Dubarekirina Şerîetê 16 - Kurmanji Încîl

Cejna Derbasbûnê

¹ “Meha Avîvê pêk bînin û Cejna Derbasbûnê ya Xwedayê xwe Xudan pîroz bikin. Çimkî di meha Avîvê de Xwedayê we Xudan bi şev hûn ji Misrê deranîn.

² Hûnê li dera ku wê Xudan ji bo navê wî tê de be hilbijêre, ji pez û dewaran ji Xwedayê xwe Xudan re qurbana Derbasbûnê serjê bikin.

³ Hûnê bi goştê qurbanê re nanê bihevîrtirş nexwin. Ji ber ku hûn bi lez ji welatê Misrê derketin, hûnê heft rojan nanê şikeva bixwin ku nanê tengasiyê ye. Divê hûn wisa bikin ku di hemû rojên jiyana xwe de derketina ji Misrê ji bîr nekin.

⁴ Wê heft rojan li seranserê welatê we hevîrtirş neyê dîtin. Ji goştê qurbana hûn roja pêşî êvarê serjê dikin, wê heta serê sibê tiştek nemîne.

⁵ “Hûnê qurbana Derbasbûnê li tu bajarekî ku Xwedayê we Xudan dide we serjê nekin.

⁶ Hûnê tenê li dera ku wê Xwedayê we Xudan ji bo navê wî tê de be hilbijêre, êvarê, dema roj diçe ava, di dema hûn ji Misrê derketin de serjê bikin.

⁷ Li dera wê Xwedayê we Xudan hilbijêre, hûnê goştê xwe bipêjin û bixwin. Serê sibê hûnê vegerin konê xwe.

⁸ Hûnê şeş rojan nanê şikeva bixwin. Hûnê roja heftan ji bo Xwedayê xwe Xudan civîneke mezin çêkin û tu karî nekin.

Cejna Hefteyan

⁹ “Hûnê ji dema dasê li dexlê dixin, destpê bikin û heft hefteyan bijmêrin.

¹⁰ Li gorî bereketa Xwedayê we Xudan dide we, hûnê bi pêşkêşiyên dilxwaziyê jê re Cejna Hefteyan pîroz bikin.

¹¹ Hûnê li hizûra Xwedayê xwe Xudan, bi kur û keçên xwe, xulam û xadimên xwe, Lêwiyiyên li bajarên xwe, xerîbên nav xwe û bi sêwî û jinebiyên xwe re li dera ku wê Xudan ji bo navê wî tê de be hilbijêre, şa bibin.

¹² Bi bîr bînin hûn li Misrê kole bûn û hay jê hebin van qanûnan pêk bînin.

Cejna Holikan

¹³ “Piştî we bêndera xwe û ji ser mehserê berê xwe hilda, hûnê ji bo xwe heft rojan Cejna Holikan pîroz bikin.

¹⁴ Di vê cejnê de hûn bi kur û keçên xwe, xulam û xadimên xwe, Lêwiyiyên li bajarên xwe, xerîbên li nav xwe û sêwî û jinebiyên xwe re şa bibin.

¹⁵ Li dera ku wê Xudan hilbijêre, hûnê heft rojan vê cejnê ji Xwedayê xwe Xudan re pîroz bikin. Wê Xwedayê we Xudan hemû berê we û hemû keda destê we bereket bike û hûnê esse şa bibin.

¹⁶ “Salê sê caran, di Cejna Nanê Şikeva, di Cejna Hefteyan û di Cejna Holikan de, wê hemû mêrên we li hizûra Xwedayê we Xudan, li dera ku wê hilbijêre xuya bibin. Wê tu kes destvala neyê hizûra Xudan.

¹⁷ Wê herkes li gorî bereketa ku Xwedayê we Xudan daye, ango wê bi qasî ji destê wî tê bide.

Kifşkirina serekan

¹⁸ “Li bajarên ku Xwedayê we Xudan dide we, hûnê ji bo her eşîrê dadger û serekan kifş bikin. Divê ew gel bi edaletê îdare bikin.

¹⁹ Hûnê heq nedin xwarin, meyla kesan nekin û bertîlê nestînin. Çimkî bertîl çavên kesê şehreza kor dike û dozên kesên mafdar serobino dike.

²⁰ Hûnê rastiyê, tenê li pey rastiyê herin ku hûn bijîn û welatê ku Xwedayê we Xudan dide we, ji xwe re bikin milk.

²¹ “Hûnê nêzîkî gorîgeha Xwedayê xwe Xudan a ku hûn ji bo wî çêdikin, tu darekê neçikînin ku pûtekî Aşêrayê be.

²² Hûnê kevirbelekî neçikînin ku Xwedayê we Xudan jê nefret dike.