Dîrok I, 20 - Kurmanji Încîl

Bajarê Rabbayê tê bidestxistin

¹ Di biharê de, gava padîşah diçin seferê, Yoav artêş derxist seferê. Dema Yoav welatê Emmoniyan helak kir û bajarê Rabbayê dorpêç kir, Dawid li Orşelîmê dima. Yoav êrîşî Rabbayê kir û hilweşand.

² Dawid taca Padîşahê Emmoniyan ji serê wî hilda. Wî dît ku tac bi kevirên hêja hatibû nexşkirin û giraniya wê bi qasî telantek zêr bû. Wan ew tac da serê Dawid. Dawid ji bajêr gelek talan bir.

³ Gelê ku li wê derê dijiya, ji malên wan derxist, ew di karên ku bi birek, tevrê hesinî û bivir dihatin kirin de da xebitandin. Dawid ev yek li hemû bajarên Emmoniyan pêk anî. Paşê bi artêşa xwe re vegeriya Orşelîmê.

Şerên li dijî Filîstiyan

⁴ Piştî demekê bi Filîstiyan re li Gezerê şer derket. Di wî şerî de Sîbbexayê Huşayî, Sîppayê ji ziriyeta Refa kuşt. Filîstî têk çûn.

⁵ Di navbera gelê Îsraêl û Filîstiyan de dîsa şer derket. Êlhananê kurê Yayîr, Lahmiyê birayê Golyatê Gatî kuşt ku destiyê rima wî wekî darê tevnê bû.

⁶ Li Gatê careke din şer derket. Li wir zilamekî bejinbilind hebû ku dest û lingên wî şeştilî bûn. Bi giştî bîst û çar tiliyên wî hebûn. Ew jî, ji ziriyeta Refa bû.

⁷ Gava zilam tinazê xwe bi gelê Îsraêl kir, Yonatanê kurê Şîmayê birayê Dawid ew kuşt.

⁸ Ew ji ziriyeta Refa bûn û li Gatê diman. Ew bi destê Dawid û zilamên wî hatin kuştin.