Dubarekirina Şerîetê 8 - Kurmanji Încîl

Xwedê ji bîr nekin

¹ “Hay jê hebin ku hemû emrên îro ez li we dikim pêk bînin. Bi vî awayî hûnê bijîn û zêde bin. Hûnê herin wî welatî ku Xudan sond xwaribû û dabû bav û kalên we û wî ji xwe re bikin milk.

² Wê rêwîtiya dirêj a ku Xwedayê we Xudan çil salan hûn li beriyê gerandî bînin bîra xwe. Wî hûn xistin tengasiyê û ceribandin ku ya di dilê we de heye û ka hûn emrên wî pêk tînin an na, xuya bibe.

³ Wî hûn xistin tengasiyê, birçî hiştin û paşê manya ku ne we û ne jî bav û kalên we pê zanibû bi we da xwarin ku hûn bizanibin mirov tenê bi nên najî, lê bi her gotina ji devê Xudan derdikeve dijî.

⁴ Di van çil salan de ne kincên we kevin bûn û ne jî lingên we werimîn.

⁵ Ji dil bizanibin ku Xwedayê we Xudan wekî bavekî ku kurê xwe terbiye dike, hûn terbiye kirin.

⁶ “Loma di riyên Xwedayê xwe Xudan de bimeşin û jê bitirsin ku hûn emrên wî pêk bînin.

⁷ Çimkî Xwedayê we Xudan we dibe welatekî qenc, welatekî ku geliyên avî, kanî, avên kûr ên wî hene ku diherikin gir û deştan,

⁸ welatekî ku genim, ceh, mêw, darhejîr, hinar, darzeytûn û hingivê wî hene,

⁹ welatekî ku hûn bi zêdehî nên lê bixwin û hewceyî tu tiştî nebin, welatekî ku kevirên wî hesin in û hûn dikarin ji çiyayên wî sifir derxin.

¹⁰ “Hûnê bixwin, têr bibin û ji bo welatê qenc ê ku daye we, ji Xwedayê xwe Xudan re pesindanê bikin.

¹¹ Hay jê hebin ku hûn Xwedayê xwe Xudan ji bîr nekin û van emir, rêbaz û qanûnên ku ez îro li we dikim pêk bînin.

¹² Gava hûn bixwin, têr bin, xaniyên xweş ava bikin û bikevinê,

¹³ gava dewar û pezên we, zêr û zîvê we û her tiştê we zêde bin,

¹⁴ wê gavê qure nebin. Xwedayê xwe Xudan ê ku hûn ji welatê Misrê, ji warê koletiyê deranîn ji bîr nekin.

¹⁵ Xudan hûn li wê beriya mezin û bi xof, li axa tî û bêav meşandin ku bi marên bijehr û dûpişkan tije ye. Wî ji zinarên qewîn ji we re av derxist.

¹⁶ Xwedayê xwe Xudan ji bîr nekin ku li beriyê Mana bav û kalên we nizanibûn bi we da xwarin. Wî hûn xistin tengasiyê û hûn ceribandin ku di dawiyê de ji bo we qenc bibe.

¹⁷ Di dilê xwe de nebêjin: ‘Hêz û qeweta destê min ev mal û milk da hev.’

¹⁸ Xwedayê xwe Xudan bi bîr bînin ku ji bo civandina wî mal û milkî hêz daye we. Wî li gorî wê peymanê kir ku ji bav û kalên we re sond xwaribû û îro jî girêdayî dimîne.

¹⁹ “Heke hûn Xwedayê xwe Xudan ji bîr bikin, bidin pey îlahên din, xulamiya wan bikin û biperizin wan, ez îro bi eşkereyî ji we re dibêjim: Hûnê esse tune bibin.

²⁰ Çawa ku Xudan li ber çavên we miletan tune dike, hûnê jî wisa tune bibin. Çimkî we guh neda dengê Xwedayê xwe Xudan.