Dîrok I, 28 - Kurmanji Încîl

Pîlansaziyên Dawidê Padîşah ên li ser Perestgehê

¹ Dawid hemû serekên gelê Îsraêl; serekên eşîran, serdarên yekîneyên ku xulamiya padîşah dikirin, serhezar, sersed, berpirsiyarên tevahiya mal û keriyên padîşah û kurên wî, peywirdarên qesrê, mêrxas û şervanên hêzdar, li Orşelîmê civandin.

² Dawidê Padîşah rabû ser xwe û got: “Ya bira û gelê min, bibihîzin! Di dilê min de hebû ku ez maleke ji bo Sindoqa Peymana Xudan ava bikim. Bila pêgeha Xwedayê me rihet be. Min amadekariya wê jî kir.

³ Lê Xwedê ji min re got: ‘Ji ber ku tu şervan î û te xwîn rijand, tê ji bo navê min malekê ava nekî.’

⁴ “Lê Xwedayê Îsraêl Xudan, ji nav tevahiya mala bavê min ez hilbijartim ku bi awayekî herheyî li ser gelê Îsraêl bibim padîşah. Wî wekî serwer Cihûda û ji Mala Cihûda mala bavê min, hilbijartiye. Paşê ji nav kurên bavê min, ew razî bû ku min bike padîşahê li ser tevahiya gelê Îsraêl.

⁵ Ji nav tevahiya kurên min –çimkî wî gelek kur dan min– Xudan Silêman hilbijart ku li ser gelê Îsraêl be û li ser textê padîşahiya Xudan rûne.

⁶ Xudan ji min re got: ‘Kesê ku mal û hewşên min ava bike, Silêmanê kurê te ye. Çimkî min ew hilbijart ku ji min re bibe kur. Ezê jê re bibim bav.

⁷ Heke ew bi baldarî emir û rêbazên min pêk binê, wekî ew îro pêk tîne, ezê padîşahiya wî her û her bidomînim.’

⁸ “Loma li ber çavê tevahiya gelê Îsraêl ku civaka Xudan e û gava Xwedayê me dibihîze, hûn bi kûrahî hemû emir û rêbazên Xwedayê xwe Xudan bikin û pêk bînin ku hûn vî welatê qenc, ji xwe re bikin milk û ji kurên xwe re wekî mîrasa herheyî bihêlin.

⁹ “Silêmano! Ya kurê min! Xwedayê bavê xwe nas bike. Bi yek dilî û canê bibiryar xulamiya wî bike. Çimkî Xudan lêkolîna tevahiya dilan dike. Hemû niyet û fikran fêm dike. Heke tu lê bigerî, wê xwe bide dîtin. Lê heke tu dev ji wî berdî, wê heta hetayê te red bike.

¹⁰ Niha binêre! Çimkî Xudan ji bo ku maleke pîrozgehê ava bike, tu hilbijartî. Hêzdar be, rabe û bike!”

¹¹ Dawid mînaka eywan û xaniyên Perestgehê da Silêmanê kurê xwe. Tê de xezîneyên wê, odeyên wê yên jorîn û hundirîn û odeya derxûnê hebûn.

¹² Wî mînaka hemû tiştên di dilê xwe de da wî: Hewşên Mala Xudan, hemû odeyên derdorê, xezîneyên Mala Xwedê û xezîneyên xelatên hatine bexişandin,

¹³ pergala beşên kahin û Lêwiyiyan û rê û rêbazên her karê xizmeta Mala Xudan, pergala çêkirina hemû taximên xizmetê yên li Mala Xudan,

¹⁴ li gorî giraniya zêrê taximên zêrîn ji bo her cure xizmetê û giraniya taximên zîvîn ji bo her cure xizmetê,

¹⁵ ji bo her şamdank û giraniya qendîlên wê, li gorî giraniya şamdankên zêrîn û qendîlên wê û giraniya şamdankên zîvîn û qendîlên wê, ji bo her cure xizmetê,

¹⁶ li gorî giraniya zêrê her sifreya Nanê Xêrê û giraniya zîvê sifreyên zîvîn,

¹⁷ pergala çêkirina zêrê xas ê sêgoyên goşt, tasik û şerbikan, ji bo tasên zêrîn li gorî giraniya wan, ji bo tasên zîvîn li gorî giraniya wan,

¹⁸ ji bo gorîgeha bixûrê ya zêrê xas li gorî giraniya wê û mînaka wî ya erebe û xerûbên zêrîn ku bi baskên xwe yên vekirî Sindoqa Peymana Xudan dinixamt.

¹⁹ Dawid got: “Tevahiya van tiştan, tevahiya van karên vê pîlansaziyê, ji aliyê Xudan, bi riya nivîsê ji min re hat ragihandin.”

²⁰ Dawid ji Silêmanê kurê xwe re got: “Hêzdar û wêrek be! Here bike! Netirse û neşikê. Çimkî Xwedê Xudan, Xwedayê min bi te re ye. Heta tevahiya karê xizmeta Mala Xudan neqede, ew te bêkêr nahêle û te bernade.

²¹ Ji bo tevahiya xizmeta Mala Xwedê, beşên kahin û Lêwiyiyan, va ne li vir in. Her zilamê hoste û dilxwaz, wê di her cure karî de bi te re be. Tevahiya serek û gelê te, li benda fermanên te ne.”