Dîrok I, 29 - Kurmanji Încîl

Diyariyên ji bo avakirina Perestgehê

¹ Dawidê Padîşah ji tevahiya civakê re got: “Xwedê kurê min Silêman, wî tenê ew hilbijart. Xort û xeşîm e, lê kar mezin e. Çimkî ev perestgeh, ne ji bo mirov e, lê ji bo Xwedê Xudan e.

² Bi tevahiya hêza xwe, ji bo Mala Xwedayê xwe, min ji bo tiştên zêrîn, zêr; ji bo tiştên zîvîn, zîv; ji bo tiştên tûncîn, tûnc; ji bo tiştên hesinî, hesin; ji bo tiştên darîn, dar; kevirên onîks, kevirên qewartî, kevirên zeynetî, kevirên rengorengo û kevirên hêja û gelek mermer amade kirin.

³ Ji bilî van, ji her tiştên ku min ji bo Mala Pîroz amade kirin zêdetir, ji ber ku xezîneya min a zêr û zîvan heye, ji bo hezkirina min a ji bo Mala Xwedayê min, ez van didim:

⁴ Sê hezar telant zêrê Ofîrê. Ji bo seyandina dîwarên xaniyên Perestgehê heft hezar telant zîvê xas.

⁵ Ji bo tiştên zêrîn, zêr; ji bo tiştên zîvîn, zîv; didim karên ku hoste bi destê xwe bikin. Îro kî dixwaze ji dil tevî diyariyan xwe pêşkêşî Xudan bike?”

⁶ Li ser vê yekê serekên binemalan, serekên eşîrên gelê Îsraêl, serekên sedan û serekên hezaran û serekên li ser karên padîşah, bi dilxwazî diyarî birin.

⁷ Ji bo xizmeta Mala Xwedê, pênc hezar telant û deh hezar darîk zêr, deh hezar telant zîv, hijdeh hezar tûnc û sed hezar telant jî hesin dan.

⁸ Kesên ku pê re kevirên hêja hebûn, bi destê Yehiyêlê Gêrşonî dan xezîneya Mala Xudan.

⁹ Gel ji bo ku ji dil pêşkêş dikir şa bû. Çimkî wan bi yek dilî, pêşkêşiyên dilxwaziyê pêşkêşî Xudan kirin. Dawidê Padîşah jî gelek şa bû.

Pesindariya Dawidê Padîşah

¹⁰ Dawid li ber çavê tevahiya civakê pesindariya Xudan kir. Dawid got: “Tu ji herheyiyê heta hetayê pîroz bî, Xwedayê bavkalê me Îsraêl Xudan!

¹¹ Ya Xudan, mezinahî, hêzdarî, rûmet, Serketin û heşmet, yên te ne! Çimkî her tiştên li erdê û li ezmanan ên te ne. Ya Xudan, Padîşahî ya te ye. Tu jî serwerê di ser her tiştî re yî.

¹² Rûmet û dewlemendî ji te ne. Tu serwerê hemû tiştan î. Hêz û qewet di destê te de ne, Mezinkirin û hêzdarkirina her kesî di destê te de ye.

¹³ Niha, ya Xwedayê me, em şikirdariya te dikin. Em pesnê navê te yê berz didin.

¹⁴ “Lê ez kî me û gelê min çi ye ku em wisa ji dil diyariyan pêşkêşî te bikin? Çimkî her tişt ji te ye û me ji destê te da te.

¹⁵ Çimkî em wekî bav û kalên xwe, li ber te xerîb û biyanî ne. Rojên me li ser rûyê dinyayê wekî siyê ne, namînin.

¹⁶ Ya Xwedayê me Xudan, tevahiya vê ked û milkê zêde ku me ji bo Perestgeha me ji bo avakirina Mala ji bo navê te yê pîroz amade kiriye, ji destê te ye. Hemû jî yê te ye.

¹⁷ Ya Xwedayê min, ez baş dizanim ku tu dilan diceribînî û ji rastiyê hez dikî. Min tevahiya van tiştan, bi rastiya dilê xwe û ji dil da te. Min dît ku gelê te, li vir bi şahî û dilxwazî pêşkêşî te kir.

¹⁸ Ya Xudan, Xwedayê bavkalên me Îbrahîm, Îshaq û Îsraêl! Vê di niyet û fikrên dilê gelê xwe de heta hetayê texsîr neke û dilê wan xurt bike ku her bi te re bin.

¹⁹ Dilekî kamil bide Silêmanê kurê min ku emir, qanûn û rêbazên te pêk bîne û Mala ku ez amadekariyên wê dikim, ava bike.”

²⁰ Paşê Dawid ji tevahiya civatê re got: “Pesnê Xwedayê xwe Xudan bidin!” Bi vî awayî tevahiya civatê, pesnê Xwedayê bavkalên xwe Xudan da. Serê xwe tewandin û li ber Xudan û padîşah deverû çûn erdê.

Silêmanê kurê Dawidê Padîşah tê kifşkirin

²¹ Dotira rojê wan qurban ji Xudan re serjê kirin. Qurbana şewitandinê yên ku ji bo Xudan hatin şewitandin ev bûn: Hezar conega, hezar beran, hezar berx, pêşkêşiyên wan ên rijandinê û pêşkêşiyên din ji bo tevahiya gelê Îsraêl pêşkêş kirin.

²² Wê rojê bi şabûneke mezin li ber Xudan xwarin û vexwarin. Cara diduyan Silêmanê kurê Dawid wekî padîşah kifş kir û ji bo Xudan wî wekî serwer, Sadoq jî wekî kahin pîroz kirin.

²³ Silêman di cihê bavê xwe Dawid de, wekî padîşah li ser textê Xudan rûnişt. Karê wî baş meşiya û tevahiya gelê Îsraêl guhdariya wî kir.

²⁴ Tevahiya serek, mêrxas û tevahiya kurên Dawidê Padîşah soz dan ku girêdahiyê Silêman bin.

²⁵ Xudan, Silêman li ber çavê tevahiya gelê Îsraêl mezin kir û heşmeta padîşahiya bêhempa da wî ku bi tu padîşahekî li welatê Îsraêl heta niha nebû.

Mirina Dawidê Padîşah

²⁶ Dawidê kurê Yêşa li tevahiya gelê Îsraêl padîşahî kir.

²⁷ Wî çil salan li ser gelê Îsraêl padîşahî kir; heft salan li Hevronê û sî û sê salan jî li Orşelîmê.

²⁸ Ew di kalbûna baş de mir. Wî bi têra xwe jiyan, rûmet û dewlemendî dît. Kurê wî Silêman li cihê wî bû padîşah.

²⁹ Qewimînên din ên serweriya Dawidê Padîşah, ji serî heta binî, di Qewimînên Samûêlê Zanyar, di Qewimînên Natanê Pêxember û di Nivîsa Gadê Zanyar de hatin nivîsandin.

³⁰ Herwiha hemû qeydên hêz û padîşahiya wî û qewimînên li ser wî, gelê Îsraêl û padîşahiyên welatan jî bi wan re ne.