Eyûb 24 - Kurmanji Încîl

¹ “Çima Karîndar ji bo dîwanê deman kifş nake? Ji bo çi kesên wî nas dikin rojên wî nabînin?

² Xwedênenas kevirên sînoran ji cihê wan radikin Û keriyan didizin û diçêrînin.

³ Ew kerê sêwiyan diqewitînin Û gayê jinebiyê gerew digirin.

⁴ Ew hejaran ji rê averê dikin, Tevahiya bindestên welêt tev xwe vedişêrin.

⁵ Va ye, wekî kerên çolê ew diçin kar Û ji bo nêçîr û xwarina zarokên xwe, li beriyê digerin.

⁶ Ew êmê xwe li zeviyê didin hev, Efareya rezê kesekî xerab kom dikin.

⁷ Ew şeva xwe tazî û bêkinc derbas dikin, Di sermayê de lihêfa wan tuneye.

⁸ Bi taviya barana çiyê şil dibin, Ji ber tunebûna sitarê xwe dispêrin zinaran.

⁹ Kesê sêwî ji pêsîrê dikin Û zarokê bindest gerew digirin.

¹⁰ Ew tazî û bêkinc digerin, Birçî ne lê gurzan hildigirin.

¹¹ Ew di nav latikên wan de zeytûnan diperçiqînin, Li mehseran tirî diguvêşin lê tî ne.

¹² Nalîna mirovan ji bajêr tê, Canê birîndaran dike hewar. Lê Xwedê li vê neheqiyê nanêre.

¹³ “Ev kes serî li dijî ronahiyê radikin. Ew bi riyên wê nizanin Û li ser rêçikên wê naçin.

¹⁴ Kujer bi ronahiyê re radibe. Ew bindest û hejaran dikuje, Bi şev ew wekî dizan e.

¹⁵ Zinakar jî li benda avabûna rojê ye. Ew dibêje: ‘Kes min nabîne’ Û rûyê xwe dinixême.

¹⁶ Di tariyê de dîwarên xaniyan qul dikin. Bi roj xwe vedişêrin, Ew nizanin ronahî çi ye.

¹⁷ Li gorî wan taristan ronahiya sibê ye, Ew hevalên sawa taristanê ne.

¹⁸ “Hûn dibêjin: ‘Ew li ser avê bi lez winda dibin. Para wan a welêt nalet e, Tu kes berê xwe nade riya rezan.

¹⁹ Çawa ku ziwahî û germahî ava berfê dibe, Diyarê miriyan jî gunehkaran hiltîne.

²⁰ Zikê dayikên wan jî wan ji bîr dike, Ew ji kurman re şîrîn dibin. Êdî neyên bibîranîn, Neheqî wekî daran tên birîn.

²¹ Ew zirarê didin jina kordunde ku zarokê wê tuneye Û qenciyê bi jinebiyê nakin.

²² Lê Xwedê zordaran bi hêza xwe dibe, Gava radibin ser piyan, wê ne ewle bin.

²³ Gava ew ewlehiyê dide wan, ew tên piştgirîkirin, Çavê wî li ser riyên wan e.

²⁴ Ew ji bo demeke kurt bilind dibin, Piştre tune dibin. Wekî hemû kesên din, wê bikevin û biçilmisin. Wekî serikê simbilan tên jêkirin.’

²⁵ “Heke ne wiha ye, Kî dikare min derewkar derîne Yan nîşan bide ku gotinên min vala ne?”