Derketin 37 - Kurmanji Încîl

Çêkirina Sindoqa Peymanê

¹ Besalêl sindoqê ji dara aqasyayê çêkir. Dirêjahiya wê du gaz û nîv, berfirehiya wê gaz û nîv û bilindahiya wê jî gaz û nîvek bû.

² Wî hundir û derveyî wê bi zêrê xas kiras kir û toqeke zêrîn avêt dora wê.

³ Wî ji bo her çar lingên wê çar xelekên zêrîn rijandin, du xelek li kêlekekê, du xelekên din jî li kêleka din.

⁴ Wî ji dara aqasyayê destî çêkirin û ew bi zêr kiras kirin.

⁵ Ji bo hilgirtina sindoqê, wî destî di xelekên kêlekên sindoqê re derbas kirin.

⁶ Wî derxûn ji zêrê xas çêkir. Dirêjahiya wê du gaz û nîv, berfirehiya wê gaz û nîvek bû.

⁷ Wî du xerûbên zêrê karê kutayî çêkirin. Ew li ser herdu kêlekên derxûn de bûn.

⁸ Wî xerûbekî li ser kêlekê, yê din jî li ser kêleka din çêkirin. Wî wan ji herdu xerûban ve, bi derxûn ve çêkirin yek perçe.

⁹ Xerûb baskên xwe li aliyê jorîn vedikirin û bi wan derxûn dinixamtin. Rûyê wan li hev bûn û li derxûn dinêrin.

Çêkirina Maseya Nanê Hizûrê

¹⁰ Wî mase ji dara aqasyayê çêkir, dirêjahiya wê du gaz, berfirehiya wê gazek û bilindahiya wê gaz û nîvek bû.

¹¹ Wî mase bi zêrê xas kiras kir û toqeke zêrîn avêt dora wê.

¹² Wî li dora toqê bi qasî çar tiliyan keviyek çêkir û toqeke zêrîn avêt dora wê.

¹³ Wî ji bo maseyê çar xelekên zêrîn çêkirin û li ser çar lingan danîn ser çar kujan.

¹⁴ Xelekên destiyên ji bo hilgirtina maseyê, nêzîkî kuj bûn.

¹⁵ Wî destiyên maseyê hildide, ji dara aqasyayê çêkirin û bi zêr kiras kirin.

¹⁶ Wî taximên maseyê –tas û firaxên bixûrê tevî tas û şerbikên pêşkêşiya rijandinê– ji zêrê xas çêkirin.

Çêkirina Şamdankê

¹⁷ Wî ji zêrê xas şamdankekê çêkir. Ling û stûna wê ji zêrê karê çakûç bû. Tasik, tevî kulîlk û qalikên wan, ji wê bûn.

¹⁸ Ji kêlekên şamdankê şeş mil radibûn, sê mil ji kêlekekê û sê milên din ji kêleka din jî.

¹⁹ Li ser her milî, di şiklê kulîlka behîvê de sê tasik, tevî kulîlk û qalikê wê hebû. Her şeş milên şamdankê wiha bûn.

²⁰ Li ser laşê şamdankê di şiklê kulîlka behîvê de çar tasik, tevî kulîlk û qalikê wan, hebûn.

²¹ Ji bo her şeş milên ku ji şamdankê bilind dibûn, di bin herdu milên pêşî, herdu milên diduyan û herdu milên sisêyan de qalik ji ber xwe hebûn.

²² Qalik û milên wan bûn yek perçe. Tevahî ji zêrê xas yê karê çakûç bû.

²³ Wî heft qendîl, maşikên fitîlan û bixûrdankên wê ji zêrê xas çêkirin.

²⁴ Wî şamdank û taximên wê ji telantekê zêrê xas çêkirin.

Çêkirina Gorîgeha Bixûrê

²⁵ Wî ji dara aqasyayê gorîgeha bixûrê çêkir. Ew çargoşe bû. Dirêjahî û berfirehiya wê gazek, bilindahiya wê jî du gaz bû. Qiloçên wê ji wê bûn.

²⁶ Wî ser wê, her aliyê wê û qiloçên wê bi zêrê xas kiras kirin. Ji bo dora wê jî toqeke zêrîn çêkir.

²⁷ Wî li herdu kêlekên wê, li bin toqa wê du xelekên zêrîn çêkirin. Wan ji bo derbaskirina destiyên hilgirtina gorîgehê bûn.

²⁸ Wî destî ji dara aqasyayê çêkirin û bi zêr kiras kirin.

²⁹ Wî bi hosteyî rûnê pîroz û bixûra xas a bêhnxweş çêkir.