Eyûb 22 - Kurmanji Încîl

Êlîfazê Têmanî

¹ Êlîfazê Têmanî lê vegerand û got:

² “Gelo mirov dikare ji Xwedê re bifeyde be? Feydeya kesê biaqil jî jê re heye?

³ Heke tu rast bî, gelo wê dilê Karîndar xweş be? Riya te kamil jî be, ma jê re qezenc e?

⁴ Gelo ji ber xwedêtirsiya te, Ew erzê te dişikêne û li dijî te dozê vedike?

⁵ Xerabiya te mezin e Û dawiya gunehên te tuneye ne wisa?

⁶ Çimkî te bêsedem ji birayên xwe gerew stand, Gava ew tazî ne, te cilên wan standin.

⁷ Te av bi kesê westiyayî neda vexwarin, Te nan ji kesê birçî texsîr kir.

⁸ Welat ê mirovê hêzdar e Û zilamê mezin li ser rûdine.

⁹ Te jinebî destvala şandin Û zendên sêwiyan şikandin.

¹⁰ Loma li her dera te dafik hene Û sawa yekser tê, te ditirsîne,

¹¹ Yan jî taristan te ditirsîne ku tu nabînî. Ava lehiyan te dinixême.

¹² “Ma Xwedê ne li bilindahiya ezmanan e? Li stêrên herî bilind binêre, ew çiqas bilind in!

¹³ Tu dibêjî: ‘Xwedê çi dizane? Gelo dikare di nav tariya kûr de dîwanê bike?

¹⁴ Ewrên tarî wî dorpêç dikin û ew nabîne, Li ser qûbeya ezmanan digere.’

¹⁵ Gelo tê di riya kevin de bimeşî Ku xerabkar da serî?

¹⁶ Beriya dema wan hat, ew hatin rakirin, Lehiyê bingeha wan bir.

¹⁷ Wan ji Xwedê re got: ‘Ji me dûr be! Gelo Yê Karîndar wê çi bi me bike?’

¹⁸ Lê Yê ku malên wan bi tiştên baş tije kir, ew e. Loma şêwra xeraban ji min dûr e.

¹⁹ “Kesên rast vê yekê dibînin û şa dibin, Kesên bêsûc tinazên xwe bi xeraban dikin,

²⁰ Dibêjin: ‘Bêguman kesên li dijî me tune bûn Û êgir ya ji ber wan mayî daqurtand.’

²¹ “Niha tu bi Xwedê re li hev were û bigihîje aştiyê, Wê bi vî awayî qencî bigihîje te.

²² Niha hînkirina devê wî qebûl bike, Gotina wî bixe dilê xwe.

²³ Heke tu berê xwe bidî Karîndar, tê bêyî avakirin. Heke tu neheqiyê ji konên xwe rakî,

²⁴ Heke tu zêrê xwe wekî axê bibînî Û zêrê xwe yê Ofîrê bavêjî nav xîçikê newalan,

²⁵ Heke Karîndar bibe zêrê te Û ew bibe zîvê te yê hêja,

²⁶ Wê gavê tê ji Karîndar zewqê bistînî Û rûyê xwe ber bi Xwedê ve bilind bikî.

²⁷ Tê jê re duayê bikî Û wê guh bide te. Tê sozên xwe pêk bînî.

²⁸ Tê biryara tiştekî bidî û wê pêk bê, Ronahî jî li ser riyên te be.

²⁹ “Gava mirovan tu nizim kirî, Tu dibêjî: ‘Ev quretî ye!’ Lê Xwedê rizgarkarê nefsbiçûkan e.

³⁰ Ew kesê sûcdar jî rizgar dike, Sûcdar ji ber paqijiya destê te, rizgar dibe!”