Derketin 26 - Kurmanji Încîl

Konê Hevdîtinê

¹ “Tê mesken ji deh perdeyên kitanê tenik honandî û tayên sor, binevşî û şînê tarî çêkî. Tê ser wan xerûbên bi hosteyî hatibe xemilandin çêkî.

² Wê dirêjahiya her perdeyê bîst û heşt gaz, berfirehiya wê jî çar gaz be. Wê pîvana her perdeyê yek be.

³ Wê pênc perde, bi hev ve bên danîn û pênc perde yên din jî bi hev ve bên danîn.

⁴ Tê li keviya perdeya herî paşî ya desteya pêşî, qulpikên şînê tarî vekî. Tê li keviya desteya din jî wisa bikî.

⁵ Tê di perdeyekê de pêncî qulpikan vekî û di keviya perdeya desteya din de jî pêncî qulpikên din vekî. Wê qulpik li pêşberî hev bin.

⁶ Tê pêncî qopçeyên zêrîn çêkî û perdeyan bi qopçeyan bi hev ve deynî. Bi vî awayî wê mesken bibe yek perçe.

⁷ “Tê ji mûyê bizinê perdeyan çêkî ku wekî xêliyekê meskên binixême. Tê yanzdeh perdeyan çêkî.

⁸ Wê dirêjahiya her perdeyê sî gaz, berfirehiya her perdeyê jî çar gaz be. Wê pîvana yanzdeh perdeyan yek be.

⁹ Tê pênc perdeyan cuda bi hev ve deynî, şeş perdeyan jî cuda bi hev ve deynî. Tê perdeya şeşan li pêş kon qat bikî.

¹⁰ Tê li keviya perdeya paşî ya desteyê pêncî qulpikan, li keviya perdeya paşî ya desteya din jî pêncî qulpikan vekî.

¹¹ Tê ji tûnc pêncî qopçeyan çêkî, qopçeyan bixî hundirê qulpikan û bi hev ve deynî ku kon bibin yek perçe.

¹² Wê nîv perde ya ku ji meskên zêde maye, li pişt kon bişeride.

¹³ Qumaşê ku ji aliyê dirêj ê perdeyan zêde maye, wê ji kêleka kon bi qasî gazekî bişeride û meskên binixême.

¹⁴ Tê ji bo kon, ji çermê beran ê bi hibra sor xêliyekê û li ser wê jî, ji çermê beran ê şînê tarî xêliyeke din çêkî.

¹⁵ “Tê ji bo meskên, ji dara aqasyayê, çîtên çik çêkî.

¹⁶ Wê dirêjahiya wan çîtan deh gaz, berfirehiya wan jî gaz û nîvek be.

¹⁷ Wê du bizmikên her çîtê hebin ku li hev dikevin. Tê ji bo hemû çîtên meskên wiha bikî.

¹⁸ Tê ji bo meskên çîtan wisa çêkî. Tê ji bo başûrê wî bîst çîtan çêkî.

¹⁹ Tê çil binikên zîv çêkî ku di bin her çîtê de bin. Wê ji bo herdu çîtan, du bizmik hebin.

²⁰ Wê li aliyê duyemîn ê meskên ê ku li bakur dinêre bîst çîtan,

²¹ tevî çil binikên zîvîn ên wan hebin. Wê ji bo herdu çîtan, du binik hebin.

²² Tê ji bo aliyê paşîn ê meskên ê ku li rojava dinêre, şeş çîtan çêkî.

²³ Tê li aliyê paşîn du çîtan çêkî ku kujên meskên bin.

²⁴ Wê binê van çîtên ku bibin kuj cuda bimîne û ser wan bi xeleka pêşî bi hev ve bê danîn. Wê herdu çîtên dibin kuj, wisa bin.

²⁵ Bi vî awayî, wê heşt çît tevî binikên zîvîn ên wan hebin. Wê di bin her çîtê de du binik hebin ku dikin şanzdeh binik.

²⁶ “Tê ji dara aqasyayê girşan çêkî. Tê ji bo çîtên aliyekî meskên pênc girş,

²⁷ ji bo çîtên aliyê din ê meskên pênc girşan û ji bo çîtên aliyê paşîn ê meskên ê ku li rojava dinêre, pênc girşan çêkî.

²⁸ Wê girşa navîn ê ku di nava çîtan de ye, ji aliyekî bigihîje aliyê din.

²⁹ Tê çîtan bi zêr kiras bikî û xelekên ku girş tê re derbas dibin ji zêr çêkî. Tê girşan jî bi zêr kiras bikî.

³⁰ “Li gorî pergala ku li serê çiyê bi te hat nîşandan, tê meskên ava bikî.

³¹ “Tê perdeyekê ji tayên sor, binevşî û şînê tarî û kitanê tenik honandî çêkî. Wê ser wê xerûb bi hosteyî bên xemilandin.

³² Tê wê deynî ser çar stûnên dara aqasyayê ku bi zêr hatine kiraskirin. Wê çengelên wan ên zêrîn hebin. Wê li ser çar binikên zîv bên danîn.

³³ Tê perdeyê li biniya qopçeyan daleqînî û Sindoqa Şahidiyê deynî pişt wê. Wê perde Cihê Pîroz û Cihê Herî Pîroz ji hev veqetîne.

³⁴ Tê derxûn, deynî ser Sindoqa Şahidiyê ya ku li Cihê Herî Pîroz e.

³⁵ Tê maseyê deynî aliyê din ê perdeyê û şamdankê deynî pêşberî wê, aliyê meskên ê ku li bakur dinêre. Wê mase li aliyê başûr bimîne.

³⁶ “Tê ji bo deriyê kon, ji tayên sor, binevşî û şînê tarî û kitanê tenik honandî, perdeyeke binexş çêkî.

³⁷ Ji bo daleqandina perdeyê, tê ji dara aqasyayê pênc stûnan çêkî û bi zêr kiras bikî. Wê çengelên wê jî, ji zêr bin. Tê ji bo stûnan ji tûnc pênc binikan birijînî.”