Dubarekirina Şerîetê 18 - Kurmanji Încîl

Para Lêwiyî û Kahinan

¹ “Wê par û mîrasa kahinên Lêwiyî –hemû eşîra Lêwî– bi gelê Îsraêl re tunebe. Wê pêşkêşiyên şewitandinê ku ji Xudan re tên pêşkêşkirin bixwin,

² lê çawa ku Xudan jê re got, wê di nav birayên wan de mîrasa wan tunebe.

³ “Wê heqê kahinan ev be: Kesekî ji nav gel ku pez an dewar pêşkêş dike, wê hêt, ser û pê û ûr û roviyan bide wan.

⁴ Hûnê ji berê pêşî yê dexlê xwe, ji şeraba xwe ya nû, ji rûnê xwe yê zeytê û ji hiriya pêşî ya pezê hevring bûye, bidin kahinan.

⁵ Çimkî Xwedayê we Xudan ew ji nav hemû eşîran hilbijart ku ew û kurên wî hergav li hizûra wî bin û bi navê wî xizmetê bikin.

⁶ “Heke Lêwiyiyekî ji bajarekî welatê Îsraêl ku lê dima, bi daxwaza xwe bê dera ku Xudan wê hilbijêre,

⁷ wê li wir, wekî birayên xwe yên Lêwiyî yên li wir rûnin, li hizûra Xwedayê xwe Xudan dimînin, bi navê Xudan xizmetê bike.

⁸ Ji xeynî pereyê ji milkê bav hatiye, wê bi kahinên din re bi wekhevî li hev parve bikin.

Kirêtiyên miletan

⁹ “Gava hûn hatin wî welatê ku Xwedayê we Xudan dide we, adetên kirêt ên wan miletan hîn nebin û pêk neyînin.

¹⁰ Bila di nav we de kesê ku keç an kurê xwe di êgir de dike qurban an kesê falbaz, sêrbaz, remildar, efsûnkar,

¹¹ cinbaz an kesê ji ruh an miriyan zanînê dixwaze, tunebe.

¹² Çimkî kesên van tiştan dikin ji Xudan re kirêt in. Xwedayê we Xudan ji ber van karên kirêt, wan miletan li ber we diqewitîne.

¹³ Li hizûra Xwedayê xwe Xudan kamil bin.

Li ser pêxemberan

¹⁴ “Ev miletên ku hûnê biqewitînin, guhdariya sêrbaz û falbazan dikin. Lê Xwedayê we Xudan destûr nade we ku hûn wiha bikin.

¹⁵ Wê Xwedayê we Xudan ji nav we, ji nav birayên we pêxemberekî wekî min derîne. Hûnê guhdariya wî bikin.

¹⁶ We di roja civînê de, li Horêvê ji Xwedayê xwe Xudan ev daxwaz kiribû û gotibû: ‘Em careke din ne dengê Xwedayê xwe Xudan bibihîzin û ne jî vî agirê mezin bibînin. An na emê bimirin.’

¹⁷ Xudan ji min re got: ‘Gotina wan rast e.

¹⁸ Ezê ji bo wan, ji nav birayên wan pêxemberekî wekî te derînim. Wê gotina min ji devê wî bibihîzin û her tişta ez lê emir dikim wê ji wan re bêje.

¹⁹ Ezê bixwe wî kesî ceza bikim ku guhdariya gotina pêxemberê bi navê min dipeyive nake.

²⁰ Lê heke pêxemberekî ku min lê emir nekiriye bi quretî bi navê min bibêje yan bi navê îlahan bibêje, wê bê kuştin.’

²¹ “Dibe ku hûn di dilê xwe de bêjin: ‘Ezê çawa bi gotina Xudan negotiye bizanibim?’

²² Heke pêxember bi navê Xudan bipeyive û gotina kiriye neyê cih û rast dernekeve, ew gotin ne ji Xudan e. Pêxember bi quretî gotiye. Jê netirsin.