Dubarekirina Şerîetê 10 - Kurmanji Încîl

Mûsa careke din emran distîne

¹ “Wê gavê Xudan ji min re got: ‘Ji bo xwe, wekî yên pêşî du lewheyên kevirîn bibire û li çiyê were ba min. Ji bo xwe sindoqeke jî, ji darê çêke.

² Gotinên li ser lewheyên pêşî bûn û te ew şikandin, ezê li ser wan binivîsim û tê wan bixî sindoqê.’

³ “Li ser vê yekê min ji dara aqasyayê sindoqekê çêkir û du lewheyên kevirîn wekî yên pêşî birîn. Ez çûm çiyê, herdu lewhe di destê min de bûn.

⁴ Xudan wekî berê careke din li ser van lewheyan heman gotin, Deh Emir nivîsandin ku wî di roja civînê de ji nav êgir ji we re gotibû û dan min.

⁵ Ez zivirîm, ji çiyê daketim û min lewhe xistin sindoqa ku min çêkiribû. Çawa ku Xudan li min emir kiriye, ew êdî li wê derê ne.”

⁶ –Îsraêliyan ji bîrên Yaeqaniyan koçî Mosêrayê kirin. Harûn li wê derê mir û li wir hat veşartin. Êlezarê kurê wî li cihê wî bû kahin.

⁷ Îsraêliyan ji wê derê koçî Gudgodayê, ji Gudgodayê jî koçî Yotvatayê kirin ku welatekî geliyên avî lê hebûn.

⁸ Wê gavê Xudan eşîra Lêwî veqetand ku heta îro Sindoqa Peymanê hilgirin, li hizûra wî bisekinin, xulamiyê bikin û bi navê wî pîroz bikin.

⁹ Loma par û mîraseke Lêwî ya bi birayên wî re tuneye. Çawa ku Xwedayê we Xudan soz da wî, mîrasa wî Xudan e.–

¹⁰ “Çawa ku min berê kiribû, çil şev û çil rojan li çiyê mam. Xudan dîsa lavakirina min bihîst û nexwest we tune bike.

¹¹ Xudan ji min re got: ‘Rabe here! Bide pêşiya gel ku ew herin welatê min bi sondxwarin dabû bav û kalên wan ku ji xwe re bikin milk.’

Ji Xudan bitirsin

¹² “Ya gelê Îsraêl! Xwedayê we Xudan niha ji we çi dixwaze? Tenê vê dixwaze: Hûn ji Xwedayê xwe Xudan bitirsin, di riyên wî de bimeşin, jê hez bikin, bi hemû dilê xwe û bi hemû canê xwe xulamiya wî bikin

¹³ û emir û rêbazên wî yên ku ez îro ji we re dibêjim pêk bînin. Ev jî, ji bo qenciya we ye.

¹⁴ Ezman, ezmanê ezmanan, rûyê erdê û her tiştê tê de, yê Xwedayê we Xudan e.

¹⁵ Lê Xudan ji bav û kalên we hez kir û bi tenê bi wan ve girêdayî ma. Wî hûn ên ku ji ziriyeta wan in, ji hemû gelan hilbijartin û hûn îro jî wisa ne.

¹⁶ Loma dilê xwe sinet bikin û êdî serhişkî nekin.

¹⁷ Çimkî Xwedayê we Xudan, Xwedayê Herî Mezin, Rebê Reban, Xwedayê mezin, hêzdar û biheybet e. Ew meyla kesî nagire, bertîlê nastîne,

¹⁸ ji bo sêwî û jinebiyan edaletê dike, ji xerîban hez dike û nan û kincan dide wan.

¹⁹ Hûn jî, ji xerîban hez bikin, çimkî hûn jî li welatê Misrê xerîb bûn.

²⁰ Ji Xwedayê xwe Xudan bitirsin, xulamiya wî bikin. Pê ve girêdayî bin û bi navê wî sond bixwin.

²¹ Ew pesnê we ye. Ew Xwedayê we ye ku van karên mezin û bi heybet ên ku we bi çavên xwe dîtin, kirin.

²² Bav û kalên we yên çûn Misrê heftê kes bûn, lê niha Xwedayê we Xudan hûn bi qasî stêrên ezmanan zêde kirin.