê û diyarê miriyan dibêjin: “Me xebera wê bi guhê xwe bihîst.”

²³ Xwedê riya wê fêm dike, Ew bi cihê wê dizane.

²⁴ Çimkî ew heta binê dinyayê dinêre Û her tiştên di bin seranserê ezmên de dibîne.

²⁵ Gava wî hêz da bayê Û bi pîvekê av pîva,

²⁶ Çaxê wî ji baranê re qanûn çêkir Û riya brûskên ezmanan danî,

²⁷ Wî çaxî şehrezayî dît û eşkere kir, Wî ew ava kir û lê kola.

²⁸ Wî ji mirov re got: “Va ye, tirsa Reb! Ev e şehrezayî! Fêmdarî jî, xwedûrxistina ji xerabiyê ye.”