Nyimbo 97 - Bhukhu la Kuyamba

Mulungu ntongi wadziko lentse

¹ Chawuta antonga! Lekani dziko lisekelele! Lekani ntsuwa zizinji zikondwe!

² Mitambo nan'dima bzidamuzungunuka, chilungamo nakulinganiza ndiyo matsinde yampando wake.

³ Moto uniyenda pamaso pake, uchitentha azondi wake mbali zentse.

⁴ Mpheni zake ziniwinika dziko lentse, dziko lim'bziwona lichitekenyeka.

⁵ Mapili yansungunuka ninga phula pamaso pa Chawuta, pamaso pa Mfumu wapantsi pentse.

⁶ Kudzulu kunilalikila kulungama kwake, wanthu wentse aniwona mbili yake.

⁷ Wentse ampembeza bzifanikizo an'nyazisiwa, awo am'bzikuza nabzifanikizo bzapezi-pezi. Mukotamileni imwe amilungu wentse!

⁸ Ziyoni inibva ichikondwa, wana wachikazi wa Judha ansekelela, nathangwe lakutonga kwanu, imwe Chawuta.

⁹ Pakuti imwe, imwe Chawuta, ndimwe Nyakudzulu-dzulu pantsi pentse, munkuziwa kwene-kwene paamilungu wentse.

¹⁰ Imwe munfuna Chawuta, zondani chakuyipa! An'chinjiliza umoyo wawantsisi wake, achiwapulumusa kuchoka m'manja mwawakuyipa.

¹¹ Mwenje um'bzaliliwa wakulungama, kusekelela, kwawakukonkholoka muntima.

¹² Sekelelani mwa Chawuta imwe wakulungama! Tendani nkhumbusila yake yakuyela!