Dubarekirina Şerîetê 5 - Kurmanji Încîl

Deh Emir

¹ Mûsa gazî tevahiya gelê Îsraêl kir û ji wan re got: “Ya gelê Îsraêl! Guh bidin qanûn û rêbazên ku îro ji we re dibêjim. Hûnê hînê wan bikin. Hay ji van tiştan hebin û pêk bînin.

² Xwedayê me Xudan li Çiyayê Horêvê bi me re peymanekê çêkir.

³ Xudan ev peyman ne bi bav û kalên me re, lê bi me hemûyan re çêkir ku îro li vir sax in.

⁴ Xudan li çiyê ji nav êgir rû bi rû bi we re peyivî.

⁵ Wê gavê ez di navbera we û Xudan de disekinîm ku gotina Xudan ji we re bêjim. Çimkî hûn ji êgir ditirsiyan û hilnedikişiyan çiyê. Xudan wiha got:

⁶ “‘Ez Xwedayê te Xudan im ku tu ji welatê Misrê, ji warê koletiyê deranî.

⁷ “‘Wê ji min pêve tu îlahên te tunebin.

⁸ “‘Tê ji xwe re pûtê tu tiştan çênekî ku dişibe tiştekî li ezmanan, li ser erdê yan jî di avên di bin erdê de ye.

⁹ Tê li ber wan neçî ser çokan û xulamiya wan nekî. Çimkî ez, Xwedayê te Xudan, Xwedayekî xîretkêş im. Ez hesabê sûcên kesên ji min nefret dikin, ji zarokên wan, ji neviyên wan, ji nifşê sisêyan û çaran jî dipirsim.

¹⁰ Lê kesên ji min hez dikin û emrên min pêk tînin, ez bi hezar nifşan ji bo wan dilsoz im.

¹¹ “‘Tê navê Xwedayê xwe Xudan vala neyînî ser zimanê xwe. Çimkî Xudan kesên navê wî vala tînin ser zimanê xwe bêceza nahêle.

¹² “‘Tê Roja Septê pêk bînî û pîroz bihesibînî çawa ku Xwedayê te Xudan li te emir kiriye.

¹³ Tê şeş rojan bixebitî û hemû karên xwe bikî,

¹⁴ lê roja heftan, ji bo Xwedayê te Xudan Sept e. Wê rojê tu, kurê te, keça te, xulamê te, xadima te, gayê te, kerê te, hemû heywanên te yên din û xerîbên di nav te de, hûnê tu karî nekin ku wekî te, xulam û xadimên te jî bêhna xwe vedin.

¹⁵ Tê bi bîr bînî ku tu li welatê Misrê kole bûyî û Xwedayê te Xudan, tu ji wê derê bi destê xwe yê hêzdar û zendê xwe yê dirêjkirî deranî. Xwedayê te Xudan ji ber vê yekê pîrozkirina Roja Septê li te emir kir.

¹⁶ “‘Çawa ku Xwedayê te Xudan li te emir kiriye, qedrê dê û bavê xwe bigire ku emrê te dirêj be û li welatê ku Xwedayê te Xudan dide te, qencî bi te bê kirin.

¹⁷ “‘Tê kuştinê nekî.

¹⁸ “‘Tê zinayê nekî.

¹⁹ “‘Tê nedizî.

²⁰ “‘Tê li dijî cîranê xwe şahidiya derewîn nekî.

²¹ “‘Tê çav bernedî jina cîranê xwe. Tê nexwazî mal, zevî, xulam, xadim, ga, ker an jî tu tiştekî cîranê xwe.’

²² “Xudan ev gotin li çiyê, ji nav êgir, ji nav ewr û tariya kûr, ji tevahiya civaka we re bi dengekî bilind gotin. Wî tiştekî din lê zêde nekir. Wî ev gotin li ser du lewheyên kevirîn nivîsîn û dan min.

²³ “Gava çiya dişewitî û we ji nav tariyê deng bihîst, hemû rîspî û serekên eşîrên we nêzîkî min bûn.

²⁴ We got: ‘Xwedayê me Xudan rûmet û mezinahiya xwe nîşan da. Me ji nav êgir dengê wî bihîst. Me îro dît dibe ku Xwedê bi mirov re peyivî û ew mirov nemir.

²⁵ Lê ji bo çi emê niha bimirin? Wê ev agirê mezin me daqurtîne. Heke em careke din dengê Xwedayê xwe Xudan bibihîzin, emê bimirin.

²⁶ Ma ji hemû beşerê, kî wekî me dengê Xwedayê Jîndar ji nav êgir bihîst û sax ma?

²⁷ Tu nêzîk bibe û hemû tiştên ku Xwedayê me Xudan bêje, guhdarî bike. Paşê her tiştê ku Xwedayê me Xudan wê ji te re bêje, ji me re bêje û emê guh bidin û pêk bînin.’

²⁸ “Gava hûn bi min re peyivîn, Xudan dengê gotinên we bihîst û ji min re got: ‘Min dengê gotinên vî gelî ji te re gotiye, bihîst. Her tiştê hat gotin rast e.

²⁹ Xwezî dilekî wisa bi wan re hebûya ku ji min bitirsiyana û hergav hemû emrên min pêk bianiyana! Xwezî qencî her û her bi wan û zarokên wan bihata kirin!

³⁰ “‘Here ji wan re bêje: Bizivirin konên xwe.

³¹ Lê tu li vir li ba min bisekine. Ezê hemû emir, qanûn û rêbazên ku tê hînî wan bikî, ji te re bibêjim ku li wî welatê ezê bi milkî bidim wan, pêk bînin.’

³² Hay jê hebin! Çawa ku Xwedayê we Xudan li we emir kir, wan jî wiha pêk bînin. Ji wan bi milê çep û rastê ve averê nebin.

³³ Di hemû riya ku Xwedayê we Xudan li we emir kir de bimeşin ku hûn sax bimînin, qencî bi we bê kirin û li wî welatê ku hûnê ji xwe re bikin milk, emrê we dirêj be.