Dubarekirina Şerîetê 34 - Kurmanji Încîl

Mirina Mûsayê Pêxember

¹ Piştre Mûsa ji deştên Moavê hilkişiya Çiyayê Neboyê û derket serê Pîsgayê ku li pêşberî Erîhayê ye. Xudan tevahiya welêt nîşanî wî da; ji welatê Daniyan heta Gîladê,

² tevahiya axa Nefteliyiyan, welatê Efrayîmî û Minaşşeyiyan, hemû welatê Cihûdayiyan heta Derya Spî,

³ Negev û Deştê –ku herêma Erîhaya Bajarê Xurmeyan e– û ji wir heta Soarê.

⁴ Xudan jê re got: “Ev welat ew e ku min ji Îbrahîm, Îshaq û Aqûb re sond xwar û got: ‘Ezê bidim ziriyeta te.’ Min ew bi çavên te nîşanî te da, lê belê tê neçî wê derê.”

⁵ Li ser fermana devê Xudan, Mûsayê xulamê Xudan li wir, li welatê Moavê mir.

⁶ Ew li newaleke welatê Moavê, li pêşberî Bêtpeorê hat veşartin. Lê heta îro jî kes cihê gora wî nizane.

⁷ Gava Mûsa mir sed û bîst salî bû. Ne çavê wî qels, ne jî hêza wî kêm bûbû.

⁸ Gelê Îsraêl li deştên Moavê, sî rojan şîna Mûsa kir. Paşê rojên şîn û girîna Mûsa temam bûn,

⁹ Yêşûyê kurê Nûn bi ruhê şehrezayî tije bû. Çimkî Mûsa destê xwe danîbû ser wî. Çawa ku Xudan li Mûsa emir kiribû, gelê Îsraêl guhdariya Yêşû dikir.

¹⁰ Ji wê rojê vir ve, li welatê Îsraêl pêxemberekî wekî Mûsa yê ku Xudan rû bi rû pê re dipeyivî ranebû.

¹¹ Xudan ew şandibû ku ew li welatê Misrê ji Firewn, karmendên wî û tevahiya welatê wî re nîşan û kerametan pêşkêş bike.

¹² Mûsa li ber çavê tevahiya gelê Îsraêl kirinên hêzdar û tirsdar kirin.