Dubarekirina Şerîetê 6 - Kurmanji Încîl

Emrê Herî Mezin

¹ “Emir, qanûn û rêbazên ku Xwedayê we Xudan ji bo hînkirina we li min emir kir ku li welatê hûnê ji xwe re bikin milk pêk bînin, ev in.

² Di tevahiya rojên xwe de hûn, zarok û neviyên we, wê ji Xwedayê xwe Xudan bitirsin û hemû emir û qanûnên wî yên ku min ji we re got pêk bînin ku emrê we dirêj be.

³ Ya gelê Îsraêl, bibihîze! Hay ji xwe hebin ku hûn wan pêk bînin ku qencî bi we bê kirin û çawa ku Xwedayê bavkalên we Xudan soz daye, hûn li welatê şîr û hingiv jê diherike zêde bibin.

⁴ “Bibihîze, ya Îsraêl! Xwedayê me Xudan yek Xudan e.

⁵ Hûnê ji Xwedayê xwe Xudan bi hemû dilê xwe, bi hemû canê xwe û bi hemû hêza xwe hez bikin.

⁶ Ev gotinên ku îro ez li we emir dikim di dilê xwe de hilînin.

⁷ Hûnê wan ji dilê zarokên xwe re dubare bikin, çaxê hûn li mala xwe rûdinin, dimeşin, radizin û radibin, divê hûn li ser wan bipeyivin.

⁸ Wekî nîşanekê wan bi destê xwe ve girê bidin, wekî berenîkekê li ser eniya xwe bixin.

⁹ Wan li ser kêlekên deriyên malên xwe û dergehên bajarên xwe binivîsin.

Hişyarkirina li ser serhişkiyê

¹⁰ “Gava Xwedayê we Xudan hûn anîn welatê ji bav û kalên we Îbrahîm, Îshaq û Aqûb re soz dabû –ew welatê bi bajarên baş û mezin ên ku we ava nekirine,

¹¹ bi xaniyên her cure tişt ku we tije nekirine, bi bîrên kolayî yên ku we nekolane, rez û zeytûnên ku we dananîne– gava hûn li vir bixwin û têr bibin,

¹² hay ji xwe hebin ku hûn Xudan ji bîr nekin ku wî hûn ji welatê Misrê, ji warê koletiyê deranî.

¹³ “Hûnê ji Xwedayê xwe Xudan bitirsin, tenê xulamiya wî bikin û tenê bi navê wî sond bixwin.

¹⁴ Hûnê li pey tu îlahên miletên derdora xwe nekevin.

¹⁵ Çimkî Xwedayê we Xudanê ku di nav we de ye, Xwedayekî xîretkêş e. Bila hêrsa Xwedayê we Xudan li we ranebe û we ji ser rûyê erdê tune neke.

¹⁶ Çawa ku we li Massayê kir, hûnê Xwedayê xwe Xudan neceribînin.

¹⁷ Hay ji xwe hebin ku hûn emir, şîret û qanûnên Xwedayê xwe Xudan pêk bînin ku wî li we emir kirine.

¹⁸ Ya ku di çavê Xudan de rast û qenc e bikin ku qencî bi we bê kirin û hûnê herin wî welatê qenc ê ku Xudan ji bav û kalên we re sond xwaribû, wî bikin milk

¹⁹ û çawa ku Xudan gotibû, hemû dijminên we li ber we biqewitîne.

²⁰ “Sibê, gava zarokên we ji we bipirsin û bibêjin: ‘Wateya şîret, qanûn û rêbazên ku Xwedayê me Xudan li we emir kiriye çi ye?’

²¹ Hûnê ji wan re bêjin: ‘Em li Misrê koleyên Firewn bûn, lê Xudan em bi destê xwe yê hêzdar ji Misrê deranîn.

²² Xudan li ber çavê me li dijî Misrê, Firewn û hemû mala wî nîşan û kerametên mezin û tirsdar kirin.

²³ Wî em ji wir deranîn ku me bîne û bibe welatê ji bav û kalên me re sond xwaribû.

²⁴ Wî ev qanûn li me emir kirin û xwest ku em ji Xwedayê xwe Xudan bitirsin ku qencî her û her bi me bê kirin û wekî îro em sax bimînin.

²⁵ Heke em hay jê hebin û çawa ku li me emir kiriye, em li ber Xwedayê me Xudan van emran pêk bînin, wî çaxî wê ji me re rastî bê hesibandin.’