Dîrok I, 27 - Kurmanji Încîl

Yekîneyên artêşê

¹ Ev, qeyda gelê Îsraêl tevî serekên binemal, sersed û serhezar, peywirdarên ku di her tişta derbarê yekîneyan de xulamiya padîşah dikirin bixwe ye. Yekîne salewext meh bi meh diçûn û dihatin. Hejmara her yekîneyê ji bîst û çar hezar kesan pêk dihat.

² Ji bo meha pêşî, li ser yekîneya pêşî, Yaşovamê kurê Zavdiyêl hebû. Di yekîneya wî de bîst û çar hezar kes hebûn.

³ Ew Peresî bû. Ji bo meha pêşî serdarê hemû fermandaran bû.

⁴ Dodayê Ahohî li ser yekîneya meha diduyan bû. Mîqlot serpeywirdarê yekîneya wî bû. Di yekîneya wî de bîst û çar hezar kes hebûn.

⁵ Benayayê kurê Yehoyadayê Kahin fermandarê yekîneya meha sisêyan bû. Di yekîneya wî de bîst û çar hezar kes hebûn.

⁶ Benaya mêrxasekî Sî Serekan û pêşengê wan bû. Emmîzavadê kurê wî peywirdarê yekîneya wî bû.

⁷ Esahêlê birayê Yoav li ser yekîneya meha çaran bû. Piştre Zevadyayê kurê wî ket cihê wî. Di yekîneya wî de bîst û çar hezar kes hebûn.

⁸ Şamhûtê Yîzrahî fermandarê yekîneya meha pêncan bû. Di yekîneya wî de bîst û çar hezar kes hebûn.

⁹ Îrayê kurê Îqqêşê Teqoayî li ser yekîneya meha şeşan bû. Di yekîneya wî de bîst û çar hezar kes hebûn.

¹⁰ Helesê Pelonî li ser yekîneya meha heftan bû. Ew ji Efrayîmiyan bû. Di yekîneya wî de bîst û çar hezar kes hebûn.

¹¹ Sîbbexayê Huşayî li ser yekîneya meha heştan bû. Ew ji Zerahiyan bû. Di yekîneya wî de bîst û çar hezar kes hebûn.

¹² Aviyezerê Enatotî li ser yekîneya meha nehan bû. Ew ji Binyamîniyan bû. Di yekîneya wî de bîst û çar hezar kes hebûn.

¹³ Mahrayê Netofayî li ser yekîneya meha dehan bû. Ew ji Zerahiyan bû. Di yekîneya wî de bîst û çar hezar kes hebûn.

¹⁴ Benayayê Pîretonî li ser yekîneya meha yanzdehan bû. Ew ji Efrayîmiyan bû. Di yekîneya wî de bîst û çar hezar kes hebûn.

¹⁵ Heldayê Netofayî li ser yekîneya meha duwanzdehan bû. Ew ji ziriyeta Otniyêl bû. Di yekîneya wî de bîst û çar hezar kes hebûn.

Serwerên eşîrên Îsraêlê Pêxember

¹⁶ Li ser eşîrên Îsraêl ev kes hebûn: Li ser Rûbêniyan Êliyezerê serwer ku kurê Zikrî bû, li ser Şimûniyan Şefatyayê kurê Maexa,

¹⁷ li ser Lêwiyiyan Haşavyayê kurê Qemûêl û li ser Harûniyan Sadoq,

¹⁸ li ser Cihûdayiyan Êlîhûyê birayê Dawid hebû, li ser Îssexariyan Omriyê kurê Mîxayîl,

¹⁹ li ser Zevûloniyan Yîşmayayê kurê Ovadya, li ser Nefteliyiyan Yerîmotê kurê Ezriyêl,

²⁰ li ser Efrayîmiyan Hoşêyayê kurê Ezazya; li ser nîveşîra Minaşşe Yoêlê kurê Pedaya

²¹ û li ser nîveşîra din a Minaşşe ya li Gîladê Îddoyê kurê Zekeriya, li ser Binyamîniyan Yaesiyêlê kurê Avnêr

²² û li ser Daniyan Ezarêlê kurê Yeroham hebû. Ev serekên eşîrên Îsraêl bûn.

²³ Lê Dawid kesên bîst salî û berjêrtir nehejmart. Çimkî Xudan gotibû ku wê gelê Îsraêl bi qasî stêrên ezmanan zêde bike.

²⁴ Yoavê kurê Serûya dest bi hejmartinê kir, lê nebir serî. Ji ber vê hejmartinê xezeb bi ser gelê Îsraêl de bariya. Ji ber vê yekê encama hejmartinê di Nivîsa Qewimînên Dawidê Padîşah de cih negirt.

Berpirsiyarên din

²⁵ Ezmawetê kurê Ediyêl li ser xezîneyên padîşah bû. Yonatanê kurê Ûzziya li ser embarên bênder, bajar, gund û bircan bû.

²⁶ Ezriyê kurê Kelûv li ser karê erd û zeviyan bû.

²⁷ Şîmiyê Ramayî li ser rezan bû û Zavdiyê Şefamî li ser berên rezan û kulînên şerabê bû.

²⁸ Baal-Hananê Gederî li ser darzeytûn û darhejîrên li Şefêlayê bû. Yoaş li ser kulînên zeytê bû.

²⁹ Şîtrayê Şaronî li ser dewarên ku li Şaronê diçêriyan û Şafatê kurê Edla ji dewarên li deştan berpirsiyar bû.

³⁰ Ovîlê Îsmaîlî li ser deveyan, Yehdeyayê Mêronotî li ser keran û

³¹ Yazîzê Hacerî li ser pêz bû. Tevahiya wan ji mal û milkê Dawidê Padîşah berpirsiyar bûn.

³² Yehonatanê mamê Dawid şêwirmend bû. Mirovekî fêmdar û nivîsende bû. Yehiyêlê kurê Haxmonî xizmeta kurên padîşah dikir.

³³ Ahîtofêl şêwirmendê padîşah bû. Huşayê Arkî hevalê padîşah bû.

³⁴ Piştî Ahîtofêl, Yehoyadayê kurê Benaya û Aviyatar ketin cihê wî. Yoav fermandarê artêşa padîşah bû.